Hvert skammarstrikið rekur annað

Nú ríkir um sinn jafntefli hjá ráðherrum Samfylkingar og Vinstrigrænna. Ögmundur Jónasson getur með engu móti útskýrt hvers vegna hann brýtur jafnréttislögin og Guðbjartur Hannesson þarf ekki lengur á kjararáði að halda. Þar með verða sjálfsagt Kjararáð og Jafnréttisnefnd lögð niður. Dæmi eru fyrir slíku, en fyrir nokkrum árum lagði Davíð Oddsson Þjóðhagsstofnun niður, því að hann var orðinn leiður á henni og vildi fá að stjórna óáreittur.

Það setur að mörgum ugg þegar horft er á hvernig ríkisstjórnin svívirðir stjórnsýsluna. Í hádegisfréttum upplýsti velferðarráðherrann að laun forstjóra Landspítalans hefðu verið hækkuð með þeim hætti að leyfa honum að "stunda læknisverk" eins og það var orðað. Hefur engum flogið í hug að það kunni að brjóta gegn lögum um vinnuvernd? Gera má ráð fyrir að skyldur forstjórans séu svo miklar að honum veiti vart af 60 stunda vinnuviku. Talan 450.000 fyrir læknisverk er allhá. Sé forstjórinn á lágum lögfræðingataxta tekur hann sjálfsagt um 15.000 kr á tímann sem þýðir að hann vinnur sér inn hækkunina með 30 klst á mánuði. Það er um hálf önnur klst á dag.

Þegar málið er því skoðað nánar ætti pistilshöfundur eiginlega að skammast sín fyrir að agnúast út í ráðherran fyrir þetta. Það ruglar menn einungis í ríminu að heyra heildarupphæðina nefnda og er hér með beðist afsökunar á skrifunum. En getur ráðherrann ekki búið til eða fundið einhverjar sposlur handa þeim öryrkjum, sem hafa enga eða litla atvinnu? Þá gæti munað um þriðjung þeirrar hækkunar, sem forstjórinn fékk. Hér með er þessari auðmjúku bón komið á framfæri.