Bæjarstjórinn hefur 1,7 milljónir á mánuði

Íbúi á Seltjarnarnesi hefur sent bæjarstjóra Seltirninga, bæjarfulltrúum og flestum ef ekki öllum fulltrúum í nefndum bæjarins bréf þar sem hann bendir á þá staðreynd að ekki takist að ráða fólk til starfa í skólaskjóli bæjarins. Segir íbúinn að fólk hrökkvi frá þegar launin eru nefnd, þau séu svo lág. Fyrir vikið fái 20 börn ekki inni í skólaskjólinu.

Í bréfinu segir íb´´úinn að hann telji nær að hlynna að börnum bæjarbúa en að greiða bæjarstjóra 1,7 milljónir kr á mánuði í laun. Segist hann ekki taka þá skýringu bæjarstjórans gilda að hann hafi stutt á rangan hnapp á tölvunni þegar hann taldi fram.

Heimildir úr bæjarstjórnarflokki Sjálfstæðisfokksins herma jafnframt að bæjarstjórinn sé með 55 óunna yfirvinnutíma á mánuði. Ekki er vitað hvort það er hluti ofurlaunanna, en samkvæmt bréfi Seltirningsins er Bæjarstjórinn á Seltjarnarnesi með hærri laun em borgarstjórinn í Reykjavík og forsætisráðherra.

Jóhanna Kristjónsdóttir - brúarsmiður millum tveggja menningarheima

Mér er farið sem mörgum öðrum að ég get ekki leynt aðdáun minni á sumu fólki. Ein þeirra sem ég hef dáðst að lengi er Jóhanna Kristjonsdóttir.

Fyrst held ég að ég hafi hitt Jóhönnu fyrir tæpum 30 árum þegar ég kom með fréttatilkynningu niður á Morgunblað. Um það leyti var minnst Mustava Kemals Ataturks og vissi einhver blaðamaðurinn ekki hver hann var. Jóhanna undraðist nokkuð fáfræði þessa unga fólks en gerði það með svo góðlegum hætti að engum særindum olli.

Undanfarin ár hefur Jóhanna kynnt sér hagi kvenna í íslömskum löndum og skrifað fjölda greina þar sem hún lýsir ýmsu sem hefur borið fyrir augu og eyru hennar við Miðjarðarhafið austanvert. Og um helgina safnaði hún rúmlega 20 milljónum til þess að aðstoða fátæk börn í Sanaa.

Margvísleg vandamál steðja að í Jemen og Sanaa er þar ekki undanskilin. Ef ég man rétt þá ríkir þar mikill vatnsskortur því að grunnvatnið er á þrotum og sumir telja að þessi borg, sem einhverjir telja þá elstu í heimi, eigi nú ekki mörg ár eftir, leiðarlokin nálgist óðfluga.

Jóhanna situr ekki með hendur í skauti. Mætti hún verða mönnum eins og mér, sem láta allt of lítið gott af sér leiða, góð fyrirmynd til betra lífs. Til hamingju með árangurinn.