Litla hagyrðingamótið 9. janúar síðastliðinn

Á fundum Kvæðamannafélagsins Iðunnar er jafnan háð lítið hagyrðingamót. Ég útvarpaði síðasta móti í þættinum Vítt og breitt í dag. Pistillinn vakti nokkra athygli og er hann því birtur hér. Njótið vel.

Slanguryrðið "fokking"

Ég hef stundum heyrt í nýjum íslenskum útvarpsleikritum og séð á blogginu orðið "Fokking". Ég hélt að þetta væri kvenkynsorð eins og blekking og væri komið úr sjómannamáli. Ég man eftir því að Páll Kristinn Maríusson, skipstjórinn sem sigldi síðast Skaftfellingi, vatt stundum upp fokkuna og þótti eiginkonu hans, þegar öll segl voru höfð uppi, sem hann skafti væri eins og engill.

Fokka er framsegl á skipi og skil ég ekki hvernig þetta orð er notað eða hvað það þýðir í munni nútímafólks. Ég skynja þó að þetta er eitthvert skammaryrði og finnst miður að tilvitnun í seglabúnað skipa skuli hafa hlotið slík örlög.

Annað orð heyrði ég fyrir skömmu notað þannig að ég hafði ekki hugmynd um hvað það þýddi. Einhverjum var boðið eitthvað og svaraði hann: "Nei, þakka þér fyrir. Ætli ég passi það ekki."

Sllanguryrðið "passa" hefur verið notað til dæmis í merkingunni að gæta barna og áttaði ég mig alls ekki á samhenginu. Ég mundi þó eftir orðinu "pass" sem er notað í spilum þegar menn geta ekki lagt út spil.

Ég spurði því hvað sá sem ætlaði að passa það ætti við. Hann ætlaði þá að láta það eiga sig.

Svona hverfa góð og gild orð og orðtök fyrir skringimælgi afbakaðra, erlendra orða. Njörður P. Njarðvík sér um þáttinn Ársól í Ríkisútvarpinu á sunnudagsmorgnum og er hann endurtekinn á mánudagskvöldum kl. 22:15. Í síðasta þætti fjallaði hann um orðin og örlög þeirra og hvernig íslensk tunga verði fátækari eftir því sem tímar líða fram..

Turninn og Túnahverfið

Á mbl.is kemur fram í dag að Hjálmar Sveinsson, útvarpsmaður, vinni nú að bók um skipulagsslysið í Túnunum í Reykjavík þar sem byggingaverktökum tókst að telja borgaryfirvöld á að breyta gildandi deiluskipulagi og samþykkja turna sem gerbreyttu ásýnd svæðisins. Voru þeir fyrst og fremst hugsaðir fyrir fjármálafyrirtæki og þarna átti að vera torg samkvæmd ítalskri fyrirmynd þar sem sumur eru hlý.

Hjálmar fjallaði um mál þetta í þætti sínum, Krossgötum, sem er á dagskrá rásar 1. Hann ræddi þar við íbúa Túnahverfisins og rakti hvernig reynt var að flæma þá úr húsum sínum með því að kaupa upp húseignir á yfirverði og láta þær grotna niður. Einnig afhjúpaði hann hvernig fulltrúar Sjálfstæðisflokksins í borgarstjórn og reyndar Framsóknarflokksins líka, svikust aftan að íbúunum. Þáverandi skipulagsnefndarformaður fór undan Hjálmari í flæmingi og sagði ekki ætíð satt og rétt frá.

Turninn, sem nú er hálfkaraður, er glöggt dæmi um það hvernig byggingaferktakar ráku skipulagsyfirvöld á undan sér með því að beita pólitískum samböndum og þrýstingi. Á Seltjarnarnesi var þetta reynt en sem betur fer var ásælni þeirra hrundið.

Hjálmar Sveinsson á mikinn heiður skilinn fyrir rannsóknir sínar á þessu máli og Ríkisútvarpið fyrir að veita honum aðstöðu til þess að fræða almenning.

Sagt er að Eikt, sem á turninn og leigir Reykjavíkurborg húsnæði með gengistengdri leigu, lifi nú á borginni. Væri ég ekki jafngóðlyndur og raun ber vitni héldi ég því hiklaust fram að Skrattinn sæi um sína.

Nýr bankastjóri sameinaðs Glitnis og Kaupþings

Gengið hefur fjöllunum hærra að áhugi sé á að sameina Kaupþing og Glitni. Þá hefur flogið fyrir að nýr bankastjóri bankans verði Bjarni Ármannsson. Vafalaust þykir hann hafa náð frábærum árangri og sýnt um leið iðrun.

Fjöldamorðingjar og hryðjuverkamenn í skjóli Bandaríkjanna

Nú er orðið deginum ljósara hvert eðli ísraelskra stjórnvalda er.

Nauðsynlegt er að einangra Ísraelsríki á alþjóðavettvangi og hefja tafarlaust þyngstu refsiaðgerðir gegn því. Norðurlöndin ættu að hafa forystu um þetta mál og slíta stjórnmálasambandi við þau hryðjuverkastjórnvöld sem þar ráða ríkjum um þessar mundir.

Hugmyndir um stjórnlagaþing

Framsóknarmenn hyggjast nú um helgina ræða hugmyndir sínar um að kosið verði til stjórnlagaþings.

Það er íslenskum stjórnmálamönnum til vansa hvernig staðið hefur verið að endurskoðun stjórnarskrárinnar að undanförnu. Þrátt fyrir nokkurt starf komst stjórnarskrárnefndin, sem Jón Kristjánsson, veitti forystu, lítt áfram og síðan hafa orðið þær breytingar hér á landi að fáum dylst lengur sú nauðsyn að endurskoða ýmis ákvæði stjórnarskrárinnar rækilega.

Þær tillögur, sem Jón Sigurðsson, fyrrum framsóknarformaður, reyndi að berja saman fyrir tveimur árum voru dauðadæmdar enda hafa þær sjálfsagt verið bornar fram til þess að bjarga heiðri flokksins. Stjórnlagaþing, þar sem málin væru reifuð og skoðuð vandlega, ætti að geta orðið grundvöllur þess að Íslendingar eignuðust nýja stjórnarskrá þar sem ný lýðræðisgildi og mannréttindi yrðu höfð í öndvegi.