Dýrðin, dýrðin!

Í gær gengum við hjónin kringum golfvöllinn á Seltjarnarnesi. Þetta var í ljósaskiptunum og Elín naut hinna margbreytilegu litbrigða sjávarins og brimsins sem var talsvert. Stynningskaldi var og beit kuldinn í kinnar og fingur þótt hitinn væri sagður 10 stig. Gegnum vindgnauðið heyrðum við einmana lófu syngja um dýrðina. Skyldi hún hafa vetursetu hér í vetur?

Eru blaðamennirnir að flýja sökkvandi skip?

Á vef DV birtist þessi frétt í dag:

Þrír stjörnublaðamenn hafa sagt upp störfum sínum á Morgunblaðinu og er búist við uppsögn þess fjórða. Þetta eru þeir blaðamenn sem hafa verið hvað mest áberandi í uppljóstrunum á síðustu mánuðum. Meðal þeirra er Björgvin Guðmundsson, ritstjóri viðskiptafrétta.

Þá hefur Þórður Snær Júlíusson viðskiptablaðamaður einnig sagt upp. Sá þriðji er Magnús Halldórsson, blaðamaður í almennum fréttum.

Þá mun Þorbjörn Þórðarson viðskiptablaðamaður einnig vera á förum. Þrír fyrrnefndur blaðamennirnir munu færa sig yfir á Viðskiptablaðið sem Haraldur Johannesenm, ritstjóri Morgunblaðsins, hefur selt hlut sinn í til

fjárfesta. Heimildir DV herma að Björgvin verði í stjórnunarstöðu á blaðinu.

Allir munu þeir hafa verið ósáttir við uppsögn Ólafs Stephensens og ráðningu nýrra ritstjóra og hætta þeir störfum á næstu dögum.

Blaðamennirnir fjórir hafa vakið athygli fyrir beitta, hlutlausa og vandaða umfjöllun um mál tengd hruninu. Ekki liggur fyrir hvernig Morgunblaðið ætlar að fylla það skarð sem myndast við brotthvarf þeirra.

Fólk í fjölmiðlaheiminum veltir nú vöngum yfir því sem gerist á Morgunblaðinu. Kunnur fræðimaður á þessu sviði neri höfundi þessa bloggs upp úr því að sveitungi hans, Guðbjörg Matthíasdóttir, væri ein af eigendum blaðsins og bæri ábyrgð á því að Davíð Oddsson hefði verið ráðinn ritstjóri. Eigendurnir, sem væru einsleitur hópur, hefðu haldið að þeir gætu komið sér upp hagsmunagæslublaði og snjallt væri að ráða Davíð sem ritstjóra; hann væri gáfaður og ritfær.

“en Davíð dragnast með fortíð sem hann ætlar ekki að losna við,” sagði fræðimaðurinn. “Hann er í raun trúður sem tekst, ef heldur sem horfir, að eyðileggja blaðið og missa þá litlu æru sem hann á eftir.”

Nú bíða menn næstu könnunar á lestri blaðanna og kemur þá í ljós hver árangurinn af ráðningu ritstjóranna hefur orðið.

Enn eitt áhyggjuefnið bættist svo við í kvöld, samstarf Skjás 1 og Morgunblaðsins. Telja ýmsir að þar sé verið að kasta fjármunum á glæ og undrast þetta tiltæki á meðan fjármál blaðsins eru í raun í uppnámi.

Stórtíðindi

Sagan gengur í hring. Íslandsbanki var stofnaður árið 1904 og var ef ég man rétt í eigu danskra fjárfesta. Talsverðar deilur urðu um stofnun hans enda töldu margir hann stofnaðan til höfuðs Landsbankanum. Íslandsbanki varð síðan gjaldþrota í aðdraganda kreppunnar árið 1929 og herma heimildir að það hafi að ýmsu leyti verið Landsbankamönnum sársaukalaust. Landsbankinn var þá einnig seðlabanki Íslands og hafði þá eins og í fyrra enga burði til þess að bjarga bankanum.

Öðru hverju undanfarna áratugi hafa komið fram hugmyndir um að laða hingað erlent fjármagn til bankanna. Nú þegar svo virðist sem Íslandsbanki lendi að mestu í höndum erlendra kröfueigenda má búast við að þeir reyni hvað þeir geta til þess að endurheimta fjárframlag sitt. Það getur skipt sköpum í íslensku efnahagslífi.

Til hamingju, Ísland.

Íslandsbanki í erlendar hendur

Ásættanlegur viðræðugrundvöllur

Ýmsum býður í grun að ein af ástæðum þess að rússar vilja ekki veita Íslendingum lán sé vantraust þeirra á íslenskri hagstjórn og skyldi þá engan undra.

tillögur Sjálfstæðisflokksins um ráðstafanir í ríkisfjármálum og leiðir til hagræðingar eru ásættanlegur viðræðugrundvöllur. Nú þegar sér vonandi til lands í Icesave-deilunni ættu að geta tekist sættir um að ræða þá leið sem Sjálfstæðisflokkurinn leggur til að farin verði. Í fljótu bragði virðist sem ýmislegt sé bitastætt í tillögunum. Þær höggva m.a. á krónubréfavandann svo fremi sem eigendur krónubréfanna samþykkja tilboðið. Það virðist illlskárra en að veðja áfram á handónýtan gjaldmiðil.

Þetta er skárri nálgun vandans en að reyna að koma Framsóknarflokknum úr þeirri snöru sem hann hefur brugðið um háls sér. Allt látæði frámsóknarmanna virðist benda til að þeir skilji hvorki né skynji þann vanda sem Icesave-málið hefur komið Íslendingum í. Sem dæmi má nefna að ekki fæst lán til að fjármagna Danice-strenginn og er það einungis forsmekkurinn af því sem gerist haldi stjórnarandstaðan áfram að draga lappirnar.

Vonandi fara nú stjórnarsinnar og stjórnarandstaðan að tala saman með vitrænum hætti. Nokkuð hefur skort á slíkt að undanförnu og á meðan brennur Ísland.

Rússar hafna láni til Íslands

Gönuhlaup framsóknanrmanna og óvinir launafólks

Guðmundur Gunnarsson fer mikinn á bloggi sínu á Eyjunni, http://gudmundur.eyjan.is. Þar lýsir hann þeirri skoðun að þeir Bjarni Benediktsson og Sigmundur Davíð Gunnlaugsson séu helstu óvinir launafólks um þessar mundir. Málum sé nú þannig komið að framsóknarmenn þurfi á hjálp að halda til þess að skera sig niður úr þeirri snöru sem þeir hafa sjálfir brugðið um háls sér. Svo virðist undirrituðum sem ritstjóri Morgunblaðsins hafi nú þegar brugðist við kallinu, samanber leiðara blaðsins í gær.

Fleiri hafa fjallað um Noregsferð Framsóknar. Þorbjörn Broddason, prófessor og fræðimaður í fjölmiðlun, fjallaði um Noregsferðina í þættinum Vítt og breitt í morgun og vakti m.a. athygli á því hvernig fjölmiðlar hefðu kokgleypt þá frétt framsóknarmanna að Íslendingum gæti staðið til boða lán upp á allt að 100 milljjörðum norskra króna. "Þetta var sú upphæð sem þeir (framsóknarmennirnir) nefndu sjálfir", sagði Þorbjörn.

Þegar þeir Sigmundur Davíð og Höskuldur hafa reynt að verja gerðir sínar vegna Noregsfararinnar segjast þeir eingöngu hafa rættum lánalínur og aldrei nefnt þessa háu upphæð. En það var fyrst og fremst þessi tala sem fjölmiðlar ginu við.

Þorbjörn spurði í morgun í umboði hverra framsóknarmennirnir hefðu farið til Noregs annarra en sjálfra sín.

Atvinnuauglýsingar ekki lengur aðgengilegar á mbl.is

Í kvöld sendi ég eftirfarandi bréf til auglýsingadeildar Morgunblaðsins:

Ágæti viðtakandi.

Ég hef meira og minna verið í atvinuleit undanfarin ár. Ég var svo heppinn að fá starf sem sumarstarfsmaður á Morgunblaðinu sumrin 2007 og 2008 og var það dýrmæt starfsreynsla.

Morgunblaðið nýttist mér framan af sem dýrmæt uppspretta við atvinnuleit. Nú bregður hins vegar svo við að einungis eru birtar myndir af auglýsingum á mbl.is. Reynist því þeim, sem eru blindir eða sjónskertir og nota skjálesara ókleift að lesa auglýsingarnar.

Vonandi verður þetta fært í fyrra horf þannig að texti birtist með myndunum.

Virðingarfyllst,

<Þ

fv. formaður og framkvæmdastjóri Öryrkjabandalags Íslands

Hefndarþorsti leiðarahöfundar

Það tekur á að lesa suma leiðara Morgunblaðsins. Þeir einkennast af reiði, biturð, hálfkveðnum vísum, dylgjum og uppnefnum.

Fjallað er m.a. um leyniskjöl sem ekki hafa verið birt en leiðarahöfundur virðist vita af og jafnvel hafa séð. Hvers vegna birtir blaðið þau ekki? Þá heldur leiðarahöfundur hlífiskildi yfir Framsóknarflokknum um þessar mundir þrátt fyrir aumkunnarverðar tilraunir formannsins til þess að skapa sér sérstöðu í stjórnmálum. Virðist sú skjaldborg leiðarahöfundarins mótast einkum af andúð á forsætisráðherranum.

rætt er um sérpöntuð álit frá Seðlabankanum og seðlabankastjóra Jóhönnu. Hverjum skyldu fyrri seðlabankastjórar hafa þjónað?

Sérálit, sem stjórnvöld panta, hafa verið á milli tannanna á fólki hér á landi undanfarna áratugi. Einatt var haft á orði að ríkisstjórnir þær, sem sátu á árunum 1991-2007 hefðu pantað sérálit sem styddu stefnu stjórnvalda hverju sinni. Sögur gengu jafnvel um að álit stofnana, sem var þáverandi forsætisráðherra ekki þóknanlegt, hefði orðið til þess að stofnunin var lögð niður og þannig slakað á eftirliti með hagstjórninni.

Þótt leiðarahöfundar Morgunblaðsins hafi einatt sitthvað til síns máls hlýtur það að verða hættulegt orðstír blaðsins þegar þeir leiðast út í greinaskrif sem mótast af biturð í garð þeirra sem bundu enda á valdatíð þeirra. Fjöldi fólks er farinn að hafa á orði að leiðaraskrifin einkennist nú af geðvonsku eins og stjórnarhættir virtusg einatt gera á umræddu tímabili.

Menn skyldu aldrei ráða sig til starfa til þess að leita hefnda.

Góður orðstír

Áður en falast er eftir láni hlýtur að þurfa að kanna jarðvegin og það gerði Jóhanna Sigurðardóttir svikalaust.

Það má einnig túlka orð norska forsætisráðherrans sem svo að Norðmenn geti hugsað sér að aðstoða Íslendinga enn frekar standi Íslendingar við skuldbindingarnar í Icesve-málinu.

Naður nokkur ónefndur hafði samband við bróður sinn í Noregi og lýsti hrifningu sinni yfir því að Per Olav Luddteigen vildi hjálpa Íslendingum. Bróðirinn sagði að úr því að Per Olav hefði frumkvæði í málinu væri eins víst að ekkert yrði af neinu láni. Per Olav væri nefnilega jafnhugmyndaríkur og Ástþór Magnússon og hugmyndir hans virðast yfirleitt falla í fremur grýtta jörð hjá íslenskum stjórnvöldum.

Það er sárt að horfa upp á skömm Framsóknarflokksins í þessu máli og ekki bætir ritstjóri Morgunblaðsins hlut blaðsins með leiðaranum í dag.

Kallaði á neikvæð viðbrögð

Lóa á vappi við Ægisíðuna

Í morgun leiddum við Elín Orminn bláa úr hýði sínu í bílskúrnum, en þar hefur hann staðið óhreyfður frá því um miðjan ágúst. Stigum við á bak og héldum sem leið lá upp í Ríkisútvarp. Þar skiluðum við af okkur bréfi, fórum því næst í Kringluna og þaðan heimleiðis.

Við sveigðum af Ægisíðunni inn á hjólreiðastíginn sem lagður var í vor og brunuðum í áttina að Faxaskjóli. Varð þá á vegi okkar lóga sem flpögraði um og vappaði. Skyldu hún eiga hér vetursetu?

Fleiri vorboðar voru á ferli. Við Faxaskjólið sló einn húseigandinn garðinn sinn af kappi og ilminn af nýslegnu grasi lagði á móti okkur.

Sjálfstæðisflokkurinn og Alþjóða gjaldeyrissjóðurinn

Þegar vandi steðjar verður einatt fátt um ráð. Menn skiptast á skoðunum og hreyta ónotum hver í annan í stað þess að taka saman höndum og vinna að lausn vandans.

Í slíku andrúmslofti fara ýmsar kenningar á kreik. Þessa dagana er því haldið fram að Alþjóða gjaldeyrissjóðurinn hyggist með öllum tiltækum ráðum tryggja frjálshyggjuöflunum yfirráðin á Íslandi. Það geri hann með því að sjá til þess að stofnað verði til stjórnarkreppu. Þess vegna hafi stjórn sjóðsins tengt Icesave-málið afgreiðslu endurreisnaráætlun Íslands.

Nú hefur formaður Sjálfstæðisflokksins að vísu viðrað þá skoðun að Íslendingar eigi að afþakka aðstoð sjóðsins. Það gerir ekkert til, segja talsmenn sjóðsins sem segja þau ósannindi að hér hafi ríkt stjórnarkreppa (sjálfsagt hefur fulltúinn talað af sér í ógáti). Með því að hleypa frjálshyggjunni að verði Íslendingar auðveldari í taumi. Jafnvel Bjarni Benediktsson, sem virðist fá ráð kunna, verði þá beygður.