Afleitt sumarljós

Það er vandi að velja skáldsögu sem gera skal leikgerð eftir. Í ævisögu Lárusar Pálssonar eftir Þorvald Kristinsson eru raktar nokkrar tilraunir til þess að gera úr skáldsögum leikrit og hver vandi Lárusi var á höndum þegar hann tók að sér slíka vinnu í samráði við höfunda.

Sá sem fól leikstjóra Sumarljóss að gera leikrit úr skáldsögu Jóns Kalmanns Stefánssonar hefur farið heldur villur vegar þegar hann ákvað að skrifað skyldi verk fyrir stóra sviðið í Þjóðleikhúsinu. Í skáldverki Jóns Kalmanns fer mörgum sögum fram og eru þær jafnvel ótengdar að öðru leyti en því að sama fólkið kemur fyrir í sumum sögunum. Það er því álíka fáránlegt að búa til leikgerð úr bókinni og að steypa Egils sögu, Laxdæla sögu, Njáls sögu, Grettis sögu og Heiðarvígasögu í eina leikgerð. Þó koma sömu persónur fyrir á nokkrum stöðum sagnanna. Sagt er að Jón Grunnvíkingur hafi ráðið fram úr þessu með því að endursegja Íslendingasögur í einni setningu: "Bændur flugust á.

Undirrituðum hundleiddist fyrir hlé og hefði vafalítið haldið út úr Þjóðleikhúsinu heim á leið hefði hann átt þess kost. En ákveðið var að þrauka og var seinni hlutinn örlitlu skárri enda voru þá sögurnar færri og samfelldari.

Ástæða er til að hvetja lesendur þessa bloggs til að lesa skáldverkið "Sumarljós og senn kemur nóttin" en hugsa sig þrisvar um áður en þeir eyða tíma sínum í leikverkið.

Flýgur fiskisagan um íslensku leynilögregluna og heigulshátt grímuklæddra mótmælenda

Stefanía Óskarsdóttir birtir í Lesbók Morgunblaðsins í dag grein um fréttamat fjölmiðla. Telur hún nokkuð skorta á vandvirkni helstu fjölmiðla landsins, Ríkisútvarpsins og Morgunblaðsins, þegar fréttir af ríkisstjórnarsamstarfi eru annars vegar. Vera má að réttlætiskennd þessara fjölmiðla sé orðin slík að þrá starfsmanna eftir að ríkisstjórnin sýni ábyrgð sé farin að bera fréttamatið ofurliði.

Um þessar mundir fer eins og eldur í sinu sagan um að lögreglan (eða íslenska leynilögreglan) hafi komið flugumönnum inn í raðir grímuklæddra mótmælenda og sé þetta m.a. gert til þess að draga broddinn úr aðgerðum þeirra. Vitnast hefur að mikill hluti almennings hefur andúð á ofbeldi grímumanna og þeim heigulshætti að skýla sér bak við dulargervi til þess að þekkjast ekki.

Vilja Íslendingar frumkvæði þeirra sem þora ekki að horfast í augu við sjálfa sig og eigin gerðir?

Umræða byggð á staðreyndum

Í Morgunblaðinu birtast í dag nokkrar greinar um Evrópusambandið. Er þar m.a. vikið að dvínandi lýðræðu innan sambandsins og einn greinarhöfunda rekur í stuttu máli þær hættur sem kunna að vera á átökum sem Evrópuríki flækjast í m.a. vegna flókinna tengsla við Ríki eins og Íran sem standa uppi í hárinu á Bandaríkjamönnum.

Þá hefur verið boðaður í blaðinu greinaflokkur um Evrópusambandið þar sem kostir og gallar þess verða raktir frá ýmsum hliðum. Þess er að vænta að leitað verði til ýmissa höfunda um greinaskrif og þar með verði Morgunblaðið annar íslenski fjölmiðillinn til þess að fjalla um sambandið á skömmum tíma, en stutt er síðan að Halldóra Friðjónsdóttir gerði nokkra þætti um Evrópusambandið fyrir Ríkisútvarpið.

Eftirtaldar upplýsingar hafa borist um væntanlega umfjöllun Morgunblaðsins og eru lesendurhvattir til að kynna sér þetta efni.

4. janúar - Evrópusambandið (Saga, hugsjónir, gildi)

5. janúar - EES-samningurinn.

6. janúar - Landbúnaður/Byggðastefna.

7. janúar - Gjaldmiðillinn.

8. janúar - Finnland.

9. janúar - Stjórnkerfi og stofnanir ESB

10. janúar - Utanríkis- og öryggismál

11. janúar - Sjávarútvegur

12. janúar - Mannréttindi.

13. janúar - Orka- og auðlindir.

14. janúar - Umhverfismál.

15. janúar - Umsóknarferlið.