Enn dregur íhaldið lappirnar

Sjálfstæðisflokkurinn hefur löngum dregið taum Bandaríkjamanna á hverju sem gengið hefur. Þegar um málefni Ísraels og Palestínumanna hefur verið að ræða hefur flokkurinn sjaldan þorað að fordæma framferði þeirrar þjóðar sem sýnt hefur einhverja mestu illsku sem um getur í samskiptum þjóða - Ísraelsmanna sem virðast hafa farið í smiðju til fyrrum kúgara sinna á öllum öldum.

Herinn í Ísrael hegðar sér eins og sjóræningjar. Stjónvöld í Ísrael eru engu skárri við Palestínumenn en þýskir nasistar voru við Pólverja og aðrar þjóðir sem þeir undirokuðu. Hegðun Ísraelsmanna tekur fram illvirkjum nasista gegn gyðingum.

Ísraelsmenn njóta verndar mesta herveldis heims, sjálfskipaðrar alþjoðalögreglu Bandaríkjamanna. Á meðan Bandarikjamenn breyta ekki um stefnu og eiga sér að auki stuðningsmenn eins og þingflokk Sjálfstæðisflokksins á Alþingi Íslendnga er hætt við að líti breytist. Ísraelsmenn halda áfram að murka lífið úr Palestínumönnum.

Íhugi að slíta stjórnmálasambandi

Athugasemdir

[Óskar Þorkelsson, 1.6.2010 kl. 17:28]

sammála þér Arnþór

[Árni Matthíasson , 1.6.2010 kl. 21:02]

Sæll vertu Arnþór.

Alla jafna reyni ég að halda mér til hlés í umræðu sem þessari þó stundum þykir mér menn verða glannalegir í orðavali. Svo er í þetta sinn og þar sem við erum gamlir samstarfsmenn af Mogganum skrifa ég þér þessar línur.

Í færslu þinni skrifar þú:  "Hegðun Ísraelsmanna tekur fram illvirkjum nasista gegn gyðingum."

Svo vill til að illvirki nasista eru vel skráð og skjalfest og eins hefur hegðun Ísraelsmanna gagnvart Palestínumönnum verði vel rakin í fjölmiðlum.

Illvirki nasista fólust meðal annars í því að drepa alla gyðinga hvar sem til þeirra náðist, konur og börn meðtalin; fólk var drepið í gasklefum, grafið í fjöldagröfum, stundum lifandi, skotið til bana unnvörpum, flutt með gripaflutningavögnum í útrýmingarbúðir, notað í hryllilegar "læknisfræði"tilraunir, rænt og svívirt á alla lund. Milljónir manna voru drepnar á þennan hátt enda markmið nasista að drepa alla gyðinga.

Í því ljósi brestur mig eiginlega ímyndunarafl til að átta mig á með hvaða hætti hegðun Ísraelsmanna gagnvart Palestínumönnum getur tekið þessari voðaframkomu fram. Þú getur kannski upplýst mig um það. Nú eða Óskar sem er víst sammála þér.

Með vinsemd,

[Arnþór Helgason, 1.6.2010 kl. 23:45]

Sæll, Árni. Þakka þér ágæta fyrirspurn eins og þín var von og vísa.

Ég gæti trúað að rökstuðningur minn fyrir því sem einhverjir kunna að kalla gífuryrði í garð Ísraelsmanna, gæti fyllt heila bók. Til þess að skrifa hana og tína til ýmsar staðreyndir þyrfti ég að leggjast í allmikla heimildavinnu svo að bókin yrði trúverðug.

Það er bitamunur en vart fjár á eðli þeirra aðferða sem Ísraelsmenn og nasistar hafa beitt. Allt frá stofnun Ísraelsríkis sem á sér vart nokkra þjóðréttarlega hliðstæðu, hafa þeir fært út kvíarnar á kostnað íbúanna sem fyrir voru í landinu og sölsað undir sig eignir þeirra og land. Það tókst þeim m.a. vegna gríðarlegrar skipulagningar og ómælds fjárstuðnings frá trúbræðrum sínum á Vesturlöndum, en vesturveldin stóð aðgerðalaus hjá eða studdu Ísraelsmenn með ráðum og dáð leynt og ljóst. Síðustu uppátæki þeirra gagnvart íbúum Vesturbakkans og einkum Gaza geta vart flokkastundir annað en hryðjuverk og þjóðarmorð. Munurinn á þjóðarmorði nasista og Ísraelsmanna er fyrst og fremst sá að hinir síðar nefndu beita aðferðum sem leiða til hægfara dauða fjölda fólks og það er svo sannarlega séð til þess með óbeinum ef ekki beinum tilstyrkk Bandaríkjamanna að þau áform gangi eftir. Jafnvel sjálfur Bandaríkjaforseti treystir sér vart til að lyfta litla fingri til þess að stöðva þessi áform og Ísraelsmenn virða enga samninga.

Við vitum víst báðir að undirrót þessara atburða má rekja til óæskilegra afskipta Breta af málefnum gyðinga í lok fyrri heimsstyrjaldarinnar og síðan hefur hvert ógæfuverkið rekið annað eins og vill verða í viðskiptum þjóða. Því miður hefur farið svo fyrir mér að ég sé þessa atburði í víðara samhengi en áður og skýrskota þá m.a. til gamla testamentisins en þar segir víða frá óhæfuverkum Ísraelsmanna í garð þeirra þjóða sem þeir undirokuðu.

Ef sagan endurtekur sig eins og sumir halda fram fer sjálfsagt svo að Ísraelsmenn nútímans fái makleg málagjöld þótt ég óski þess svo sannarlega ekki. Eitt er þó víst. Ísraelsk stjórnvöld verða að skipta um ham og læra að virða samninga áður en ég tek orð mín aftur.

Það vill svo einkennilega til að ég var alinn upp í nokkurri aðdáun á Ísrael nútímans. Jónas frá Hriflu, vinur föður míns, var mikill aðdáandi samyrkjubúanna í Ísrael og ef ég man rétt fór hann þangað til þess að kynnast restri þeirra. Í upphafi 7. áratugarins ríkti almennur velvilji í garð Ísraelsmanna hér á landi og gengu jafnvel kristnir barnaskólakennarar svo langt að benda nemendum sínum á hvernig Guð héldi áfram verndarhendi yfir þjóð sinni. Til dæmis sagði einn þeirra að þegar "Egyptar réðust á Ísraelsmenn árið 1956 gjörsigraði ísraelski herinn Egypta þótt her þeirra væri mun fámennari." Ég sem einföld sál fór með þennan vísdóm heim í hádegismat og þyngdist þá heldur brúnin á föður mínum.

Þegar Arabar gripu til svokallaðra hryðuverka gagnvart Ísraelsmönnum laukst loks upp fyrir nokkrum hluta Vesturlandabúa hvað í raun væri á seiði og síðan hafa stöðugt fleiri áttað sig á því. Ég hygg að séra Sigurður Einarsson í Holti hafi orðið einna fyrstur íslenskra rithöfunda til þess að færa slíkar hugsanir í letur en hann las athyglisverða smásögu í Ríkisútvarpið um miðjan 7. áratuginn þar sem hann gerði að verkum hryðjuverk gyðinga á 5. áratugnum og þá staðreynd að nú væru eftirlýstir glæpamenn komnir á valdastól í Ísraelsríki hinu nýja. En ekki fleiri orð um það að sinni.

Bestu kveðjur og þakkir fyrir spurninguna.

[Óskar Þorkelsson, 2.6.2010 kl. 03:38]

skák og mát

[Gunnar (IP-tala skráð) 2.6.2010 kl. 10:10]

"Þegar Arabar gripu til svokallaðra hryðuverka gagnvart Ísraelsmönnum"

Afhverju að bæta við orðinu "svokallaðra" þarna? Afhverju að reyna að gera minna úr hryðjuverkum Palestínumanna?

Finnst þér allt í lagi að drepa íþróttamenn á ólimpíuleikunum, sprengja upp kaffihús og strætisvagna fulla af saklausu fólki og þar fram eftir götunum?

Þótt að Ísrealar hafi framið mörg voðaverk gagnvart Palestínumönnum þá réttlætir ekkert hryðjuverk gagnhvart óbreyttum borgurum. Það er í raun ekkert skárra en hefndarárásir bandamanna á þýskar borgir í lok seinni heimstyrjaldar.

Ef Palestínumenn hefðu eitthvað á milli eyrnanna myndu þeir leggja niður vopn og leita annara leiða til að fá land sitt viðurkennt og komast undan hæli Ísraela.

Á meðan Ísrael getur (og það með réttu) sagt að þeir séu að verja sig gagnvart hryðjuverkaárásum, mun fólk alltaf hafa samúð með þeirra málstað.

Svo lengi sem að samúð heimsbyggðarinnar er skipt í tvennt á milli þessara þjóða mun ekkert gerast.

[Árni Matthíasson , 2.6.2010 kl. 13:36]

Sæll vertu félagi og þakka þér svarið.

Þú svarar reyndar ekki þeirri fyrirspurn minni hvað Ísraelsmenn hafi gert Palestínumönnum sem telja má verra en að myrða fimm milljónir manna á viðurstyggilegan hátt, en það má svosem einu gilda.

Kannski finnst þér öll orð orðin svo máttlaus og dauf að það er sjálfsagt að líkja þessu saman, segir jafnvel: "Þetta var nú meiri helförin" til að lýsa knattspyrnuleik, eða "Þetta var algert þjóðarmorð" þegar þú lýsir árangri Heru Bjarkar í Evróvisjón. Þú hefur það vitanlega eins og þér sýnist.

Með kveðju,