Einn kemur þá annar fer

Ekki fækkar í Framsóknarflokknum þótt Bjarni Harðarson hafi tekið þá skynsamlegu ákvörðun að hverfa þaðan. Guðmundur Steingrímsson mætti til leiks í gær og verður flokkurinn vafalítið heldur skemmtilegri á eftir.

Þá sem hafa lesið skrifin á þessum síðum rekur væntanlega minni til fréttar sem skrifuð var um væntanlegt framboð aðdáenda Guðna Ágústssonar. Nú hefur fyrsti naglinn verið rekinn í þá smíði.

Það er erfitt að stofna nýja flokka.Bjarni er harðduglegur maður og vinsæll Hver veit nema honum takist þetta. Þá mun Guðni Ágústsson væntanlega skipa heiðurssætið í Suðurkjördæmi.

Ég ræð Bjarna að læra að búa til örugga sendingarlista áður en hann hefst handa fyrir alvöru.:) Mun honum þá vel farnast.

Bjarni sagði sig úr Framsóknarflokknum

Glöggskyggni DV eða rógburður

Séra Gísli Kolbeins sagði einu sinni um góðan vin okkar beggja að hann hefðiverið góður af sjálfum sér. Taldi hann það betri lýsingu en að maðurinn hefði verið ánægður með sig og sína.

Ég treysti mér ekki til að hafa þessi orð séra Gísla um ritstjórn DV. Nú fer hún hamförum vegna fjármögnunar Árvakurs og þeirra björgunaraðgerða sem fjöldi manns hefur áhuga á. Þá er einnig rætt um föst skot Agnesar Bragadóttur í sunnudagsblaði Morgunblaðsins þegar hún segir söguna af viðtalinu sem aldrei birtist og látið að því liggja að um sé að ræða dulda gagnrýni á ritstjóra blaðsins.

Ritstjóri DV fer fögrum orðum um sjálfan sig og blað sitt í morgun og telur það vörð sannleikans í landinu. Þessi sami ritstjóri þorði þó ekki að taka þá áhættu að birta frétt sem hann taldi ógna framtíð blaðsins. Hann hefur heldur ekki þorað að greina frá því hverjir ógnuðu honum.

Ég mæli með því í ljósi reynslunnar að ritstjórar DV fremji nokkra sjálfsgagnrýni áður en þeir ákveða að skrifa annan lofleiðara um blaðið og sjálfa sig. Þeir geta t.d. ekki lengur krafist afsagnar nokkurs ráðherra vegna skorts á ábyrgð því að þá skortir báða það sem þarf til þess að axla einhverja ábyrgð

Samkvæmt nýbirtri fjölmiðlakönnum er áberandi hve fáir treysta fréttum DV. Tapið af útgáfu DV er sjálfsagt ekki meira en orðið er vegna þess að efnistök blaðsins eru rýr og ekki tök á að efna til mikils kostnaðar.

Sannleikurinn er nefnilega sá að Ísland er of fámennt fyrir marga og stóra fjölmiða. Margir tækju efti því og yrðu fyrir skaða hyrfi Morgunblaðið af þessum markaði. Fáir tækju hins vegar eftir því eða yrðu fyrir miklu tjóni þótt DV hyrfi þaðan.

Haustið 1978 sagði ég Dagblaðinu upp vegna skrýlslegs fréttaflutnings. Ég myndi einnig gera það nú.

Svo uppsker hver sem hann sáir.

Mælt gegn einhliða upptöku Evrunnar

Í dag birta 32 hagfræðingar athyglisverða grein í Morgunblaðinu þar sem þeir mæla gegn einhliða upptöku Evrunnar. Benda þeir á að slík aðgerð yrði engin lausn á fjárhags- eða efnahagsvanda Íslendinga. Í lok greinar sinnar draga þeir saman nokkur atriði:

Einhliða upptaka evru, samanburður við núverandi ástand

Kostir:

* Innlendur gjaldmiðill öðlast sama stöðugleika og evra gagnvart öðrum erlendum gjaldmiðlum

*Vextir munu væntanlega lækka í átt til vaxta á evrusvæðinu, en verulegt áhættuálag verður áfram á vöxtum hér á landi vegna vantrausts á íslenskan efnahag

*Viðskiptakostnaður minnkar

Gallar:

* Sjálfstæði peningastefnu glatast án þess að öryggi fjármálakerfisins sé tryggt

*Myntsláttuhagnaður tapast (áætl. 2-5 ma.kr. á ári)

*Upphaflegur aukakostnaður vegna kaupa á evrum til að setja í umferð (125 ma.kr.)

*Íslenskir bankar hafa ekki seðlabanka til stuðnings í lausafjárvanda

*Fjármagnsflótti getur sett ríkið í alvarlegan greiðsluvanda

Hvaða vandamál leysast ekki:

* Verðbólga færist ekki sjálfkrafa að verðbólgu í Evrópu

*Aukið seðlamagn í kjölfar þrýstings t.d. vegna lausafjárskorts bankanna gæti leitt til aukinnar verðbólgu

*Útganga erlendra fjárfesta af innlendum peningamarkaði og skuldabréfamarkaði kallar áfram á nýtt erlent lánsfé

*Fjármagnsflótti Íslendinga kallar áfram á nýtt erlent lánsfé

*Fjármagnsflótti getur sett bankakerfið í lausafjárvanda (og þar með á endanum í eiginfjárvanda). Ríkið getur þurft að koma til aðstoðar

*Einhliða upptaka evrunnar auðveldar ekki íslenskum einkaaðilum eða opinberum aðilum aðgang að erlendu lánsfé a.m.k. ekki litið til nokkurra næstu ára.