Arnþór Helgason

Tækifæri sigmundar og Bjarna

Sáttatónn er í greinum Bjarna Benediktssonar og Sigmundar Davíðs Gunnlaugssonar í Morgunblaðinu í dag og er það vel. Hinn síðar nefndi leggur til myndun þjóðstjórnar um tiltekin verkefni. Bendir hann m.a. á að þá yrðu þingmenn eingöngu bundnir af sannfæringu sinni en ekki andlegum handjárnum stjórnmálaflokkana - þurfi með öðrum orðum ekki að spila í sama liði.

Þessi tillaga er góðra gjalda verð og fyllsta ástæða fyrir núverandi stjórnarflokka að ræða við stjórnarandstöðuna, a.m.k. Framsóknar- og Sjálfstæðisflokk. Stjórnin gæti þá sýnt þann þroska að gleyma því að tillagan kunni að vera sett fram þar sem þeir sigmundur Davíð og Bjarni þurfa á því að halda að sanna sig sem virkir stjórnmálaforingjar. Þess mætti þá vænta að ástæðulausu málþófi á Alþingi linnti og þingmenn gætu reynt aðrar aðferðir við afgreiðslu mála en þær sem þeir eru nú fastir í. Um leið væri hægt að losna við óhæfa ráðherra úr núverandi ríkisstórn.

Þá vekur athygli að Jóhanna Sigurðardóttir skyldi hafa ákveðið að rita áramótagrein sína í Morgunblaðið þrátt fyrir að ritstjóri blaðsins hafi hagað sér eins og götustrákur í skrifum sínum um hana og stjórn hennar og sýnir það félagslegan þroska forsætisráðherrans. Áreiðanlegar heimildir herma að skrif ritstjórans fari mjög fyrir brjóstið á ýmsum sem teljast til forystu Sjálfstæðisflokksins, en þeir telja a ritstjórinn sé fastur í vef hefndarþorsta og beiskju og skaði beinlínis hagsmuni flokksins og Morgunblaðsins með skrifum sínum.

Lesendum þessara síðna er árnað heilla á nýju ári. Sú ósk er hér með sett fram að menn verði málefnalegri í skrifum en verið hefur og fleira verði um jákvæð skrif og fréttir en að undanförnu.