Dagar myrkurs á Austurlandi

Í gær brugðum við undir okkur betri fætinum og héldum austur á Egilsstaði. Með okkur hjónum var í för Hringur Árnason, grunnskólanemi, sonarsonur Elínar, en þau Hringur og Elín eiga nú bæði vetrarfrí. Ætlunin var og er að njóta daga myrkurs á Austurlandi en þar er margt í boði handa börnum og fullorðnum.
Eftir að hafa komið okkur fyrir á Hótel Héraði, þar sem Hringur fékk einkaherbergi, samtengt okkar, var haldið í skoðunarferð um þorpið og síðan farið að njóta pizzuhlaðborðs með rjómaís í eftirrétt. Var þar margt um manninn á öllum aldri.
Að máltíð lokinni fórum við á dagskrá um Sigfús Sigfússon, þjóðsagnasafnara, prýðisvel gerða dagskrá.
Í dag ætlum við á Seyðisfjörð og e.t.v. víðar að kynna okkur mannlífið og látum væntanlega sjá okkur í afturgöngunni þar í kaupstaðnum í kvöld.

Athugasemdir

[Ingi Heiðmar Jónsson (IP-tala skráð) 6.11.2006 kl. 09:12]

Góðan dag segi ég á Selfossi og þakka fyrir mynd af myrkri og birtu helgarinnar sem þú gafst mér af Austurlandi. Hér í Flóanum var haldið smástökukaffi eftir messu og þangað komu nokkrir, sem fengu þar fréttir af hagyrðingamótinu á Hólmavík og þrír keyptu Axarsköft Jóa í Stapa.

                                                        Góðar stundir