Springur stjórnin í Pakistan?

Hér birtist hljóðpistill með vangaveltum um stjórnmálin í Pakistan.

Skrár tengdar þessari bloggfærslu:

• Hvað veldur deilum stjórnarflokkanna í Pakistan?

Bjarbvætturinn Birgir Finnsson

Ég hef getið þess áður á þessum síðum að ég sé í alþjóðlegum þróunarhópi Dolphin Access Computers, en fyrirtækið þróar hugbúnað handa blindu og sjónskertu fólki. Okkur berast í hverri viku eða nær vikulega nýjar tilraunaútgáfur skjálesarans Supernova sem okkur ber að prófa með ýmsum hætti.

Í gær kom nýjasta tilraunaútgáfan af Supernova 9,2 og setti ég hana upp. Ég ákvað að láta hana skrifa yfir fyrri útgáfu og vonaði að hún væri svo vel heppnuð að ég gæti notað hana án þess að hafa útgáfu 9,01 uppi við. En Adam var ekki lengi í Paradís.

Þegar til kom voru nokkrir hnökrar á útgáfunni sem ég þurfti að prófa rækilega. Má þar m.a. nefna að ekki tókst að fara á milli atriða í Moggablogginu með tab-lyklinum.

Þá hvarf talgervillinn sem er í Utility Manager sem fylgir með Windows XP. Það var slæmt því að ég þarf stundum að slökkva á blindrahugbúnaðinum, einkum ef ég nota fartölvuna til þess að hljóðrita og hef USB-hljóðkort tengt. Einnig nýtist þessi talgervill ef þarf að skipta um skjálesara.

Ég ákvað að ef til vill væri einfaldast að endurheimta þennan talgervil, sem talar eins og amerísk fyllibytta, með því að færa tölvustillingarnar fram um eina viku. Þá fyrst fór allt í vitleysu.

Supernova ræsti sig ekki upp eins og ég bjóst við. Það var þó enn verra að mér tókst ekki að hreinsa hugbúnaðinn allan út úr vélinni og varð að fá frænda minn, Birgi Finnsson, í heimsókn með ofurútþurrkunarforrit til þess að annast þetta.

Okkur tókst að setja upp skjálesarann og talgervilinn en rekillinn sem stjórnar aðgangi forritsins að talgervlum afritaðist ekki. Fangaráðið var því að setja upp tilraunaútgáfu að nýju og þá fylgdi aðgangsforritið með.

Þannig endaði þessi skemmtilegi dagur sem fór annars í að ganga í Heiðmörkinni með minni góðu eiginkonu, fara á umhverfissýninguna í Perlunni og synda síðan í sundlaug Seltirninga.

Ég er svangur

Í fyrradag vorum við hjónin hjá fjölskyldunni í Svöluásnum og nutum samvistanna í ríkum mæli. Skömmu eftir að okkur bar að garði gerði yngsti bróðirinn fólki ljóst að hann væri svangur og vildi mat sinn en engar refjar. Flutti hann þá ræðu á alþjóðlegu tungumáli. Þær Elfa Hrönn, móðir hans, og Elín amma sýsluðu um piltinn en afi stóð ráðalaus hjá og hljóðritaði. Hægt er að hlusta á brot úr ræðunni í skrá sem tengd er þessari færslu.

Skrár tengdar þessari bloggfærslu:

• Ræða um mat á 11. degi ævinnar

Sumardagurinn fyrsti

Gleðilegt sumar.

Við hjónakornin nutum lífsins í gær. Eftir hádegi tókum við Orminn bláa úr hýði sínu og hjóluðum út í Nauthólsvík. Þaðan héldum við í átt að Hótel Loftleiðum, út á miklubraut, yfir ýmsar brýr og yfir í Hljómskólagarðinn. Þræddum við síðan vestanverðan miðbæinn niður á Miðbakka þar sem vistvæn farartæki voru til sýnis.

Þaðan héldum við í Bónus í Örfirisey (vona að það sé rétt hjá mér) og beið ég hjá Orminum meðan Elín framkvæmdi innkaup. Þar hitti ég fullorðinn mann (eldri en mig. Er ég þá ekki enn orðinn fullorðinn?) sem var á rafknúnu tvíhjóli. Dáðumst við hvor af annars fáki og vorum sammála um að við værum mjög vistvænir, eða öllu heldur vistvæn, því að Elín kom og tók þátt í samræðunum. Hún stjórnar umhverfisverndarmálum heimilisins.

Eftir að við höfðum dokað við heima og sinnt þar ýmsu héldum við suður í Hafnarfjörð að hitta fjölskylduna. Sá litli dafnar vel og hefur góða lyst á orkuríkri móðurmjólkinni.

Sumardeginum fyrsta eru tengdar ljúfar minningar úr bernsku minni. Við feðgar fórum gjarnan niður að Skuld í Vestmannaeyjum þar sem Margrét amma mín bjó ásamt Magnúsi Þ. Jakobssyni, en hann var heimilismaður hennar og þeirra hjóna um áratuga skeið. Maggi í Skuld, eins og hann var jafnan kallaður, hafði iðulega ort vísu eða kvæði í tilefni dagsins, en hann var einn hinna góðu alþýðuskálda sem prýddu hvern kaupstað og þorp á síðustu öld. Ég set hér lítið sumarljóð sem hann orti sumarið 1969 og ég hljóðritaði þá í ágústmánuði.

Skrár tengdar þessari bloggfærslu:

• Sumarljóð eftir Magnús Þórberg Jakobsson

Hverju mótmæla bílstjórar?

Það er löngu orðið ljóst að mótmæli bílstjóra hafa gengið út í öfgar. Óljóst er hverju þeir mótmæla og kröfur þeirra fálmkenndar.

Ríkisútvarpið ræddi í dag við ungan bílstjóra sem var greinilega kominn á vettvang til þess að mótmæla einhverju sem hann vissi ekki hvað væri. Þegar fjölmiðlar sýndu þessum atburðum jafnmikla athygli og raun ber vitni dreif að ýmiss konar óaldalýð sem jafnan er reiðubúinn í hvaða landi sem er til þess að hafa uppi ofbeldi og óeirðir.

Vonandi lærist bílstjórum að hnefarétturinn gildir ekki heldur hinar lýðræðislegu leiðir sem þjóðfélag okkar byggir á.

Samfylkingin veldur vonbrigðum

Í sjónvarpinu var greint frá því í gærkvöld að ríkisstjórnin hefði ákveðið að bætur almannatrygginga hækki ekki í samræmi við almennar hækkanir að undanförnu á launum.

Mér fannst eins og sama sagan endurtæki sig. Árið 1995 kipptu Sjálfstæðis-og Framsóknarflokkur bótunum úr sambandi við launavísitöluna og varð það til þess að kjör lífeeyrisþega drógust mjög aftur úr. Það var ekki fyrr en Öryrkjabandalagið setti stjórnmálaflokkunum stólinn fyrir dyrnar að nokkur leiðrétting fékkst á þessu. Framsóknarflokkurinn kenndi jafnan Sjálfstæðisflokknum um og sagðist engu fá um þokað í þessum málum. Ætlar nú Samfylkingin að fara eins að? Hvernig bregðast ÖBÍ og ASÍ við, eða samtök aldraðra? Á að láta hnefaréttinn ráða eins og flutningabílstjórar reyna nú eða verður þessu mótmælt með öðrum og virkari hætti?

Mér hefur að undanförnu fundist sem málefni fatlaðra eiigi vart upp á pallborðið hjá fjölmiðlum nema einhver ósköp gangi á. Ríkisútvarpið sá t.d. ekki ástæðu til þess í morgun að spyrja formann Samfylkingarinnar um þessi mál og fá skýr svör hjá henni. Reyndar var þetta viðtal allt í hálfgerðu skötulíki vegna þess að tveir ólíkir spyrlar önnuðust það og samspil þeirra ekki nógu vel samhæft. Það var til dæmis kjánalegt að spyrja um upptöku erendra gjaldmiðla hér á landi svo sem norsku krónunnar og furðulegt hvað Ingibjörg svaraði því þó vel miðað við spurninguna.

Ingibjörg komst hjá því að svara ýmsum spurningum sem brenna nú meira á þjóðinni en Öryggisráðið og Evrópusambandið. Hún slapp með öðrum orðum vel frá þessu viðtali vegna þess hvað spurningarnar voru að mörgu leyti ómarkvissar.

Hlustið á grasrótina

Hugmyndirnar koma frá fjöldanum, er haft eftir Mao formanni. Mér flugu þessi orð í hug þegar ég las Staksteina Morgunblaðsins í morgun. Þar fer höfundur hamförum gegn borgarstjórnarflokki Sjálfstæðisflokksins vegna REI-málsins.
Staksteinahöfundur ráðleggur fulltrúunum að leita til grasrótarinnar sem sé enn fyrir hendi enda þurfi pólitískir fulltrúar á því að halda að hlusta á kjósendur sína sem segi oft fátt en hafi ýmislegt til málanna að leggja.
Hvers vegna mega fyrirtæki eins og Orkuveita Reykjavíkur ekki lengur ráðast í þróunarverkefni eins og gert var á síðustu öld?
Hvers vegna á að setja REI á útsölu einmitt nú þegar gengi krónunnar hefur lækkað, erfitt er að útvega fjármagn og því hætt við að verð fyrirtækisins verði lágt?
Hvers vegna segja Sjálfstæðismenn í borgarstjórn Reykjavíkur ekki hreint út hverjum þeir ætli að hreppa þessa gómsætu köku sem REI er?
Íslands óhamingju verður allt að vopni, minnir mig að Skúli fógeti hafi sagt þegar hann frétti lát Jóns Eiríkssonar. Hið sama virðist nú eiga við um Sjálfstæðisflokkinn.

Nýfæddur afalingur

Árni, sonur Elínar, stoltur faðir þriggja drengja, sendi mér þessa mynd af sveininum sem fæddist afraranótt 15. apríl.

Skrár tengdar þessari bloggfærslu:

• Nýfæddur afalingur, sonur stoltra foreldra, Árna og Elfu

Hvenær sameinaðist Nepal Kínverska alþýðulýðveldinu

Tíbetheimskan í mörgum Íslendingum og Bandaríkjamönnum ríður vart við einteyming þessa dagana. Látum Íslendinga liggja á milli hluta í bili en snúum okkur að Bandaríkjamönnum.

Um daginn birtist athyglisvert viðtal við talsmann (kann illa við orðið formælandi) forseta Bandaríkjanna. Spurði fréttamaðurinn, sem hagaði sér hér um bil jafnilla og Helgi Seljan yngri, hvort Bush ætlaði að vera viðstaddur setningu Ólympíuleikanna í Beijing. Talsmaðurinn sagði að Bush ætlaði á leikana. Gekk fréttamaðurinn hart að viðmælandanum til þess að reyna að fá hann til þess að segja að Bush ætlaði ekki að vera viðstaddur opnunina.

Talsmaðurinn ræddi þá um hvernig Bush teldi að fjalla ætti um málefni Nepals. Ekki heyrði ég að fréttamaðurinn reyndi að leiðrétta þetta.

Hvað ætli verði næst? Kannski Grímsey?

Ég stjórnar hér og ræður

Skömmu eftir miðnætti í gærkvöld hringdi Árni, sonur Elínar minnar og tilkynnti að senn þyrfti Elfa Hrönn að fara á fæðingardeildina því að hríðir væru byrjaðar. Elín amma dreif sig þegar af stað suður í Hafnarfjörð, en hún hafði tekið að sér að annast Birgi Þór, þriggja ára, sem senn yrði stóri bróðir.

Rétt eftir kl. hálf fimm í morgun fæddist síðan rúmlega 16 marka og 54 cm langur drengur, vel skapaður og fagurlimaður. Við Elín náðum í Birgi Þór í leikskólann seinnipartinn í dag og heimsóttum foreldrana og litla bróður á fæðingardeildina. Birgir stóri bróðir var afar hrifinn og hreykinn af stöðu sinni og fannst mikið til um bróður sinn. Það er hátíðleg stund að sitja við fæðingarbeð barns, heyra það amra örlítið og finna það í fangi sér, ylinn og ilminn af því, skynja hamingju foreldranna og njóta þess sjálfur að enn einu sinni færi skaparinn okkur eitt blessaða barnið.

Birgir Þór kom svo heim með okkur í fóstur og að hjálpa ömmu sinni að elda þorsk. Þau Elín fóru frekar snemma í háttinn og auðvitað í náttföt. Sá stutti sagði: Afi, farðu í náttfötin. Afi var ekki alveg reiðubúinn til þess og þá sagði sá stutti: Ég stjórnar hér og ræður.