Tölvuhremmingar

Heimilistölvan er komin á 7. ár og hefur staðið sig sæmilega vel. Hún var sett saman árið 2003 og er 3000 mhz með 80 gb diski.

Á föstudaginn var kveiktum við á vélinni en hún hafði þá ekki verið notuð í rúman sólarhring. Upp á skjáinn komu skilaboð þess efnis að vélin fyndi ekki tiltekna skrá og var ráðlagt að setja leyfisdiskinn í. Það dugði ekki.

Í morgun fór ég með vélina í viðgerð. Fundust á vélinni nokkrar veirur og svokallaðir Trojuhestar. Var það hreinsað. Þegar átti að lagfæra stýrikerfið vandaðist málið. Leyfisnúmerið vantaði. Fyrir tveimur árum keypti ég Windowsleyfi eftir að komið hafði í ljós að ég var með óleyfilega útgáfu. Mér er sagt að mér ætti að hafa borist tölvupóstur með leyfisnúmerinu. Ég hef ekki áttað mig á að vista hann annars staðar en í póstforritinu.

Stundum eru tölvumál óþarflega flókin og erfið viðureignar. Nú verða sjálfsagt góð ráð dýr.

Athugasemdir

[Finnur Bárðarson, 4.5.2009 kl. 16:37]

Hvers vegna í ósköpunum færðu þér ekki makka. Trójuhestur hvað er það ?

[Einar Steinsson, 4.5.2009 kl. 18:35]

Það sem líklegast er að gefi sig í tölvum eru þeir hlutir sem hreifast eins og harði diskurinn og viftur og þegar tölvur fara að koma með meldingar um að hinar og þessar skrár vanti er það oftast merki um að harði diskurinn sé að gefa sig enda er næstum sjö ár ágætur endingartími á honum. Þannig að ef ég væri þú myndi ég reyna að bjarga gögnum af diskinum á meðan hægt er að ná einhverju sambandi við hann og enduruppseta stýrikerfið á nýjum diski ef þú vilt á annað borð eyða fé í svona gamla vél.

Vél frá 2003 getur samt verið alveg nógu öflug sem netvél og ritvél ef ekki er farið í að gera einhverja vitleysu eins og að uppfæra stýrikerfið í Vista eða keyra einhver risaforrit af nýjustu kynslóð. Það er best að nota stýrikerfi og forrit af sömu kynslóð og vélin sjálf og þá getur hún þjónað þér í nokkur ár enn vandræðalaust og verið sæmilega hraðvirk.