Fortíðin og bankahrunið

Nú birtast í fjölmiðlum fréttir af því hverjir ætli að leita eftir endurkjöri til Alþingis í vor. Nokkrir hafa ákveðið að hætta og greina til þess ýmsar ástæður.

Þegar litið er á nöfn frambjóðendanna vekur athygli að ýmsir, sem tóku beinan þátt í dansinum kringum gullkálfinn og leyndu almening því sem þeir vissu hyggjast bjóða sig til áframhaldandi setu á Alþingi. Á þetta einkum við um Samfylkinguna og Sjálfstæðisflokkinn.

Miðað við það sem á hefur gengið að undanförnu hlýtur að verða hart sótt að þessum einstaklingum og baráttan innan stjórnjmálaflokkanna óvægnari en áður. Eitthvað þarf til að létta siðblindunni af sumu fólki ef það er þá hægt.

Stjórnlagaþing

Sjálfstæðismenn virðast nú veita hugmyndum um stjórnlagaþing harða andstöðu. Hefur jafnvel heyrst orðið "bylting" um þessar hugmyndir. Í raun hefur aldrei verið haldið neitt stjórnlagaþing hér á landi síðan Trampe greifi leysti upp þjóðfundinn árið 1851.

Það er mikill misskilningur að Alþingi sé sýnd einhver lítilsvirðing með því að kjósa til sérstaks stjórnlaga þings. Reynslan hefur sýnt að þingið er ófært um að leiða til lykta nýskipan stjórnarskrárinnar. Til þess er stjórnlagaþingið vel fallið.

Atvinna flutt úr landi

Um daginn keyptum við ferhyrndar flatkökur og höfum haldið því áfram vegna þess að þær eru vel bakaðar og góðar. Nú er mé tjáð að þær séu í raun ekki íslensk framleiðsla heldur forbakaðar erlendis og fullgerðar hér heima.

Hið sama er sagt að sé upp á teningnum í flestum brauðgeðum landsins. Mikill hluti þess sem selt er þar og í stórmörkuðum er hnoðaður og forbakaður erlendis og síðan fullunninn hér á landi. Hlýtur þetta að sæta tíðindum þegar atvinnuleysið herjar á alla, að gjaldeyri sé eytt með þessum hætti.

Það er ekki nóg með að fiskurinn sé ekki fullunninn hér á landi heldur láta Íslendingar forvinna handa sér flatkökur, annars konar brauð og jafnvel laufabrauð. Mér er einnig tjáð að rándýrt sag eða spænir séu fluttir inn undir hesta, en þetta megi vel framleiða hér á landi.

Pólitískt hugrekki

Steingrímur Sigfússon tók að flestra mati rétta ákvörðun með því að heimila hvalveiðar í ár. Hann styrkti þessa ákvörðun með því að fá álit hins vinstrigræna lögfræðings, Ástráðs Haraldssonar. Þá skiptir miklu að ákveðin svæði verði friðuð og hvalaskoðunarfyrirtækjum og hvölum gert kleift að þrífast þar í friði.

Svo kallaðir náttúruverndarsinnar hafa margsinnis haft orð á að veiðar skaði bæði orðstír Íslendinga og hag fyrirtækjanna. Hvorugt hefur reynst rétt.

Sjórinn er auðlind og í henni eru fólgin mikil verðmæti. Séu þau nýtt með skynsamlegum hætti verður auðlindin allri þjóðinni til farsældar. Um leið og lögin um hvalveiðar verða endurskoðun þarf að létta einkaleyfi af veiðunum og sjá til þess að heimildirnar verði boðnar út.

Lýsir yfir miklum vonbrigðum

Áfellisdómur á vinnubrögð síðasta félagsmálaráðherra Framsóknarflokksins

Það er oft með ólíkindum hve ungur starfsmaður Kastljóssins setur mál í rangt samhengi. Samtalið við forsætisráðherra í kvöld var enn eitt dæmið í safn piltsins sem var rangt reiknað.

Stjórnarnefnd málefna fatlaðra var skipuð til fjögurra ára og var til siðs að endurnýja nefndina eftir kosningar. Þess vegna var skipun félagsmálaráðherra Framsóknar á formanni nefndarinnar til fjögurra ára í lok kjörtðímabils siðlaus enda mátti hann vita að Framsóknarflokkurinn færi illa út úr kosningunum 2007, til þess bentu eindregið allar kannanir.

Pilturinn, sem fer oft mikinn í Kastljósinu, hefði átt að ræða við fyrrum félagsmálaráðhera Framsóknarflokksins í stað þess að tuða og nöldra í forsætisráðherra eins og hann skildi hvovki skrifað né mælt, íslensktt mál. Pilturinn ætti einnig að vita að fjölmörgum dómum héraðsdóms Reykjavíkur hefur verið hnekkt fyrir Hæstarétti. Hann hefði fremur átt að þakka Jóhönnu fyrir að áfrýja ekki dómnum og valda skattgreiðendum þannig auknum kostnaði.

Þá var fáheyrður sá sóðaskapur unga mannsins að jafna saman þeim gerningi Árna Magnússonar að losa sig við Valgerði Bjarnadóttur. Þar var ekki um pólitískan trúnaðarmann að ræða sem skipaður var út kjörtímabil Alþingis heldur embættismann sem var skipaður væntanlega til 5 ára.

Vonandi verður þessi makalausa framkoma piltsins og úttekt hans til þess að hann verði settur í einhvers konar endurhæfingu enda eru dæmi þess að slík endurhæfing eða menntun snúist fólki til góðs.

Beint frá Alþingi á mbl.is

Á kosningavef mbl.is er nú beinn hlekkur á útsendingar frá Alþingi. Í frétt mbl.is er fólki bent á að smella á borða hægra megin á síðunni. Þeim sem nota skjálesarann Supernova eða HAL frá Dolphin er bent á að fara þannig að:

1. Leitið að orðinu kosning með því að fara inn á mbl.is, styðja á f3 og lykla það inn. Síðan er stutt á færslulykilinn (enter).

2. Virkið undirsíðuna með því að styðja á færsluhnappinn við kosningavefinn.

3. Leitið nú að orðunum "Beint frá Alþingi" eða hreinlega beint og þá finnið þið krækjuna á beinu útsendinguna.

Sagði Geir ósatt um trúnaðinn

Nú er skörin tekin að færast upp í bekkinn á Alþingi. Í haust hélt forsætisráðherra því fram að ekki mætti birta drög að efnahagsáætlun Alþjóða gjaldeyrissjóðsins og ríkisstjórnarinnar þar sem um trúnaðarmál væri að ræða. Tókust menn á um þetta mál og niðurstaðan varð hver? Á meðan þingmenn þjörkuðu um þetta á Íslandi voru málin rædd opinskátt í Kænugarði en þar lágu líka fyrir drög.

Eins og menn muna aflétti Seðlabankinn trúnaði af einni grein því að hún var þá þegar höfð í hámælum. Þá var leyndin rofin.

Það er óheppilegt þegar slíkir atburðir endurtaka sig á Alþingi Íslendinga og þingmenn hjakka stöðugt í sama farinu. Hvað líður endurreisninni sem stjórnmálamenn virðast hafa gleymt?

Segir Jóhanna ósatt um trúnaðinn?

Skuldsetningaáráttan

Aldraður fjárfestir, sem er reyndur í íslensku atvinnulífi, hringir stundum til mín og veltir upp ýmsum hliðum íslenska viðskiptateningsins. Samtölin eru mér stórfróðleg enda er margt gott sem gamlir kveða. Þegar við köstum teningnum á milli okkar koma upp ýmis álitamál.

Síðast kom upp nafn fjárfestis nokkurs hér á landi sem virðist hafa tekist að krækja í ótrúlega fjármuni úr nær öllum lánastofnunum sem heitið geta á Íslandi. Þar má nefna Glitni, Landsbankann, Kaupþing, VBS, sparisjóðina o.s.frv. Þessi ungi maður hefur keypt fyrirtæki á fyrirtæki ofan hér á landi og erlendis, greitt með lánsfé og hlutabréfum í eigin fyrirtækjum og gætt þess að skuldsetja nýju fyrirtækin um leið og hann hefur selt hlutabréf í þeim til þess að kaupa ný. Nú er svo komið að fjármálavefurin nær um allt samfélagið og þótt víðar væri leitað.

Hinn aldraði fjárfestir velti fyrir sér hvernig standi á því að þessi ungi maður fékk allt það fé til ráðstöfunar sem raun ber vitni. Skýringuna taldi hann vera m.a. unga, vel menntaða menn (karlmenn) sem höfðu enga reynslu af viðskiptum, höfðu takmarkaða yfirsýn yfir íslenskt fjármálakerfi og töldu það mun stærra og öflugra en það reynist hafa verið.

Nú síðast spurði fjárfestirinn hvað hafi orðið um þetta fé. Eitthvað af því hljóti að hafa ratað á örugga staði og koma þá upp nöfn skattaparadísa eins og tortola. Sagt er að Kaupþing hafi átt hugmyndina af því að koma fé auðmanna undan á slíka staði og fleiri fylgdu á eftir.

Þessar sögur hafa lengi gengið fjöllunum hærra og því er undarlegt að ekki skyldi undir eins tekið til hendinni í haust og hafin rannsókn á þessum orðrómi sem öðrum sem fór víða. Er það enn eitt dæmi um ráða- og aðgerðalysi síðustu ríkisstjórnar.

Nú riðar Milestone til falls og sanngjarnir menn halda því fram að í raun sé eðlilegt að sænska fjármálaeftirlitið taki yfir eignirnar og ráðstafi þeim. Skellur íslenska fjármálakerfisins verði vart verri fyrir það enda séu Svíar þaulreyndir fjármálamenn í marga ættliði en Íslendinga skorti bæði hugdirfð og reynslu.

Breyting á forystu Samfylkingarinnar

Flestir eru sammála um að breytingar sé þörf í forystusveitt allra stjórnmálaflokka á Íslandi. Sagt er að sú breyting að Bjarni Benediktsson verði næsti formaður Sjálfstæðisflokksins nægi jafnvel ekki til þess að hreinsa spillingarorðið sem fer a forystu flokkanna af Sjálfstæðisflokknum. Sjálfstæðismenn segja sumir að til þess sé Bjarn um of tengdur viðskiptalífinu og því sem gerðist á útrásarárunum.

Hið sama á við um aðra stjórnmálaflokka. Jafnvel Vinstri grænir eru taldir þurfa á nýrri foystu að halda og hafa heyrst raddir um að nú sé leitað að einhverjum sem bjóði sig fram gegn formanninum. Telja verður ólíklegt að slíkar hugmyndir eigi við rök að styðjast enda hafa ráðherrar flokksins sýnt af sér röggsemi í starfi.

Á það hefur verið minnst að Ingibjörg Sólrún eigi að víkja sem formaður Samfylkingarinnar og láta á það reyna hvort ekki finnist verðugur arftaki innan flokksins, laus við spillingarorð og laus við að hafa tekið þátt í hrunadansinum um útrásina. Það kom því á óvart þegar Jón Baldvin Hanniballsson lýsti því yfir að hann myndi bjóða sig fram til formennsku ef Ingibjörg viki ekki.

Hingað til hafa fáir frýjað Jóni vits en margur grunað hann um græsku. Sjálfur hefur Jón sagt að ákvörrðun þessi snúist um vit. Því hljóta ýmsir nú að frýja honum vits um leið og þeir gruna hann um græsku.

Enginn er ómissandi.

Textinn skiptir engu

Ég hef reynt að forðast Evróvisjón-keppnina eins og heitan eldinn. Í gær komst ég ekki hjá því að fylgjast með keppninni hér á landi. Flest lögin áttu það sameiginlegt að eiga engar líkur á sigri í Moskvu. Þar að auki voru ýmsir söngvarar óþjálfaðir og söngurinn ekki burðugur.

Guðrún Jóhanna Jónsdóttir söng best og lagið "Er það satt" var með þeim skárri. Nú ætti höfundurinn að láta þýða ljóðið á íslensku og senda lagið þannig til Moskvu. Textinn skiptir hvort eð er engu máli.