Hvers konar hnífur?

Hvers konar hnífi geta menn brugðið um háls væntanlegs fórnarlambs?

Ég hef heyrt að menn bregði snöru um háls fólks og hnífum sé brugðið að hálsi manna.

Leiðrétti mig einhver fari ég með rangt mál. Ég er enn þeirrar skoðunar að mbl.is sé besti fréttavefur landsins en málfarið er stundum skondið.

Þarf rektor Háskóla Íslands að vanda um við fleiri fræðimenn?

Í gær birtist óhugnanleg frétt á Vísisvefnum:

Vísir, 10. apr. 2008 16:59

Geðhjálp vill breytingar hjá Öryrkjabandalaginu

Svanur Kristjánsson.

Stjórn Geðhjálpar vinnur nú að því að móta áherslur sem kynntar verða Öryrkjabandalagi Íslands þar sem farið er fram á ákveðnar breytingar hjá bandalaginu. Svanur Kristjánsson, formaður stjórnar Geðhjálpar segir að ekki verði samið um þessi atriði.

„Við munum setja fram ákveðnar áherslur skriflega og ræða þær síðan við Öryrkjabandalagið," segir Svanur í samtali við Vísi. Hann segir áherslurnar lúta að tvennu. Annars vegar er um að ræða málefni Brynju, hússjóðs Öryrkjabandalagsins sem deilt hefur verið um að undanförnu.

Hins vegar er um vægi einstakra félaga innan ÖBÍ að ræða. „Skipulagið í dag er þannig innan Öryrkjabandalagsins að hvert félag hefur eitt atkvæði, óháð stærð félagsins. Þessu viljum við breyta," segir Svanur og bætir við að ekki verði fallist á málamiðlanir af hálfu Geðhjálpar.

„Verði ekki gengið að þessum áherslum okkar munum við í Geðhjálp meta stöðu okkar innan Öryrkjabandalagsins," segir Svanur Kristjánsson, formaður stjórnar Geðhjálpar.

Vandræðin vegna Geðhjálpar ætla sem sagt engan enda a að taka innan Öryrkjabandalags Íslands. Sumir héldu að Svanur Kristjánsson, prófessor við Háskóla Íslands, yrði einhver lausn á vandamálum Geðhjálpar og þeirri forystukreppu sem nú ríkir þar, en svo virðist ekki. Prófessorinn, sem kennir um stjórnmálaflokka og félög innan félagsvísindadeildar Háskóla Íslands, skilur ekki hugtakið málamiðlun og virðist ekki vita að oft næst skynsamleg niðurstaða með málamiðlun. Nei, annaðhvort allt eða ekkert.

Þá skilur Svanur heldur ekki vægi þess að félög hafi jafnan rétt innan samtaka eins og Öryrkjabandalagsins. Ætli hann væri reiðubúinn að fórna réttindum Íslendinga í norrænu samstarfi vegna smæðar okkar eða þá atkvæði Íslendinga hjá Sameinuðu þjóðunum vegna smæðar þjóðarinnar? Hvaða vit er í því að Íslendingar hafi jafngilt atkvæði og Indland?

Ef til vill þarf Háskóli Íslands að skoða hvernig fræðimenn hans haga sér utan samfélags hans þegar þeir skipta sér af málefnum samtaka eigi síður en ritverkum einstakra fræðimanna.

Hausaskeljastaður

Þeir eru víðar en á golgata, hausaskeljastaðirnir. Í Lhasa eru til sölu silfurskreyttar höfuðskeljar fólks. Algengt er að menn hirði hluta af höfuðkúpum látinna ættingja, skreyti þær og selji síðan eða eigi til minja . Jamm, ætli maður hefði lyst á að bergja af silfurskreyttri skál úr höfuðkúpu náins vinar eða ættingja? Hver veit.

Kínverska sjónvarpið hefur að undanförnu sýnt ýmsar myndir frá tíbet, einkum Lhasa. Þar hefur margt athyglisvert borið fyrir eyru og augu.

Lítið á þetta: http://youtube.com/watch?v=siBqFgwL-lA&feature=related

Í gæri samþykkti Evrópuþingið að beina því til þjóðarleiðtoga að þeir sniðgengju opnunarhátíð Ólympíuleikanna í Beijing. Nú reynir Evrópa sem sagt að sýna Kínverjum vígtennurnar. Vegna fáfræði og yfirborðsmennsku vinna nú Vesturlönd Tíbetum meira tjón en vinir Tíbets geta ímyndað sér. Þetta veit Dalai Lama enda missti hann stjórn á sér á fréttamannafundi í Japan í gær. Hans heilagleiki virtist ekki eins heilaglegur (nýyrði mitt) og margir héldu.

Strandið ekki í Bakkafjöru

Nú hefur sá hugmyndaríki Magnús Kristinsson hrundið af stað undirskriftasöfnun til þess að mótmæla uppbyggingu ferjulægis í Bakkafjöru. Vill hann hraðskreiðara skip frá Þorlákshöfn til Vestmannaeyja.

Á heimasiðunni http://strondumekki.is er vakin athygli á að ferðatími til Vestmannaeyja styttist sama og ekkert þar sem aka þurfi lengri vegarlengd.

Auk slysahættu og álags á vegum landsins þýðir þetta áreiðanlega aukin gróðurhúsaáhrif og hækkandi verð vegna eldsneytiskostnaðar almennings.

Því styð ég Magnús og skrifaði undir áðan.

Menningarlegt þjóðarmorð eða sjálfsmorð

Í fyrrakvöld var athyglisvert viðtal í ríkisútvarpinu við tíbetskan stjórnmálafræðing sem býr á Íslandi. Hélt hann því m.a. fram að Kínverjar fremdu nú menningarlegt þjóðarmorð á Tíbetum.

Í fyrirlestri sem ég flutti um ástandið í Tíbet á Rhotaryfundi Seltjarnarness í fyrradag var ég spurður álits á þessari staðhæfingu. Svar mitt var á þá leið að jafnan væri hætt við að smáþjóðir, sem búa í sambýli við stórþjóðir, ættu oft undir högg að sækja og yllu því ýmsar aðstæður.

Þetta á einnig við vegna hinnar svokölluðu hnattvæðingar, en stórþjóðir af enska málsvæðinu fremja nú skipulagt menningarmorð á sér smærri þjóðum og málsvæðum. Er reyndar svo komið sums staðar að þetta menningarmorð hefur breyst í menningarsjálfsmorð.

Á Íslandi horfir málið þannig við að meginhluti dagskrár sjónvarpsstöðvanna er á ensku. Enskan bylur á eyrum fólks á hverju kvöldi.

Í kvikmyndahúsunum er tal flestra kvikmynda á ensku. Enskan hvín í eyrum gesta húsanna.

Útvarpsstöðvar útvarpa að mestu leyti popptónlist. Enskan syngur í eyrum hlustenda.

Ef sótt er um starf hjá hinu opinbera er kunnátta í enskri tungu og a.m.k. einu Norðurlandamáli gerða að skilyrði. Ekki er minnst á íslenskukunnáttu. Þetta á að vísu ekki enn við um setu á Alþingi eða ráðherraembætti.

Detti fólki eitthvað skemmtilegt í hug er nú svo komið að margir orða þessa hugsun sína á ensku.

Ensk áhrif sjást hvarvetna og nú er svo komið að jafnvel forystumenn námsmana við Háskóla Íslands geta vart tjáð sig á eðlilegri íslensku. Sem sagt: Tíbetar og Íslendingar eiga samkvæmt þessu og samkvæmt staðhæfingu tíbetska stjórnmálasérfræðingsins við svipuð vandamál að stríða. Tíbetar þurfa að læra kínversku til að fá embætti og Íslendingar ensku. Tíbetsk ungmenni hafa mörg hver ekki þjóðtungu sína á valdi sínu að sögn stjórnmálafræðingsins. Hið sama á við um fjölda íslenskra ungmenna. Margt er líkt með skyldum.

Tíbet hefur ekki í raun verið sjálfstætt ríki síðan í lok 9. aldar. Aðallinn þar hefur ævinlega þurft að reiða sig á utanaðkomandi aðstoð misvoldugra nágranna til að tryggja stöðu sína og utanaðkomandi völd urðu að skerast í leikinn til þess að tryggja stöðu Dalai Lama samanber samkomulag um leynilega kosningu hans frá árinu 1792.

Meginundirrót núverandi óeirða er sú staðreynd að gæðum landsins er misskipt á milli íbúanna og um leið berjast leifar gamla aðalsins á hæl og hnakka til þess að öðlast aftur fyrri stöðu.

Tíbetska þjóðin er ekki safngripur og hlýtur að þurfa að horfast í augu við breytta tíma. Það gera Tíbetar ekki með þeim aðferðum sem fámennur hópur iðkar nú og æsir um leið fáfróða Vesturlandabúa til samstöðu með ofbeldisöflum sínum.

Tungutorg - merkilegt hjálpartæki

Á laugardaginn var opnaði Stefán Briem, eðlisfræðingur, vefsíðuna tungutorg.is. Þar birtist árangur rannsókna hans og hugbúnaðargerðar, en Stefán hefur um árabil unnið að því að útbúa hugbúnað sem þýðir á milli tungumála.

Hægt er að þýða texta á milli íslensku, ensku, dönsku og esperanto. Ekki er um bókmenntalegar þýðingar að ræða heldur er textinn hráþýddur og fá menn þá hugmynd um hvað hann fjallar.

Ég renndi nokkrum textum gegnum hugbúnaðinn, ef svo má að orði komast. Íslensku þýðingarnar skiluðu sér allsæmilega yfir á ensku. Í ljós kom að ýmis orð fundust ekki í orðasafninu og önnur voru misskilin. En hvernig má annað verða þegar um jafnflókið tungumál og íslensku er að ræða og blæbrigði málsins óteljandi.

Ég gerði einnig nokkrar tilraunir með þýðingar úr ensku á íslesku. Þar var um að ræða efni sem ég þekki sæmilega. Árangurinn var mun meiri en ég hélt og er víst að þessi aðferð getur ´stytt mörgum leið í starfi sínu.

Væntanlega heldur Stefán afram að þróa ýmsa þætti hugbúnaðarins svo sem orðasafn o.s.frv. Ástæða er til að óska honum hjartanlega til hamingju með störf sín. Árna ég honum velfarnaðar á þessum vettvangi sem öðrum.

Tónlist á bloggsíðunni

Nú hef ég sett inn á síðuna þau 6 lög sem eru eftir mig og birtust á hljómplötunni Í bróðerni árið 1981. Helgi E. Kristjánsson útsetti þau. Guðmundur Benediktsson söng og Gísli Helgason lék á blokkflautur. Fleiri hljóðfæraraleikarar komu þar nærri.

Einnig er að finna lagið Austrið er rautt í tveimur útsetningum. Vonandi nýtur fólk þessa efnis.

Ég hefði gaman af að heyra hvort sjónskertir notendur síðunnar geti hlustað á tónlistina. Ef menn kjósa að gera athugasemdir við þssa færslu eða skrifa í gestabókina eru þeir vinsamlega beðnir að tilgreina hvaða forrit þeir nota til þess að lesa bloggsíður.

Siðleysi!

Ísland er eins og dropi í ólgusjó fjármálalífsins. Það er varasamt þegar einstaklingar eða fyrirtæki í einkaeign geta beitt afli sínu til þess að koma þjóðríkjum á kné.

Í bloggi mínu í gær talaði ég um Dylgjur Davíðs Oddssonar. Nú hefur komið í ljós samkvæmt fréttum fjölmiðla að veist hefur verið að íslensku krónunni með skipulögðum hætti og reynt að koma höggi á Íslendinga í ábataskyni. Davíð hafði þá sitthvað til síns máls eins og búast mátti við.

Vitað hefur verið frá aldaöðli að enginn borgarmúr er svo hár að asni klyfjaður gulli komist ekki yfir hann. Hitt er verra að asnar í líki auðmanna geti leikið sér að örlögum heilla þjóða.

Kannski er asninn ekki öfundsverður af samlíkingunni við þessi illmenni.

Vildi gera Ís-land gjaldþrota