Krummi krunkar ekki fyrir hvern sem er

Að undanförnu hafa nokkrir hrafnar farið mikinn í nágrenni við mig og látið öllum illum látum. Aðstæður leyfðu ekki að ég brygðist skjótlega við og hljóðritaði þá.

Í morgun fyrir birtingu setti ég hljóðnema út á svalir og tengdi mínum góða hljóðrita. Auðvitað hefur krummi ekkið látið á sér kræla.

Sömu sögu er að segja um fyrri viðskipti mín við hann. Ævinlega hefur hann þagnað þegar ég hef beint að honum hljóðnema. Annaðhvort er krummi feiminn eða heldur að hljóðneminn sé byssa.

Fyrstu samskipti okkar krumma voru ekki jákvæð. Við tvíburarnir lágum stundum úti á palli við heimili okkar í Vestmannaeyjum. Vorum við hafðir í hengirúmum þegar við vorum á öðru ári, en við fórum seint að ganga.

Eitt sinn gerðist það að taminn hrafn réðst að okkur. Við bárum víst fyrir okkur hendurnar og sköðuðumst ekki á augum.

Ég held að eðli krummans hljóti að vera fjölbreytilegt og hann upp til hópa skynsöm skepna. Hljóðin eru margvísleg og ólík eftir því hvað hann hefst að hverju sinni. Eitthvert ljótasta dýrahljóð sem ég hef heyrt hljóðritaði Magnús Bergsson. Þar réðst hrafn á þrastahreiður og má skynja illskuna í kvikindinu.

Öðru sinni fylgdumst við Elín með því þegar tveir hrafnar ætluðu að því er virtist að ræna skúmshreiður austur á Breiðamerkursandi, en við fórum þar um hjólandi. Það skipti engum togum að skúmurinn réðst að þeim og flúðu þeir sem vængir toguðu. Þá kom í þá hræðsluhljóð.

Við þessir vitru

Ég hefði betur hlustað á bollaleggingar tæknimanns í þjónustuveri Símans um daginn.

Svo brá við að myndlykillinn náði ekki sambandi við sjónvarpið. Eftir allmiklar bollaleggingar og prófanir taldi tæknimaður Símans eitthvað vera að leiðslunni sem liggur úr beininum inn í stofu. Þótti mér það með ólíkindum enda hafði hún ekki orðið fyrir neinu hnjaski.

Áðan kom í ljós hvers kyns var. Leiðslan er samsett og hafði tengingin rofnað.

Í þau skipti sem ég hef leitað til þjónustuversins hefur starsfólk brugðist skjótt við og leyst málin með prýði.

Betri hönnun rafrænna eyðublaða upprætir dálítið samfélagsmein

Ég hef nokkrum sinnum ritað um rafræn eyðublöð á vefnum sem eru óaðgengileg. Stundum vantar einungis herslumuninn til þess að slík blöð sé hægt að fylla út vandræðalaust með því að nota skjálesara fyrir blinda eða sjónskerta. Nú stendur svo á að ég þarf að sækja um vsk-númer og fylla út sitthvað annað sem snertir m.a. greiðslustofu Vinnumálastofnunar. Til þess er sérstakt eyðublað nr. 502 á vef ríkisskattstjóra. Þegar ég hugðist fylla út þetta eyðublað kom í ljós að einungis vantar herslumuninn til þess að ég geti fyllt það út. Hópurinn sem þarf á aðgengilegu efni á tölvutæki sniði er enn fámennur hér á landi. Fólki fer þó fjölgandi með betri menntun og aukinni tölvukunnáttu. Búast má við að þeir sem daprast sýn með árunum vilji eiga aðgang að þeim gögnum sem þeir gátu nýtt sér áður fyrr og geri því þá kröfu að eyðublöð og annað því um líkt sé aðgengilegt. Sum fyrirtæki og stofnanir hafa lagt metnað sinn í að hafa eyðublöðin aðgengileg. Þannig má halda því fram að tiltölulega einfalt sé að fylla út atvinnuumsókn hjá Morgunblaðinu þótt vissulega mætti lagfæra aðgengið örlítið. Hið sama verður vart sagt um Kaupþing. Þar vantar talsvert á að atvinnuumsóknir séu aðgengilegar þeim sem lítt eru skyggnir á tölvuskjái. Þar sem eyðublaðið nr. 502, sem nefnt var hér áðan, var ekki alls kostar aðgengilegt hafði ég samband við skattstofu Reykjanesumdæmis og óskaði aðstoðar við að fylla blaðið út. Hefst því brátt ferð mín suður í Hafnarfjörð að leita mér aðstoðar starfsfólksins. Þarna veldur óaðgengilegt eyðublað óþörfum óþægindum, kostnaði hjá umsækjanda og töfum hjá starfsmönnum Skattstofu Reykjanesumdæmis sem hefðu e.t.v. getað eytt tíma sínum í annað. Á móti kemur að tveir leigubílstjórar fá vinnu við fólksflutning og ég hitti vonandi skemmtilegt fólk á skattstofunni. Annars verð ég að hrósa starfsmönnum ríkisskattstjóra og öðru þeim sem leiddu mig um völundarhús reglugerða og lagagreina í morgun. að lokum: Full ástæða er til að stofna nýtt félag fatlaðra um upplýsingaaðgengi. Mér sýnist sem starfandi samtök, hvort sem um er að ræða heildarsamtök eða aðildarfélög þeirra, sinni þessu málum lítt. Hafi ég rangt fyrir mér í þessum efnum þætti mér fróðlegt að sjá athugasemdir við þessi skrif frá forystumönnum þessara samtaka.