Siðleysi einkavæðingarsinna

Síðan íslensk stjórnvöld tóku að greiða laun kennara við einkarekna grunnskóla, framhaldsskóla og háskóla hafa hinir einkareknu skólar skorið sig úr að því leyti að launakostnaður þeirra hefur verið greiddur af hinu opinbera og skólagjöld þeirra hafa verið mun hærri en ríkisreknu skólanna. Þannig hafa þessir skólar haft úr talsvert meira fé að moða en hinir opinberu skólar.

Vafasamt er að sumir einkareknu skólanna yrðu kallaðir háskólar nema hér á landi. Þá er vafasamt að annað eins fyrirkomulag tíðkist víða um lönd hjá einkavæðingarsinnum. Í Bandaríkjunum er mér tjáð að einkareknir skólar njóti ekki opinberra styrkja heldur verði þeir að spjara sig með öðrumhætti - styrkjum frá einkafyrirtækjum og skólagjöldum. Í þeirri fjárþröng, sem Íslendingar eru í, eru margir furðu lostnir yfir því að framlög til einkarekinna skóla séu ekki skorin niður. Látum þá sanna sig og sjáum hvernig fer.

Ólöglegt að fella niður skuldir

Athugasemdir

[Gísli Sigurður, 12.12.2010 kl. 23:31]

Sæll Arnþór.

Það hefur sannað sig svo ótal oft að græðgin vex með hverjum eyri, og af þeim aurum verður margur api.

Það er mjög skrýtið að hugsa til þess að á niðurskurðartímum sem þessum, þegar ríkið reynir að skera við hverja tá, að einkareknir skólar eins og Hraðbraut skuli geta látið slíkt magn peninga renna í vasa stjórnanda skólans án þess að upp skuli komast, eins og raun ber vitni.

Það er mjög áhugavert að sjá hvað ríkið sker niður á ólíklegustu stöðum á meðan peningum er ausið á aðra óþarfa staði.

[anna (IP-tala skráð) 13.12.2010 kl. 00:18]

Einkavæðing á Heilbrigðiskerfum, orku, og vatni, hefur að miklu leiti tekið yfir í Evrópu og allt hækkar og hækkar í verði, sem áður var ríkisrekið og innan græðgismarka. Við höfum vonandi vit á að halda þessum forréttindum í þjóðareign. þ.e.a.s. því sem eftir er.

[Ólafur Ingi Hrólfsson, 13.12.2010 kl. 09:46]

Er ekki verið að fella niður skuldir upp á hundruðir milljarða þessa mánuðina - m.a. hjá einkavini Sf Jóni Ásgeiri?  Eitthvert smáræði fékk Ólafur Ólafsson niðurfellt en heldur 2 fyrirtækjum ( risafyrirtækjum á okkar mælikvarða ).

Eru allir þessir gerningar ólöglegir?

Tek fram að ég ver ekki niðurfellingu skulda Hraðbrautar - þekki ekkert til þess máls en leiðist hrokinn í þeim sem hefur verið þar í forsvari. Eða er í forsvari.