Hótun eða fullyrðing

Það er engin ástæða til að leggja árar í bát missi menn stöðu sína. Sumir reyna fyrir sér á nýjum miðum en aðrir halda á áður þekkt mið.

Davíð Oddsson hefur aldrei hætt að vera stjórnmálamaður. Hann varð seðlabankastjóri til þess að geta haldið áfram í valdataumana.

Nú er eftir að sjá hvort forsætisráðherra vill sitja í skugga seðlabankastjórans eða hætta á að hann gangi aftur sem eiginlegur stjórnmálamaður.

Glöggt dæmi um græðgi Frjálsa fjárfestingabankans - eins dauði annars brauð

Fyrir rúmu ári var hafist handa við að rífa húsið á horni Nesvegar og Skerjabrautar sem hýsti áður Prjónastofuna Iðunni, fallegt hús sem reist var á 7. áratugnum. Húsið ásamt næstu lóð´hafði verið keypt fyrir 270 milljónir og þar skyldi reisa fjölbýlishús ætlað 50 ára og eldri. Upphaflegar hugmyndir eigendanna gerðu ráð fyrir 35 íbúðum en þeim var hafnað.

Tilboð hafði borist í uppsteypu hússins og hljóðaði það upp á 700 millj. kr. Lóð og hús kostuðu þannig um 970 millj. kr. og þá var sjálfsagt eftir að ganga frá húsnæðinu svo að það yrði íbúðarhæft.

Þegar Iðunnarhúsið var rifið var þegar farið að bóla á skorti á eftirspurn eftir nýju húsnæði enda hefur gryfjan staðið auð og ófrágengin. Í vestanáttum hefur mold og sandi rignt yfir næstu blokk.

Nú hefur verið hafist handa við að fylla gryfjuna upp og næsta vor verður sáð í hana. Lítur þannig út fyrir að við hjónin njótum óhefts útsýnis úr eldhúsglugganum og svo er um fleiri íbúa Tjarnarbóls 14.

Vissulega erum við Frjálsa fjárfestingabankanum, sem á þessa hornlóð, þakklát fyrir að útvega okkur þetta fagra útsýni en þykir það helsti dýr gjöf - gjöf því að spáð er að ekki verði byggt þarna á næstu árum.

Vonandi hafa þeir, sem seldu Iðunnarhúsið og lóðirnar, getað fjárfest í öðru en hlutabréfum og peningamarkaðssjóðum.

Tvískinnungsháttur Samfylkingarinnar

Það vekur athygli að í ályktun Samfylkingarfélagsins á Akranesi er krafist stjórnarslita fari Sjálfstæðisflokkurinn ekki að kröfu flokksins um að samþykkja aðild að Evrópusambandinu. Um leið vill félagið tryggja eign þjóðarinnar á auðlindum landsins í stjórnarskrá. Sumir myndu nú halda að með því að ganga inn í ESB afsöluðu Íslendingar rétti sínum til nýtingar auðlindanna.

Ég tek heils hugar undir sjónarmið þeirra sem varað hafa við þeirri umræðu sem fer nú fram um nauðsyn þess að Íslendingar sæki um aðild að Evrópusambandinu. Til þess að það sé hægt verður að kanna ítarlega hvaða afleiðingar það hefði í för með sér og efna til gagnrýninnar umræðu sem mótast ekki af fyrirfram gefnum skoðunum.

Styrmir Gunnarsson hitti naglann á höfuðið á fundi Heimssýnar á mánudaginn var þegar hann dró upp í fáum en skýrum dráttum þau atriði sem hugleiða þarf og Sigurður Líndal hefur varað við þessari einhliða umræðu á þeim umbrotatímum sem við erum nú á. Samlíking Illuga Gunnarssonar við timburmenn og verkjapillur var og skondin..

Það er þekkt að einhliða áróður snúist fyrr eða síðar gegn þeim sem hann stunda. Með því að klifa í sífellu á aðild að ESB er hætt við að Samfylkingarsinar hrindi ýmsum í fang Vinstri grænna og Sjálfstæðisflokksins. Þætti þá sumum betur heima setið en af stað farið og svo gæti farið að fylgi Samfylkingarinnar minnkaði.

Myndi jafngilda stjórnarslitum

Kjararáð grefur sér gröf

Í dag fékk ég tölvupóst frá ágætum vini mínum sem hélt því fram að úrskurður kjararáðs um að neita að fara að tilmælum ríkisstjórnarinnar gerði ráðið óþarft. Benti hann á að í Bandaríkjunum þætti réttast að stjórnmálamenn settu sjálfir lög um laun sín.

Í fljótu bragði er erfitt að sjá hvers vegna kjararáð getur ekki lækkað laun æðstu embættismanna ef úrskurðurinn miðar að því að samræma laun við þá þróun sem orðið hefur á almennum markaði í samfélaginu. Kjararáð var stofnað á sínum tíma væntanlega vegna þess að alþingismönnum þótti erfitt að ákveða sjálfir eigin laun, þorðu ekki að takast þá pólitísku ábyrgð á hendur. Kjararáð hefur iðulega komið aftan að almenningi í landinu eftir að almennir kjarasamningar hafa náðst og ákvarðað laun embættismanna stundum langt umfram það sem almennir launþegar hrepptu. Hugrekki ráðsins og stjórnvada hefur þá farið saman og hafa úrskurðir ráðsins iðulega verið birtir daginn eftir alþingiskosningar til þess að þeir hefðu ekki áhrif á úrslitin.

Er ekki hreinlegast að Alþingi axli sjálft þá ábyrgð að ákveða laun sín og annarra sem eru á snærum þess?

Farsæl lausn

Sú sem tekur við umsóknum um starfið sem nefnt var í síðustu færslu hefur tilkynnt mér að ég verði látinn njóta vafans. Hins vegar telur hún að láta þurfi umsjónarmenn Starfatorgs vita að síðan sé ekki aðgengileg. Er þessi víðsýni þökkuð af heilum hug.

Nú er Starfatorg ágætlega gerð síða og aðgengileg að flestu eða öllu leyti. Ég var jafngrandalaus og raun bar vitni fyrir þessu óhappi vegna þess að ég hafði álitið síðuna allaðgengilega. Það er sennilegt að skjálesaranum hafi eitthvað brugðist bogalystin eins og Sigrún Þorsteinsdóttir, aðgengisráðgjafi, segir í áliti sínu á þessu vandamáli og fer það hér að neðan öllum til fróðleiks.

"Tölvur eiga að skrá heimsóknir á vefsíður og það sem meira er, hvenær síðan var heimsótt og hvað þú skoðaðir. Það má sjá af t.d. 'history' vefsíðna þ.e. þegar þú heimsóttir Starfatorg sést hvaða dag það var og jafnvel klukkan hvað (sem sérfræðingar eiga að geta séð). Sem þýðir að ef þú heimsóttir Starfatorg þennan ákveðna dag má sjá að þú hefur ekki skoðað þessa tilteknu auglýsingu. Það er mjög líklegt að skjálesarinn hafi einhverra hluta vegna ekki séð auglýsinguna. Þeir eru stundum dyntóttir skjálesararnir og stundum lesa þeir meira að segja "lok síðu" þó þeir hafi ekki einu sinni hafið lestur. Þetta get ég staðfest sem sjáandi manneskja sem nota skjálesara daglega vegna vinnu minnar. Það er erfitt að framkvæma þessa villu aftur því ekki er endilega alltaf fullvissa um hvað veldur. Það getur þó t.d. verið að skjálesarinn sé að lesa kóðann vitlaust, hann grípi upplýsingar sem hann á ekki að grípa o.fl. Ég hef margoft lent í þessu. Það er alveg á hreinu að þú hefðir sótt um þetta starf hefði skjálesarinn "séð það" að það væri í boði. Það er akkúrat enginn möguleiki á því að þú hefðir ekki sótt um starfið nema fyrir tæknilega örðugleika í skjálesaranum. Ég veit þetta bæði af því þú skoðar vefinn nánast daglega og vefurinn sjálfur er aðgengilegur að flestu leyti hvað varðar skjálesarana. Hér er því ekki um mannleg mistök þín að ræða, né mistök af hálfu vefsíðunnar starfatorg.is heldur vegna tæknilegs búnaðar þ.e. skjálesarans. Bestu kveðjur Sigrún "

Tölvuóhapp á Starfatorgi

Í gær var mér bent á starf sem væri auglýst á Starfatorgi og fæli m.a. í sér útgáfu bóka með blindraletri. Fór ég inn á torgið og fann ekki greinda auglýsingu með hefðbundnum aðferðum. Notaði ég því leitarmöguleika skjálesarans til þess að fletta upp á orðinu "blind".

Fannst þá auglýsingin og kom í ljós að umsóknarfrestur var til 1. desember. Gefið var upp netfang sem skila mátti umsóknum til og opnaði ég það. Samdi ég síðan umsóknina og lét ferilskrá fylgja með.

Innan skamms barst mér bréf þar sem mér var tjáð að verklagsreglur ríkisins bönnuðu að tekið væri við umsóknum eftir að frestur væri liðinn. Svaraði ég bréfinu og bað um að fá að njóta vafans. Sagðist ég hafa farið inn á Starfatorgið m.a. mánudaginn 24. fyrra mánaðar og aftur þann 30. Hefði ég aldrei orðið var við auglýsinguna. Hlyti það að stafa af galla í heimasíðunni eða í skjálesaranum sem hugsanlega skautaði yfir einhver svæði.

Nú hefur mér borist svar þar sem ég verð látinn njóta vafans takist mér að sanna að um galla á heimasíðunni hafi verið að ræða. Þá eru góð ráð dýr því að auglýsingin hefur verið fjarlægð.

Ég hef svarað þessu bréfi og boðist til að láta rannsaka tölvu mína ef það þjónar einhverjum tilgangi. Einnig hef ég bent á að stjórnvöldum beri að sanna að aðgengi að Starfatorgi sé óaðfinnanlegt. Vonandi verður þetta mál leyst með sanngirni. Það sýnir þó í hnotskurn hve mikilvægt er að aðgengi að upplýsingum verði tryggt með lögum.

Ég hlýt að vera farinn að eldast því að svona þras og barátta dregur næstum úr mér allan mátt.

Þjálar og auðskildar þýðingar

Þýðing Windows-kerfisins á íslensku hefur skipt sköpum fyrir ýmsa sem hafa lært á tölvur á seinni hluta ævinnar. Þeir sem hafa gefið sér tíma til að tileinka sér íslensku þýðinguna ljúka flestir upp einum munni hvað hún sé mun auðskildari en enskan.

Það sem veldur einkum vandræðum og því að menn nota ekki íslenskt viðmót er að íslenskan nær ekki niður úr efstu lögum Windows-stýrikerfisins. Um leið og farið er í innviði þess og leitað eftir flóknari skipunum tekur enskan við. Þá bætir heldur ekki úr skák að forrit frá öðrum en Microsoft hafa sjaldan verið þýdd.

Það væri óskandi að fundin yrði leið til þess að auka veg íslenskrar tungu í tölvuumhverfinu.

Innan við fimmtungur velur íslensku

Ófarir

Í morgun var mér bent á auglýsingu um starf við Blindrabókasafn Íslands sem var að finna á starfatorgi. Var þar m.a. gert ráð fyrir yfirfærslu prentaðs efnis á blindraletur og sitthvað fleira sem ég hefallgóða þekkingu á. Umsóknum skyldi skilað fyrir 1. desember.

Af einhverjum ástæðum hafði þessi umsókn farið framhjá mér. Annaðhvort hefur skjálesarinn skautað yfir hana eða eitthvað annað hefur valdið. En ég sótti.

Ekki stóð á svarinu. Verklagsreglur ríkisins leyfa ekki að tekið sé við umsóknum sem berast eftir auglýsta dagsetningu.

Það liggur við að mér fallist hendur. Rétt er að láta vonleysið ekki ná tökum á sér heldur fara á hátíðarsamkomu hjá Þjóðarbókhlöðunni þar sem opnaður verður nýr og endurbættur vefur www.timarit.is.

Mér hlýtur einhvern tíma að leggjast eitthvað til.

Indverskir ráðherrar ábyrgari hinum íslensku

Það virðist hafa farið framhjá íslenskum fjölmiðlum að innanríkisráðherra Indlands sagði af sér í gær. Ástæðan var sú að komið hafði í ljós að indverskum stjórnvöldum barst vitneskja um fyrirhugaða árás hryðjuverkamanna. Vitað var hvar þá bæri að landi og hvernig. Stjórnvöd aðhöfðust næsta lítið.

Þótt hrun íslensku bankanna hafi ekki borið að alveg með sama hætti höfðu stjórnvöld þó verið vöruð við.

Ráðherrar viðskipta og fjármála á Íslandi sitja hins vegar sem fastast.