Uppsagnahrynan

Það er dapurlegt að lesa og heyra allar þær fréttir sem birtast nú um uppsagnir hjá fyrirtækjum landsins. Ég get ekki annað en tekið nærri mér uppsagnir hjá Árvakri. Hver er sjálfum sér næstur og Morgunblaðið er eini vinnuveitandinn sem svarað hefur umsóknum mínum um starf. Ég vann þar í sumar og fyrrasumar og undi hag mínum hið besta. Þess vegna finn ég óneitanlega til samkenndar með starfsmönnum Árvakurs. Það gleður mig að heyra að lestur Morgunblaðsins hafi farið vaxandi að undanförnu, en blaðið er opinn vettvangur fyrir skoðanaskipti og lýðræðislega umræðu. Þá er mbl.is eitthvert merkasta fjölmiðilsfyrirbæri sem um getur og hlýtur að mega teljast á heims mælikvarða fyrir margra hluta sakir.

Vissulega eru fjölmiðlar hér á landi komnir í mikinn vanda. Skjár 1 segir upp öllu starfsfólki sínu og 365 nokkrum fjölda fólks. Þessir fjölmiðlar skella skuldinni á ríkisútvarpið og er það ekki verra en vant er.

Nú þegar ákveðið hefur verið að skipa starfshóp til að fjalla um vanda fjölmiðlanna verður að vænta þess að Sjálfstæðisflokkurinn grípi ekki tækifærið og níðist á Ríkisútvarpinu. Það hefur aldrei verið ljósara en nú hversu nauðsynlegt er að eiga öflugt almannaútvarp.

Sjötugsafmæli

Á þessum degi leitar hugur minn til tveggja einstaklinga sem mér þótti vænt um og reyndust mér vel.

Þau Helgi, bróðir minn og Renata Kristjánsdóttir voru bæði fædd þennan dag árið 1938. Þau létust bæði langt fyrir aldur fram.

Renata sagðist hafa kynnst Helga í Menntaskólanum á Akureyri. Þar var hann við nám veturinn 1955-56 en varð þá að hverfa frá námi vegna hvítblæðis. Renata stundaði nám í sagnfræði um leið og ég. Ég hef áður getið þess á þessum síðum að hún las fyrir mig allt námsefnið fyrstu tvö ár ín í háskólanámi og var í raun eins og hver önnur himnasending.

Blessuð sé minning þeirra beggja.

Kræfar, íslenskar knattspyrnukonur

Ég hlustaði á brot af lýsingu leiksins á Rás tvö og hafði gaman af. Greinilegt að íslenskar knattspyrnukonur standa sig nú betur en íslenskir knattspyrnukarlmenn. Til hamingju, stelpur!

Lesa ráðherrar ekki heima?

Nú er komið í ljós að 19. tl. samnings millum Íslendinga og Alþjóðagjaldeyrissjóðsins kveður á um að stýrivextir verði hækkaðir upp í 18%. Það er því sennilega rétt mat hjá fulltrúa í bankaráði Seðlabankans að honum hafi fundist sem Davíð Oddsson skammaðist sín fyrir að þurfa að kynna þessa ákvörðun.

Það er með ólíkindum að annar foringi stjórnarinnar skuli láta henda sig að segja ósatt í Ríkisútvarpinu og að hið sama skuli henda Össur á Alþingi, sennilega vegna þess að þau hafa ekki haft tíma eða orku til að fara yfir samningsdrögin. Sumt verður fólk þó að kynna sér í stað þess að láta segja sér hvað standi í skjölunum. Er fleira sem fulltrúar Samfylkingarinnar vita ekki?

Úr því að þessi töluliður er orðinn opinber og fjölmiðlafulltrúi sjóðsins telur að Íslendingar ráði því hvort um sé að ræða trúnaðarmal, ætti að gera bæði plöggin opinber: samninginn í heild og væntanlegar efnahagsráðstafanir.

Pukur veldur bæði pirringi og skaða.

Orkurík Björk

Björk Guðmundsdóttir er réttnefnd ÍSLANDSSÓL. Í Kastljósi sjónvarpsins í gærkvöld var athyglisvert samtal við hana um þær hugmyndir sem komið hafa fram á vegum fjölmenns hóps sem hún hefur virkjað til starfa. Jafnvel þótt einungis brot þessara hugmynda yrðu að veruleika væri það þó skref í rétta átt. ´

Björk var rökföst og jákvæð í öllum sínum málflutningi. Hún virtist ekki óraunsæ heldur studdi mál sitt með ýmsum dæmum sem sýndu að ýmis verkefni hafa heppnast.

Ísland er lítið land og sumir hópar eiga hér erfitt uppdráttar vegna smæðar sinnar. Það er þó land tækifæranna. Takist okkur að nýta innlendan markað og stefna að þjónustu við fjölmennari þjóðir er hag okkar borgið.

Við höfum fiskinn og álið. Nú þarf að leita lengra og verpa eggjunum víðar en í álbakka.

Enn lengist syndaregistur Sjálfstæðisflokksins - leyniskýrsla fjármálaráðuneytisins

Spegillinn átti í kvöld viðtal við Einar Árnason, hagfræðing, þar sem hann greindi frá nýrri skýrslu fjármálaráðuneytisins. Þar kemur fram að skattbyrði á lágtekjufólk hefur aukist mest hér á landi á undanförnum áratug af öllum löndum OECD. Er þetta í algerri mótsögn við það sem ráðuneytið hélt fram í deilum sínum við Öryrkjabandalag Íslands og Landsamband eldriborgara.

Fjármálaráðherra gekk svo langt haustið 2005 að væna Stefán Ólafsson, prófessor, um rangfærslur í skýrslu sem Stefán samdi á vegum Öryrkjabandalags Íslands, en skýrsla sú var andsvar bandalagsins við skýrslu og tillögum Tryggva Þórs Herbertssonar um velferðarkerfið.

Nú sýna skýrslur svo að ekki verður um villst að Öryrkjabandalag Íslands hafði rétt fyrir sér og annaðhvort var Árni Mathiesen ósannindamaður eða hann hreinlega skildi ekki um hvað málið snerist.

Hvað ætlar Öryrkjabandalagið að gera nú? Og ætlar Árni Mathiesen að biðjast afsökunar á orðum sínum og hegðan á þessum tíma? Hvað um aðra þingmenn Sjálfstæðisflokksins sem fóru mikinn með brigslyrðum sínum á hendur Öryrkjabandalaginu og Landsambandi eldriborgara?

Ég skora á ÖBÍ og LBE að beita sér fyrir því að Árni Mathiesen veði látinn segja af sér. Hann er gersamlega rúinn öllu trausti.

Skýrsluna má sjá á vefnum www.bsrb.is

Eru ráðherrarnir ósannindamenn?

Í fréttum RÚV var greint frá því nú áðan að fjölmiðlafulltrúi Alþjóða gjaldeyrissjóðsins hefði sagt að það væri alfarið ákvörðun íslensku ríkisstjórnarinnar að halda efnahagsáætlun sinni leyndri.

Forystumenn ríkisstjórnarinnar héldu því blákalt fram á föstudaginn var að ekki mætti skýra frá einstökum liðum efnahagsáætlunarinnar fyrir en lán sjóðsins hefði verið afgreitt. Nú virðist sem þetta sé ósatt.

Atvinnurekandi, sen hefði haft fólk í vinnu hjá sér, sem lygi jafnmiklu og ríkisstjórnin hefur gert að undanförnu, myndi losa sig við þessa starfsmenn á augabragði.

Hvað vill þjóðin?

Þið eruð, gott fólk, að leiða okkur á blindgötu með þessu athæfi.

Sannleikurinn er sagna bestur.

Vek athygli á heimasíðunni www.kjosa.is

Geta Kínverjar leyst krónubréfavandann?

Almenningi er nú meira en nóg boðið. Stjórnvöld verða að upplýsa Alþingi og almenning um ýmis skilyrði sem eru uppi á borðinu vegna samninganna við Alþjóða gjaldeyrissjóðinn. Stýrivaxtahækkunin kom eins og rothögg og virðist vera ávísun á að framlengja það hættuástand sem krónubréfin sköpuðu. Fjölmargir efast um að hún hafi mikil áhrif á eftirspurn eftir íslenskum krónum.
Lilja Mósesdóttir hefur lýst því að þessi aðgerð sé í varasöm. Hvers vegna er hagfræðingum eins og henni ekki gefið tækifæri til þess að gera tillögur um nýja fjármálastefnu? Ástandið er orðið svo grafalvarlegt að setja verður stjórnendur Seðlabankans frá hið fyrsta.
Athygli hefur vakið við hverja er nú rætt vegna vanda okkar. Kínverjar eiga digrasta gjaldeyrisvarasjóð heims og hafa verið Íslendingum vinveittir um áratuga skeið. Þeir urðu fyrstir þjóða utan Norðurlanda til að veita Íslendingum fjárhagsstyrk vegna Eyjagossins 1973.
Hefur engum dottið í hug að leita eftir aðstoð þeirra til þess að létta krónubréfavandanum af Íslendingum? Væri það ekki skárri aðgerð en stýrivaxtahækkunin sem mun valda skyndilegu verðbólguskoti og rýra hag margra?

Spilaborgin fallin - in memoriam

Þá er Sterling orðið gjaldþrota. Þessi svikamylla er besta dæmið um það hvernig íslenskir athafnamenn töluðu upp gengi fyrirtækja sem voru lítils virði. Og almenningur situr enn eftir með sárt ennið!

Pólverjar flykkjast úr landi

Nú flykkjast Pólverjar heim eftir að hafa dvalið hér sumir árum saman. Pólverjar hafa ásamt öðrum útlendingum haldið uppi íslenska velferðarsamfélaginu. Nú, þegar harðnar á dalnum á Íslandi vill svo til að aðstæður hafa batnað í Póllandi og leita þeir því á ný þangað. Íslendingar hljóta að þakka þeim veitta þjónustu og óska þess um leið að Pólland nái að veita þeim þau tækifæri sem þeim ber.