Viðtengingarháttur, Dauðinn og mörgæsin

Í dag lýkur Gunnar I. Gunnsteinsson við að lesa söguna Dauðann og mörgæsina eftir Andrej Kúrkov í Ríkisútvarpið. Þýðing Ernu Ragnarsdóttur er allgóð og lesturinn í raun líka. Þó skortir herslumuninn á að hann teljist betri en góður.

Svo undarlega vill til að lesarinn virðist ekki hafa vald á viðtengingarhætti íslenskrar tungu. Dæmi:

Það var eins og hann hafði náð sér eftir langvinnan sjúkdóm.

Þá er nafn landsins Úkraínu ævinlega borið fram sem Úkranía. Stendur það e.t.v. í prentuðu útgáfunni? Ég trúi því tæplega.

Ég hef að undanförnu velt því fyrir mér vegna ýmissa dæma hvort eitthvað skorti á málfarslegt uppeldi nemenda í leiklistardeild Listaháskóla Íslands. Það er svo margt sem bendir til þess að fákunnátta um einföldustu atriði og almenn atriði evrópskrar menningar fari þverrandi og bitni á framsögn og lestri leikaranna. Stutt er síðan ágæt ævisaga var hreinlega eyðilögð með lestri ágæts leikara og útvarpsmanns af slíkum sökum.

Nú greiðir Ríkisútvarpið sæmilega vel fyrir upplestur útvarpssagna. Það ætti því að sjá til þess að betur væri vandað til verka.

Ég minntist um daginn á lestur Þórunnar Erlu- og Valdimarsdóttur á sögu sinni hér á þessum síðum. Sá lestur bar af eins og gull af eiri þegar hann er borinn saman við annað efni sem lesið hefur verið í útvarp að undanförnu.

Gleðileg breyting á morgunútvarpi

Áðan var tilkynnt að morgunútvarpið yrði byrjað með sígildri tónlist frá kl. 6-7:30.

Vonandi verður um fjölbreytta tónlist að ræða. gott að losna við gargið á Rás 2 á morgnana.

Miðborg Reykjavíkur sígur um 3 mm á ári

Áðan var útvarpað stórmerkilegu viðtali Jónasar Jónassonar við Einar B. Pálsson, sem hélt upp á 96 ára afmæli sitt á hlaupaársdegi. Í viðtalinu greindi hann frá því að Reykjavík sígi um 3 mm á ári samkvæmt mælingum sonar síns, Páls Einarssonar.

Hann rakti hvernig hann varð einu sinni var við að sjór streymdi upp um niðurfall á mótum Austurstrætis og Pósthússtrætis og greindi síðan frá því að dæla hefði þurft sjó úr Reykjavíkurtjörn á stórstraumsflóði.

Hann sagði að nú væri svo komið að sífellt þyrfti að dæla sjó úr tjörninni því að sjávarborðið er orðið hærra en lækurinn. Því væri vonlítið að opna lækinn eins og hugmyndi hefðu komið fram um.

3 mm á ári, það eru 30 cm á öld!

Ekkert hefur verið á þetta minnst vegna byggingar tónlistarhússins og annarra mannvirkja.