Páskaeggin komin!

Við hjónin skruppum út í Hagkaup áðan og viti menn! Páskaeggin eru komin.

Ekki er ráð nema í tíma sé tekið, enda lengir nú daginn og óðum líður að páskum.

Íþróttaplágan skollin á

Þegar Íslendingar ætla sér að komast í undanúrslit á einhverju alþjóðamóti í íþróttum fer allt á annan endann og margir eru sannfærðir um að það muni takast.

Sjónvarpið breytir dagskrá sinni og þvingar upp á fólk hvers kyns kappleikjum.

Mbl.is á hrós fyrir að hafa ekki sett fréttina um tap Íslendinga fyrir Svíum inn á innlendar fréttir heldur íþróttasíðuna. Annars fór ég að athuga þetta eftir að eitt leirskáldið fékk þunglyndiskast og sagðist ekki geta ort eftir að hafa horft á Íslendinga læra handknattleik af Svíum.

Verður Starfsendurhæfingu Norðurlands lokað?

Í hádeginu greindi Ríkisútvarpið frá því að sennilega yrði Starfsendurhæfingu Norðurlands lokað vegna fjárskorts. Sagði Soffía Gísladóttir, stjórnarformaður, að ekki næðist í ráðamenn menntamálaráðuneytisins og taldi að í óefni horfði.

Fyrir rúmum 20 árum stóð ég í því ásamt öðru fólki að koma á fót starfsendurhæfingu, sem hlaut nafnið Starfsþjálfun fatlaðra, en er nú oftast kölluð Hringsjá. Upphaf þeirrar starfsemi var tilraun sem gerð var á vegum Öryrkjaganbalagsins, Rauðakrossins, Stjórnunarfélagsins og fleiri aðila sem tókst svo vel að ákveðið var að halda starfinu áfram en í breyttri mynd. Þá þvældi menntamálaráðuneytið málið svo að við lá að ekkert yrði af stofnuninni. Allt var það vegna þess að talað var um endurhæfingu í stað menntunar, en endurhæfingin er ekki á vegum ráðuneytis menntamála.

Við leituðum þá til félagsmálaráðuneytisins og þar gekk maður undir manns hönd að aðstoða okkur. Þá var Jóhanna félagsmálaráðherra eins og nú. Þessi starfsþjálfun starfar enn og hefur skilað ríkulegum árangri. Stofnunin hefur jafnan verið á ábyrgð Öryrkjabandalagsins.

Frá upphafi þessarar aldar hefur verið lagt kapp á að auka endurhæfingu hér á landi og fyrir nokkrum árum kom út skýrsla um þessi mál. Samt er eins og heldaryfirsýn hafi skort á þennan málaflokk og minna hefu orðið um efndir.

Í starfi nefndar sem vann að tillögum að aðgengi allra að þjóðfélaginu var lögð sérstök áhersla á endurhæfingu. Ég man ekki betur en að í stjórnarsáttmálanum sé einnig vikið að þessum málum.

Verði Starfsendurhæfingunni á Norðurlandi lokað verður það áfellisdómur yfir stjórnvöldum. Skorað er ´hér með á ráðherra mennta- og félagsmála að leita lausna á vanda stofnunarinnar. Það er ódýrara að endurhæfa fólk en setja það á lyf og iðjuleysi. Það ber einnig vott um mannvirðingu og mannvernd.

Talandi blóðsykurmælar

Í kvöld fékk ég bandarískt fréttabréf um rafrænt aðgengi. Þar er lýst nokkrum blóðsykurmælum sem tala ensku og eru algerlega aðgengilegir þeim sem eru sjónlausir.

Hér á markaðinum hafa verið stórir mælar frá Beier. Þeir eru seinvirkir og tekur um eina mínútu að fá niðurstöður mælinga. Blóðsykurmælarnir, sem lýst er í þessu fréttabréfi, eru mun minni, tífalt hraðvirkari og mun ódýrari. Mig minnir að talandi mælir kosti hér á landi um 80.000 kr, en mælarnir, sem fjallað er um og eru frá Ungverjalandi og Taiwan, kosta um 80 Bandaríkjadali.

Hér að neðan er slóðin á fréttabréfið. Vinsamlegast látið sjóndapra og sykursjúka vini ykkar vita. Ekki skaðar að gera innflytjendum aðvart.

http://www.afb.org/accessworld

Öryrkjabandalag Íslands

Á föstudaginn sagði formaður Öryrkjabandalags Íslands af sér og framkvæmdastjórinn ákvað einnig að hverfa úr starfi sínu.

Mér skilst á ýmsum stjórnarmönnum að ófriðlegt hafi verið á stjórnarfundum síðustu tvö ár og fyrrum formaður hafi í raun engu fengið áorkað enda stefnan óljós.

Ástæða uppsagnar formannsins er sögð vera ágreiningur um stefnu og hlutverk Hússjóðs Öryrkjabandalagsins. Í kjölfarið hefur m.a. framkvæmdastjóri samtaka, sem eiga aðild að Öryrkjabandalagi Íslands, verið fenginn til þess að níða skóinn af Hússjóði bandalagsins. Er það miður. Eitt atvik er notað til þess að kasta rýrð á störf sjóðsins og starfsfólk hans. Á hitt er ekki minnst að Hússjóður Öryrkjabandalagsins vinnur í nánu samstarfi við sveitarstjórnir víða um land og skortur á vinnuafli á vegum félagsþjónustunnar bitnar einnig á sjóðnum.

Ég harma innilega þá umræðu í fjölmiðlum sem fyrrum formaður reynir að standa fyrir. Greinargerð sú sem hann birti er honum ekki til neins sóma. Þar eru hlutirnir slitnir úr samhengi enda virðist hann skorta heildaryfirsýn yfir málefnin.

Afsögn formannsins er einungis efsti hluti ísjakans. Orsakirnar eru mun dýpri og alvarlegri.

Ég vona af heilum hug að nýr formaður beri gæfu til þess að leita leiða til þess að lækna þau sár sem hlotist hafa í orrahríð undanfarinna ára.

Jákvæð samskipti við bæjarstjórann á Seltjarnarnesi

Bréf mitt til bæjarstjórans um aðgengið að sundlauginni virðist hafa komið honum á óvart.

Samkvæmt upplýsingum frá forstöðumanni íþróttamiðstöðvarinnar er ráð fyrir gert að inngangurinn vestan við íþróttamiðstöðina verði ætlaður fólki í hjólastólum, svo og þeim sem koma gangandi þaðan og skólafólki. Jafngildir verði inngangarnir báðir taldir.

Ég hef lagt til að bærinn fái til þess bæra aðila til þess að taka út aðgengið að mannvirkjunum og metahvað hægt sé að gera til að bæta það. Hefur þeirri tillögu verið tekið vel. Ég fer þó ekki ofan af þeirri skoðun minni að heppilegra hefði verið að hafa betra aðgengi að inngangi þeim sem veit út að Suðurströnd.

Var byggingaregluger brotin á Seltjarnarnesi?

Við Jónmundur Guðmarsson höfum stundum skrifað hvor öðrum kærleiksrík bréf, en Jónmundur er bæjarstjóri vor Seltirninga og kallar mig iðulega Arnþór sinn.

Í kvöld sendi ég honum meðfylgjandibréf.

Sæll, Jónmundur minn, og gleðilegt ár.

Ég las í Morgunblaðinu um daginn að þið Geir Haarde hefðuð vígt nýju heilsuræktina sem Worldclass hefur byggja látið á Seltjarnarnesi. Fagnaði ég vígslunni með sjálfum mér.

Í kvöld skrapp ég að skoða mannvirkið. Brá mér þá í brún.

Innganginum að sundlauginni og þar með líkamsræktinnu hefur verið breytt. Nú liggja þrep upp að aðalinnganginum þar sem var skábraut áður.

Eitt sinn státuðu Seltirningar af því að sundlaugin væri ein sú aðgengilegasta á öllu landinu. Nú er ég hræddur um að svo sé ekki lengur.

Að ofanverðu virðist ekki heldur vera gert ráð fyrir aðgengi fatlaðra. Bílastæði virðast þar of fjærri.

Nútímahugsun gerir ráð fyrir að byggingar séu ætlaðar öllum en ekki sumum og þar með taldir aðalinngangar. Nú trúi ég ekki öðru en að á þessu verði ráðin bót. Langar mig að vita hvernig að slíkum framkvæmdum verði staðið.

Bestu kveðjur,

Arnþór Helgason

********************************************

Arnþór Helgason,

Tjarnarbóli 14,

170 Seltjarnarnesi.

Símar: 5611703, 8973766

Netfang: [e-mail]

Pistlar: http://arnthorhelgason.blog.is

Bæjarstjóri lét ekki standa á svarinu. Í trausti þess að bréf hans geymi engin trúnaðarmál er það birt hér.

Sæll Arnþór, takk fyrir skeytið og gleðilegt nýtt ár.

Ég hygg að gert hafi verið ráð fyrir aðgengi fatlaðra að íþróttamiðstöðinni í þessum framkvæmdum sem öðrum og kröfur séu uppfylltar. Til viðbótar hefur verið komið upp einni bestu búningsaðstöðu fatlaðra við sundlaugina á landinu sem tekin verður í gagnið á næstu vikum og ég vil hvetja þig til að kynna þér hana. Ég tel þó eðlilegt að ég feli framkvæmdastjóra íþróttamannvirkja að kynna sér sjónarmið þín og bregðast við þeim athugasemdum sem fram koma í skeyti þínu. Ég mun svo miðla upplýsingunum áfram til þín og stuðla að úrbótum ef nauðsyn þess kemur á daginn.

Kveðja,

Jónmundur.

------------------------------------------------------

Jónmundur Guðmarsson, bæjarstjóri

Bæjarskrifstofur Seltjarnarness

Austurströnd 2, 170 Seltjarnarnesi

Sími / Tel: [phone]

fax: [phone]

www.seltjarnarnes.is

Vinsamlegast athugið að þessi tölvupóstur og viðhengi hans eru eingöngu ætluð þeim sem tölvupósturinn er stílaður á og gætu innihaldið upplýsingar sem eru trúnaðarmál. Hafið þér fyrir tilviljun, mistök eða án sérstakrar heimildar tekið við tölvupósti þessum og viðhengjum hans biðjum við yður að fara eftir 5. mgr. 47. gr. laga um fjarskipti nr. 81/2003 og gæta fyllsta trúnaðar, hvorki lesa efni þeirra né skrá þau hjá yður né notfæra yður þau á nokkurn hátt og tilkynna okkur samstundis að þau hafi ranglega borist yður. Brot gegn þessu varða bótaábyrgð og refsingu skv. 74. gr. laganna.

English

Please note that this e-mail and its attachments are intended for the named addressee only and may contain information that is confidential and privileged. If you have by coincidence or mistake or without specific authorization received this e-mail and its attachments we request that you notify us immediately that you have received them in error, uphold strict confidentiality and neither read, copy, nor otherwise make use of their content in any way.

Dauðabuxur!

Í gærkvöld hringdi til mín ung kona frá Símanum að forvitnast um hvort ég vildi ekki hefja viðskipti við fyrirtækið að nýju.

Ég sagðist hafa farið yfir til Voðafóns í sumar en horfið aftur til Símans vegna þess að ljósleiðarinn á Seltjarnarnesi verkaði ekki og ekki hefði verið staðið við þjónustuna sem lofað var.

Ógeðslega frábært, svaraði stúlkan.

Ég fann að þessu orðavali hjá henni eftir að atviksorðið ógeðslega hafði komið fyrir fjórum sinnum í samtalinu og spurði hana hvað hún segði ef ég héldi því fram að hún væri ógeðsleg. Jákvætt og neikvætt orð væru jafnan neikvæð.

Hún sagði að faðir sinn hefði margbent sér á þetta. Ég sagði henni að annað eins orðbragð í síman verkaði illa á fólk og hún næði varla miklum árangri með menn á mínum aldri og jafnvel þaðan af yngri.

Já, sagði stúlkan. Það er svo margt skrítið í málinu og þetta er eins og dauðabuxur.

Ég varð allur ein eyru og vildi vita hvað dauðabuxur væru. Það eru flottar buxur, margendurtók stúlkan.

Þá vitið þið það, lesendur góðir, dauðabuxur eru bestar!

Hvenær skyldu nábrækur komast í tísku?

Ístöðuleysi Sjálfstæðisflokksins

Ýmislegt hefur verið fumkennt í málflutningi ráðherra Sjálfstæðisflokksins að undanförnu. Forsætisráðherra hefur slegið úr og í um kjarasamningana og vill ásamt fjármálaráðherra að allir fái eitthvað. Svona hefur Sjálfstæðisflokkurinn jafnan látið þegar bæta hefur átt hag þeirra sem bera minnst úr bítum. Ekki er hægt að lagfæra kjör þeirra án þess að allir fái eitthvað.

Um daginn heyrði ég haft eftir fjármálaráðherra í fréttum Ríkisútvarpsins að svokallaðir grænir skattar á umferðartæki kæmu til greina, en verðlagning bifreiaeldsneytis endurspeglaði þá að hluta til. Ég velti því fyrir jmér hvort við Árni skildum ekki hugtakið með sama hætti! Ég get ekki betur séð en skattarnir séu bláir, eða hvers vegna kostar nú hver lítri af díselolíu meira en bensínlítrinn? Og hvers vegna eru díselbílar ekki í lægri gjaldflokki en bensínbílar?

Síðan var höfuðið bitið af skömminni um helgina þegar kunningi minn, Magnús Kristinsson, athafnamaður, lýsti kostum íslenska tollakerfisins fyrir þá sem langar í dýra jeppa, Hann nefndi m.a. að rússland og Ísland stæðu upp úr vegna þess að íbúar þessara tveggja landa fengju nýja toyotajeppa á undan öðrum, en hver þeirra kostar víst einar 11 milljónir króna. Skyldi samanburðurinn milli Íslands og rússlands vera hagstæður á fleiri sviðum? Hvað um embættisveitingar?

Hvenær ætlar ríkisstjórnin í heild að axla þá ábyrgð sem fylgir því að draga úr útblæstri kolefnis og mengun af völdum dýrra glæsijeppa sem aka hér um götur? Skyldu þau sem í ríkisstjórn sitja ekki gera sér grein fyrir því hversu hættuleg tæki þessir háu jeppar eru í umferðinni? Sem sagt: dauðagildrur og mengarar.

Gleðilegt ár!