Netið er varasöm heimild

Í störfum mínum sem blaðamaður hef ég komist að því hversu Vefurinn er þægileg heimild, en um leið hve varasamur hann ef ef óvarlega er farið.

Eitt sinn þurfti ég að leita mér heimilda um bandarískan tundurspilli og stafaði nafn skipsins ranglega. Viti menn. Upp komu vangaveltur um það að hér væri um að ræða skip sem hefði verið sökkt haustið 1940 og væri það annað skipið sem sökkt hefði verið í seinni heimsstyrjöldinni.

Mér var bent á að nafnið væri ranglega stafsett í grein sem ég var að undirbúa og fletti ég þá öðru sinni upp heimildum um skipið. Þá kom allt annað í ljós. Skipið var hið fyrsta sem sökkt var.

Áðan leitaði ég að ljóði Þórarins Eldjárns, "Á íslensku má alltaf finna svar". Þá kom fyrst upp skjal úr söngskrá Ísaksskóla. Þar er ljóðið sagt eftir Jónas Hallgrímsson.

Ýmislegt í ljóðinu er þess eðlis að Jónas hefði vart getað ort það á sinni tíð. Vona ég að Ísaksskóli leiðrétti þetta svoað þessi villa vaði nú ekki uppi. Hún er þegar farin að smita út frá sér samkvæmt áreiðanlegum heimildum sem m.a. er að finna á vefnum.

Kolbeinn Tumi Árnason skírður

Í morgun var Kolbeinn Tumi, sonur Árna og Elfu Hrannar skírður að heimili sínu í Hafnarfirði. Viðstaddir voru nánustu venslamenn. Séra Ragnheiður Jónsdóttir annaðist athöfnina. Ömmur drengsins, Elín og Guðrún, voru skírnarvottar.

Pilturinn, sem fæddist 14. apríl síðastliðinn, gerði engar athugasemdir og tók lífinu með ró og spekt. Við athöfnina voru sungnir tveir sálmar: Ó blíði Jesú og skírnarvers sem ort var á árunum 1994-2005 (sitt erindið hvort árið) og lag sem tileinkað er þeim bræðrum og ófæddum börnum. Fyrra erindið var lesið þegar Hringur var skírður í stofunni hjá okkur í nóvember 1994 og bæði erindin flutt með sínu lagi sem frumflutt var við skírn Birgis Þórs fyrir þremur árum.

Í myndasafninu er mynd af Kolbeini litla Tuma í fangi föður síns. Næst honum stendur Elfa Hrönn með Birgi Þór í faðmi sér og þá Hringur.

Hið rétta eðli Bush-stjórnarinnar

Í morgun greindu fjölmiðlar frá því að Bandaríkjamenn krefðust nú 50 herstöðva í Írak og yfirráða yfir lofthelgi landsins. Stendur þessi krafa eitthvað í írökskum stjórnvöldum en Bandaríkjamenn þrýsta á að samningar verði undirritaðir eigi síðar en í næsta mánuði.

Þetta er eins og bergmál hins liðna hér á landi. Árið 1946 kröfðust Bandaríkjamenn herstöðva á Íslandi til 99 ára. Ýmsir stjórnmálamenn, þar á meðal Bjarni Benediktsson, mótmæltu harðlega og vitnuðu til yfirlýsingar landsins um ævarandi hlutleysi. Að vísu skiptu sumira þeirra um skoðun eftir að kalda stríðið hófst.

Bandaríkjaher kom síðan hingað formlega árið 1951 og var hér á meðan bandarísk stjórnvöld töldu sig þurfa á því að halda, en ekki á meðan sumir Íslendingar töldu sig þurfa á erlendum her að halda.

Niðurstaðan er þessi: Bandaríkjamenn eru heimsvaldasinnar.

Ég spurði eitt sinn nemendur mína að því hver væri munurinn á heimsvaldastefnu nútímans og 19. aldar. Einn þeirra svaraði því til að heimsvaldasinnar nútímans gerðu sér ekki grein fyrir því að þeir væru heimsvaldasinnar. En bandarísk stjórnvöld vita svo sannarlega hvað þau vilja og það hefur nú komið berlega í ljós gagnvart Írökum.

Sjómannadagurinn innandyra í Reykjavík

Við Elín fórum niður að höfn á sjómannadaginn og í fylgd okkar voru Hringur og Birgir Þór Árnasynir. Við Hringur sprönguðum um ´meðan Elín amma gætti litla snáðans. Hringur tók svo við og gætti bróður síns sem fjöreggs. Auðvitað var farið í siglingu með Sæbjörginni. Birgir Þór átt erfitt með að muna að skipið héti ekki Herjólfur og hét því Sæbjörginn annaðhvort Eyjólfur eða Sæbjörg Eyjólfsdóttir.

Ég hitti við hátíðarhöldin minn gamla félaga og vin, Jóhann Pál Símonarson, sjómann til margra ára og baráttujaxl fyrir öryggi sjómannastéttarinnar. Hafði hann verið viðstaddur ræðurnar á Listasafni Reykjavíkur, sem fluttar voru í tilefni sjómannadagsins. Þótti honum lítið til koma að flytja hátíðarhöldin inn í hús.

Ég tek undir þessa skoðun Jóhanns Páls. Það dró einhvern veginn úr stemmningunni að heyra ekki ávæning af ræðunum á meðan sprangað var um hafnarsvæðið. Ef til vill er þetta tímanna tákn því að fæstir þeirra, sem fluttu ávörp á sjómannadaginn, hafa migið í saltan sjó. Það held ég að sé a.m.k. sameiginlegt mér og mínum góða vin og skólabróður, formanni stjórnar Faxaflóahafna.

Jeppaeigendur verða fyrir eignatjóni!

Í gær voru kynntar tillögur sem eiga að draga úr losun gróðurhúsalofttegunda. Þar er m.a. gert ráð fyrir að skattur verði lagður á jarðeldsneyti og bílar verði skattlagðir eftir því hversu mikið þeir losa af gróðurhúsalofttegundum.

Framkvæmdastjóri FÍB brást þannig við að halda því fram að jeppaeigendur yrðu fyrir eignatjóni ef tillögurnar næðu fram að ganga. Í raun verður hver sá, sem kaupir jeppa, fyrir eignatóni um leið og hann kaupir sér slíkt farartæki. Afskriftirnar einar eru stórtjón og eldsneytiskostnaðurinn hrein sóun.

Nú verður forvitnilegt að vita hvort jeppaeigendurnir á Alþingi treystist til að fylgja tillögunum eftir.

Styrmir hætti í gær

Í gær hóf ég að nýju störf sem sumarblaðamaður hjá Morgunblaðinu. Mér mætti hlýlegt viðmót samstarfsmanna sem ánægjulegt var að hitta á ný.

Ég fékk sömu tölvu og í fyrra og þar var enn fyrir hendi íslenskur talgervill svo að ekki þurfti að hafa áhyggjur af því máli.

Þegar uppsetningu skjálesara var lokið var haldið í matsal Morgunblaðsins þar sem Styrmir Gunnarsson, ritstjóri, lét af störfum og afhenti Ólafi Þ. Stephensen ritstjórn Morgunblaðsins.

Styrmir flutti snjalla ræðu þar sem hann fór í stórum dráttum yfir feril sinn sem ritstjóra. Hann gerði upp af hreinskilni feril sinn og skoðanir.

Eftir að þeir Styrmir og Matthías losuðu Morgunblaðið undan flokksviðjum má segja að grundvöllurinn undir pólitískum daglböðum á Íslandi hafi brostið. Umræðan á síðum blaðanna hefur gerbreyst og er nú þannig að vart vill nokkur kalla yfir sig fyrri tíma.

Flestir hljóta að vera sammála um að í gær hafi orðið kaflaskil í íslenskri fjölmiðlun. Það er ánægjulegt að fá að takast á við þær áskoranir sem bíða blaðamanna undir stjórn nýs ritstjóra. En um leið vil ég þakka Styrmi fyrir ánægjulegt og gefandi samstarf og fyrir þann mikla stuðning semhann veitti samtökum eins og Öryrkjabandalagi Íslands á örlagatímum.