Ríkisstjórnin hindrar upplýsta umræðu

Enn versnar hlutur ríkisstjórnarinnar. Heiðar Örn Sigurfinnsson, fréttamaður Ríkisútvarpsins, minnti á það í hádegisfréttum að ríkisstjórnin hefði ekki séð ástæðu til að greina þjóðinni frá því að Íslendingar hefðu fallist á gerðardóm í Icesave-málinu og sagt sig síðan frá dómnum. Var flutt hljóðrit þar sem Geir Haarde lýsti því að fá þyrfti óhlutdrægan aðila til að dæma í málinu eða skjóta því í gerð. Hljóðritið var frá 7. nóvember.

Geir talaði þar eins og gerðardómurinn hefði aldrei komið til umræðu. Þar með sagði hann í raun ósatt.

Árni Mathiesen talaði við fréttamann útvarpsins í lélegum síma í stað þess að gefa sér tíma til að skýra málið öðruvísi en á hlaupum.

Það hefur vakið athygli að fjármálaráðherra er aldrei hleypt á blaðamannafundi ríkisstjórnarinnar og er eins og að hann sé einhvers konar peð í fjármálum ríkisins. Það hefur líka vakið athygli að það er sem ríkisstjórnin vilji koma í veg fyrir upplýsta umræðu í landinu með því að miðla sem minnstum upplýsingum til almennings.

Flestir sem fjalla um kreppuna þreifa sig áfram eins og sjáandi maður í niðamyrkri. Á meðan sitja ráðherrar og brosa af meðaumkun með lýðnum sem veit ekki neitt. Þeir sitja á upplýsingum eins og ormar á gulli.

Hver verður til að rjúfa þögn ráðherranna?

Athugasemdir

[Kristján G. Arngrímsson, 13.11.2008 kl. 16:05]

Rétt hjá þér, Arnþór.

Sennilega hafa ráðamenn ekki næga tilfinningu fyrir því að þeir hafi skyldum að gegna við almenning. Þeir virðast líta svo á, að þeir séu einhvernveginn á hærra plani en pöpullinn.

Sennilega er þetta ekki annað en angi af þeim þroskaskorti sem einkennir opinbera stjórnsýslu á Íslandi.

Kær kveðja.