Apple stórbætir aðgengi að framleiðslu fyrirtækisins

Apple Nano tónhlaðan er nú að mestu orðin aðgengileg blindu og sjóndöpru fólki. Þetta kemur fram í veftímariti Bandarísku blindrasamtakanna.

Þegar tónhlaðan er tengd við tölvu, t.d. pc-vél, geta menn valið þær raddir sem fylgja Windows-stýrikerfinu. Ekki er vitað til þess að íslenska sé enn í boði.

Um leið og tónlist er halað niður á Nanóinn fylgja með textaskrár með lýsingum á því sem halað hefur veriðniður. Það er því ekki um eiginlegan skjálesara að ræða eins og í farsímum. Er þetta gert til þess að nýta betur minni Nanósins.

Eftir að talið hefur verið sett upp eru flestar valmyndir aðgengilegar. Leikir, klukka, dagatal o.fl. eru þó ekki þar á meðal.

Þá er skjárinn á Nano4 mun betri þeim sem eru sjóndaprir. Hægt er að velja mun meiri litaskerpu en áður.

Lyklaborð Nanósins er eins konar hjól sem notað er til þess að stilla styrkinn og fara á milli valmynda. Flestum gengur vel að átta sig á virkni þess á skömmum tíma.

Apple hefur einnig stórbætt aðgengið að Itunes-forritinu. Á það einkum við um notendur Apple-tölva. Enn vantar talsvert á að pc-umhverfið sé orðið aðgengilegt en unnið er að lausnum.

Þeim sem hafa áhuga á að kynna sér nánar efni um Apple Nano 4 er bent á vefsíðuna

http://www.afb.org/aw/main.asp

Athugasemdir

[Jónas Egilsson, 24.1.2009 kl. 20:48]

Gott að heyra Arnþór.

Ekki veitir af því að koma til móts við sjónkerta einstaklinga - sem og reyndar fleiri hópa líka.

Sjálfur nota ég tónhlöðu, eins og þú nefnir þetta tæki, mjög mikið. Hlusta ég mikið á fréttir og fréttatengt efni nær eingöngu erlent efni. Því miður er ekki mikill skilningur íslenskra útvarpsstöðva á þessari tækni. A.m.k. hef ég ekki orðið var við það.

Fróðlegt væri að vita hvort íslenskar hljóðbækur verða fyrirsjáanlega aðgengilegar í gegnum iTunes eða tónhlöður. Reyndar gengur illa fyrir okkur litlu þjóð að hafa aðgengi að iTunes Store, nema þá því sem frítt er. Mér skilst að að við séum frekar lítil þjóð og að eitthvað standi þetta á samningum milli STEFS og Apple. Veist þú eitthvað um þetta?