Lærum af reynslunnin og búum til betra Ísland

Það vekur athygli að Alþingi hefst lítt að. Þeir, sem ættu að teljast hugsjónamenn á þinginu geta ekki stillt saman strengi sína og fá mál til almannaheilla sjá dagsins ljós önnur en þau sem snúa að aðstaðjandi vanda.

Nú er lag fyrir fjölmennustu heildarsamtök landsins að stilla saman strengi sína og blása til alþýðuþings. Hlutverk þingsins ætti að verða að búa til réttláta tryggingalöggjöf sem tekur á málum þeirra sem höllum fæti hafa staðið í samfélaginu.

Þá ætti að tryggja rétt allra til aðgengis að þjóðfélaginu á öllum sviðum. Slík vinna var hafin á vegum Félagsmálaráðuneytisins fyrir nokkrum árum en svo virðist sem starfið hafi einhvern veginn dagað uppi.

Einstakir hópar neytenda ættu að verða færir um að setja fram fullmótaðar hugmyndir um skipan mála í aðdraganda kosninga sem hljóta að fara fram innan skamms. Á grunni þeirra væri hægt að hefja nýtt löggjafarstarf.

Sjálfstæðis- og framsóknarmenn eyðilögðu kerfi almannatrygginga með skipulögðum hætti. Hrinda verður oki misréttisins af þegnum þessa lands og tryggja að Íslendingar geti búið hér við sem jöfnust kjör.

Mér er sagt að stjórnendur Öryrkjabandalags Íslands hugsi nú einna helst um ímyndarvinnu. Ímynd bandalagsins verður því verri sem minna heyrist í forystu þess. Það hefur svo rækilega tekist að þagga niður í Öryrkjabandalagi Íslands sem hagsmunasamtökum að lítt eða ekki er minnst á hagsmuni fatlaðs fólks þegar rætt er um kreppuástandið. Jafnrétti kynjanna og óttinn við útlendingahatur er það sem upp úr stendur auk óttinn við að ævisparnaður aldraðra færi fyrir lítið. Hvað um réttlátari löggjöf og betra aðgengi? Dæmi um sinnuleysið er t.d. það að fréttamannafundir ríkisstjórnarinnar skuli haldnir í Ráðherrabústaðnum við tjarnargötu. Hvað ef Fréttablaðið réði nú blaðamann í hjólastól?

Heimasíða með þökkum til Færeyinga

Ástæða er til að hvetja Íslendinga til að tjá Færeyingum þakkir sínar fyrir einstakt vinaþel í okkarn garð. Slóðin er
http://faroe.auglysing.is/add_name.asp

Hver trúir forsætisráðherra framar?

Í fréttum Ríkisútvarpsins hefur verið greint frá því að eitt af skilyrðum Alþjóða gjaldeyrissjóðsins sé að halla á ríkissjóði verði snúið til hins betra eigi síðar en árið 2012.

Forsætisráðherra hefur klifað á því að ekki megi greina frá einstökum liðum samkomulagsins og efnahagsáætlun ríkisstjórnarinnar er leyndarmál. Samt vitum við nú hvernig 19. liður samkomulagsins hljóðar: Stýrivestir verði 18%. Og nú er það hallinn á ríkissjóði.

Að mér læðist sá illi grunur að ríkisstjórnin viti að ekkert verði af þessu láni sjóðsins og þess vegna verði ýmislegt látið seytla fram sem eigi að skýra þá afarkosti sem við höfum staðið frammi fyrir.

Hvernig væri nú að Sjálfstæðisflokkur og Samfylking ákvæðu að fara að segja þjóðinni satt?

Því lengur sem það dregst þeim mun grimmilegri verða pólitísk örlög núverandi valdhafa.

Magnaður fundur á Austurvelli

Fundurinn á Austurvelli í gær var magnþrunginn. Þrír ræðumenn, þau Ragnheiður Gestsdóttir, Sigurbjörn Árnadóttir og Einar Már Guðmundsson, fluttu hvert öðru betri ræður þar sem reiði þeirra og andstyggð á yfirdrepsskap, gróðafíkn og græðgi var áberandi.

Hörður Torfason stýrði fundinum af stakri prúðmennsku og reisn.

Bifhjólamenn og ungir róttæklingar settu fremur leiðinlegan svip á þessi friðsömu motmæli en þeim var nokkur vorkunn. Uppátækin veiktu þó malstað þeirra.

Ég hljóðritaði fundinn og get vonandi gert honum einhver skil á öðrum vettvangi. Hljóðmyndin var stórkostleg þótt í einómi væri.

Hverjir eiga að segja af sér?

Í morgun var greint frá því að upplýsingafulltrúi svikamyllunnar Sterlings hefði verið látinn fjúka vegna þess að hann neitaði að taka þátt í blekkingarleiknum sem yfirmennirnir stunduðu.

Í febrúar vissi bankaráð Seðlabankans að bankarnir voru komnir í hengingaról vegna vaxtaálags.

Í mars lögðust tveir ráðherrar ríkisstjórnar Íslands í víking með útrásarforkólfum til þess að efna til blekkinga um stöðu íslensku bankanna.

Skömmu áður en ráðherra ríkisstjórnarinnar fór ásamt fríðu föruneyti á Ólympíuleikana taldi hann (hún) óþarft að efna til skyndiþings til þess að ræða aðsteðjandi vanda.

Í september virtist breski fjármálaráðherrann vita meira um yfirvofandi hættu en íslenskur ráðherra sem sat á rökstólum við hann og fleiri suður á Englandi.

Í Kastljóssi sjónvarpsins fyrir nokkru þóttist þessi sami ráðherra ekki skilja í hvað Alister Darling væri að vitna.

Þótt þessi upptaling sýni að flestir ráðherrar ríkisstjórnarinnar hafi meira eða minna farið með blekkingar, ef til vill í misskilinni varfærni sinni og í þeim tilgangi að hlífa bönkunum, er þó greinilegt að þeir eru trausti rúnir. Enginn þeirra getur kallast vammi firrtur.

Nú er ekki í tísku á Íslandi að segja af sér fyrr en í fulla hnefana. En hvað gera flokksmenn þeirra á vetri komanda? Og skyldi jafnframt ekki verða endurnýjuð forysta Framsóknarflokksins? Hann átti þó einna drýgstan þátt í að opna gáttir þessa foraðs se nú hefur fært hér sitthvað á bólakaf.

Ábyrgð í starfi

Það er almælt að Íslendingar lendi yfirleitt í ýmsu en ákveði hvorki né geri neitt sjálfir. Þannig lenti formaður stéttarfélags í því að taka þátt í vafasamri afgreiðslu í bankaráði nokkru.
Flestir reyna sitt ítrasta til að halda ærunni. Hluti þess er að axla eigin ábyrgð og segja af sér hafi þeim orðið á ærin mistök. Þannig ná menn helst vopnum sínum og eiga ef til vill uppreisnar von.
Hrekist þeir úr starfi með skömm er ósigurinn alger.

Norsk króna - Hraðvirk gjaldmiðilsskipti

Það dylst engum framar að krónan hefur runnið sitt skeið á enda. Almenningur spyr hvað sé þá til bjargar.

Í gær átti ég athyglisverðar samræður við ungan fjölskylduföður um ástandið. Hann er svo heppinn að hafa atvinnu og verður svo vonandi áfram. Erlent lán íþyngir fjölskyldunni dálítið eins og gengur og gerist.

Við ræddum m.a. um gjaldmiðilsskipti og aðild að EES. Það er hverjum manni ljósara að Íslendingar eiga langt í land með að uppfylla þau skilyrði sem sett eru um aðild að myntbandalagi Evrópu og aðgerðir EES gagnvart okkur eru með þeim hætti að mér hrýs hugur við Evrópusambandsaðild. Hið sama er upp á teningnum hjá Norðmönnum. Efnahagslegir og pólitískir hagsmunir eru í veði og óvíst að þeir breytist á næstunni.

Með þessar vangaveltur í huga las ég af athygli grein Þórólfs Matthíassonar í Mogganum í dag um upptöku norsku krónunnar. Þá rifjaðist upp fyrir mér að einhver hagfræðingur hélt því fram að vitlegast væri að taka upp mynt sem Íslendingar notuðu sem greiðslumiðil og þá er vart um annað að ræða en Evru og Bandaríkjadali.

Við nánari yfirvegun þykir mér þó augljóst að fátt ætti að mæla gegn því að norska krónan yrði tekin upp hér á landi sem gjaldmiðill og ég er sammála Þórólfi um að það styrkti stöðu okkar gagnvart Erópusambandinu. Þetta er þó ekki einföld aðgerð og þarfnast margháttaðra athugana. Til dæmis þarf að verðmæta þær krónur sem eru í umferð og leysa þann vanda hvernig almenningur skaðist ekki á slíkum umskiptum.

fyrir rúmum 20 árum sameinuðust þýsku ríkin. Þá tóku Vestur-Þjóðverjar að sér austurþýska markið sem var jafnvel verðminna en íslenska krónan. Nú hyggjumst vér Íslendingar eigi játa oss undir vald Noregskonungs. Þess vegna væri fróðlegt að þessari umræðu yrði hleypt af stað og hagfræðingar útskýrðu hvernig gjaldmiðlaskiptin gætu farið fram.

Stjórnvöldum ber að hefja vinnu við athugun leiða út úr krónuvandanum. Þá vinnu þarf að hefja ekki síðar en nú.

Veit markaðsdeild Símans ekki hvað aðgengi að upplýsingum er?

Í dag barst mér tölvupóstur frá Símanum. Heiti skeytisins fjallaði um væntanlegar breytingar á tölvusímanum. Enginn texti var í skjalinu annar en krækjan "hér" sem menn áttu að smella á ef mynd birtist ekki. Þegar smellt var á krækjuna kom upp heimasíða með jpg-mynd. Ég hef áður fjallað um slíka hegðun þeirra símamanna. Nú sendi ég markaðsstjóra Símans bréf sem ég birti hér orðrétt.

Til Petreu Guðmundsdóttur, markaðsstjóra Símans. Sæl, Petrea. Ég vek athygli á meðfylgjandi pósti frá Símanum þar sem boðuð er breyting á Tölvusímanum. Í bréfinu er vísað á krækju http://www.siminn.is:80/servlet/file/tolvusiminn-nov-6.jpg?ITEM_ENT_ID=77418 Þegar smellt er á þessa krækju kemur upp jpg-mynd. Ég hef nokkrum sinnum fengið slíkan tölvupóst að undanförnu frá Símanum og ævinlega vakið athygli á að sú aðferð að senda jpg-myndir í stað texta samræmist EKKI aðgengisstefnu stjórnvalda. Blindir notendur netsins geta með engu móti lesið slíkan póst. Síminn hefur lagt metnað sinn í að gera heimasíðu fyrirtækisins aðgengilega . En veit markaðsdeildin hvað aðgengi að vefnum er? Sé svo, hyggst deildin þá uppfylla þær kröfur sem gerðar eru um aðgengi að upplýsingum?

Alþingi reki af sér slíðruorðið

Frumvarp Vinstri-grænna um afnám sérákvæða eftirlauna er eðlilegt og skerðingin skynsamleg. Í ljósi aðsteðjandi vanda eiga stjórnarflokkarnir að ganga í lið með Vinstri-grænum og veita þessu máli flýtimeðferð.
Í ljósi umræðunnar á Alþingi verður að segja sem er að þögnin og pukrið kringum AÞG er óásættanleg og ríkisstjórnin verður að veita þinginu ákveðnar forsendur til að ræða aðsteðjandi vanda.

VG krefst afnáms eftirlaunalaga

Lofgrein Árna Matthíassonar um Blakkberrý-símann

Bandarísku blindrasamtökin og sjónskertir bandarískir þingmenn hafa gagnrýnt Blackberry-fyrirtækið fyrir hönnun samnefnds síma en hann er að miklu leyti óaðgengilegur blindu eða sjónskertu fólki. Brýtur hann þannig gegn bandarísku fjarskiptalöggjöfinni.
Gaman væri að vita hvort nýi gullsíminn sé nokkru betri.