Aldrað fólk fórni sér

Einatt hefur verið vitnað í aldraðan fjárfesti á þessum síðum, þegar eitthvað hefur verið á döfinni, sem skiptir máli í fjármálaheimi Íslendinga. Hefur honum einatt ratast satt orð á munn, enda maðurinn spámannlega vaxinn og margreyndur í lífsins ólgusjó.

Í dag háðum við kappræður um niðurskurðinn sem framinn er á Landspítalanum. Vorum við sammála um að viturlegt væri að leggja Sogn niður, enda húsnæðið niðurnítt og mun betri aðstaða á Kleppi, þótt hann sé í Reykjavík. Þykir okkur málflutningur þingmanna sunnlendinga með ólíkindum í því máli og minnum á að Sunnlendingar geta engu síður sótt vinnu suður en Reykvíkingar austur.

Ritstjóri síðunnar taldi að nú væri svo komið að ríkið yrði að skera við nögl framlög til svokallaðra einkarekinna háskóla í stað þess að taka sífellt af þeim, sem geta ekki borið hönd fyrir höfuð sér, sjúklingum og öldruðu fólki. Fjárfestirinn fullyrti þá að fara mætti sérkennilega leið til þess að forða líknardeildinni á Landakoti frá því að verða lögð niður. Setti hann upp eftirfarandi dæmi:

,,Maður nokkur, sem er rúmlega áttræður, er farinn að heilsu og þykir erfitt að þreyja þorrann. Nafn hans verður ekki nefnt hér, en hann er upphafsmaður tillögunnar. Lyfin, sem hann notar til þess að halda í sér líftórunni, kosta hið opinbera 6 milljónir á ári. Ef leitað yrði til 8-9 slíkra einstaklinga og þeim gefinn kostur á að fórna sér fyrir málstaðinn, er hann þess fullviss, að flestir brygðust vel við."

Að lokum kvaðst hinn aldraði fjárfestir veita samþykki sitt fyrir því að tillaga sjúklingsins yrði birt á þessum síðum.

Athugasemdir

[Erla Magna Alexandersdóttir, 14.10.2011 kl. 21:03]

vÆRI EKKI ÓDYRAST AÐ SETJA UPP GASKLEFA FYRIR ALDRAÐA- SEM VILJA FÓRNA SER ? HAFA ÞEIR EKKI ALTAF VERIÐ AÐ FÓRNA SER ' EN ÞAÐ ER MISSKILNINGUR AÐ FÓLK Á LIKNARDEILD SE ÞAR TIL AÐ VIÐHALDA LÍFINU- LÍKNARDEILD ER FYRIR DAUÐVONAFÓLK MEÐ KVALIR SEM REYNT ER AÐ SPORNA VIÐ MEÐAN ÞAÐ ER AÐ KVEÐJA ÞENNAN HEIM- Á ÞESS AÐ ÞJÁST. ÞÚ ÆTTIR AÐ KOMA ÞAR INN - MUNDIR ÞÚ VILJA HAFA FÁRSJÚKT FORELDRI ÆPANDI AF KVÖLUM HEIMA HJÁ ÞER ? FYNNDIST ÞER EKKI BETRA AÐ ÞAÐ GÆTI KVATT LÍFIÐ Í RÓ ?

[Arnþór Helgason, 14.10.2011 kl. 21:40]

Tillagan, sem aldraði fjárfestirinn bar fram, miðar að því að koma í veg fyrir að líknardeildin verði lögð niður. Þar er unnið virðingarvert mannúðar- og líknarstarf, sem hefur verið starfsfólki til hins mesta sóma.

[Sveinn Úlfarsson (IP-tala skráð) 15.10.2011 kl. 08:33]

Sæll frændi, nú er svo komið að það verður að slökkva á öndunarvél þessarar ríkisstjórnar. Ef hún veitir ekki til þess heimild sjálf verður að fá dómsúrskuð þjóðarinnar í kosningum til verksins.

Þegar þjóðin var rænd til fátæktar fyrir fram nefið á eftirlitsaðilum, ríkisstjórnum og Alþingi, lofaði þessi stjórn okkur að hún myndi rétta okkur vopn okkar aftur og fékk til þess styrk. Ekkert af þessu hefur staðist og nú á að taka það síðasta af þeim sem varnarlausastir eru þ.e að fá að deyja með smá virðingu.