Athugasemdir við bloggfærslur

Yfirleitt eru athugasemdir við bloggfærslur á þessum síðum málefnalegar. Þó kemur fyrir að menn noti þvílík gífuryrði að ég sem ritstjóri síðunnar og ábyrgðarmaður uni þeim ekki. flestir sem þannig haga sér koma yfirleitt fram undir dulnefnum.

Því hef ég ákveðið að hér eftir verði athugasemdir einungis birtar eftir að ég hef lesið þær. Ekki verður amast við hvers kyns gagnrýni en klámfengið eða sóðalegt orðbragð verður ekki látið sjást.

Dómsmálaráðherra og almenningur

Björn Bjarnason hefur aldrei legið á skoðunum sínum og honum hefur iðulega verið hrósað fyrir skipulagshæfileika. Pistlar hans bera vott um yfirburða þekkingu á ýmsum málum og hann virðist drjúgur til verka.

Þegar kemur að samræðum við almenning í landinu virðist hann þó skorta áræði. Það er afar einkennilegt að hann skuli ekki þiggja boð um að ræða við fólkið um það sem brennur á því. Þar virðist Björn bresta kjarkinn.

Engin svartsýni

Kl. 9:30 hefst fjórða atvinnuleysisár mitt. Þótt syrt hafi í álinn á íslenskum vinnumarkaði hef ég ekki fyllst svartsýni. Ég trúi því enn að úr rætist.

Þessi þrjú ár hafa um margt verið lærdómsrík. Ég hef á þessum tíma fundið fyrir vaxandi einangrun sem erfitt er að brjótast út úr. Að undanförnu hef ég sótt um tvö störf og eitt embætti. Verði ég ráðinn í eitthvert þeirra telst það mikill sigur. Fari svo að mér verði alls staðar hafnað þarf ég að hugsa minn gang að nýju og hefja markvissar aðgerðir til þess að rjúfa þessa þrúgandi einangrun.

Þegar ég lít yfir farinn veg kemur í ljós að ég hef að flestu leyti verið gæfumaður og staðan er svo sem ekki verri en gengur og gerist. Ég er kvæntur góðri konu, á einstaka fjölskyldu sem stendur mér þétt að bakiog fleira mætti telja. Það er því enginn ástæða til að missa móðinn heldur segja eins og Stefán afi minn í Skuld, þegar honum var neitað um far út í Vestmannaeyjar árið 1893: "Eg skal."