Fésbókin aðgengileg sumum en ekki öllum

Um daginn barst mér tölvupóstur frá ungum pilti sem heitinn er eftir öðrum ungum pilti í Brekkukotsannál. Bauð hann mér að skoða síðuna sem hann hafði opnað á Fésbók.

Þegar til átti að taka vandaðist málið. Ég þurfti að skrá mig inn og til þess að það væri hægt þurfti ég að skrifa með hástöfum eitthvað sem birtist á skjánum.

Slíkar upplýsingar eru yfirleitt myndrænar og í raun gersamlega óþarfar við innskráningu. Skjálesarar, sem blintog sjónskert fólk notar, lesa ekki þessar myndir. Mbl.is hefur leyst málið með spurningum sem svarað er og Google að hluta til með því að bjóða fólki að hlusta á hljóðritanir.

Stöðugt fleiri hafa ánægju af Fésbókinni og hasla sér þar völl. Ég er ekki einn þeirra. Svo verður væntanlega ekki fyrr en bandarísku blindrasamtökin höfða mál á hendur eigendum síðunnar og fá þá til samstarfs um að hlýða lögum sem gilda um upplýsingaaðgengi þar í landi. Að sinni nægir Moggabloggið mér.

Facebook fimm ára

Athugasemdir

[Sigrún Þorsteinsdóttir (IP-tala skráð) 5.2.2009 kl. 19:23]

Þetta er auðvitað óþolandi framkoma og ekki það eina sem þarf að lagfæra á Facebook svo hún verði aðgengileg öllum notendum. Grundvallaratriði eins og ALT textar eru sums staðar ekki í lagi, tenglaheiti ekki skýr, litir eru ekki nægilega skarpir o.fl. Það hafa verið myndaðir hópar á Facebook með þennan málaflokk í forgrunni en ekki virðist vera hlustað. Þetta hefði verið öðruvísi frá upphafi hefði stofnandinn verið blindur eða sjónskertur....eða bara skynsamur.

[Guðbjörg Hildur Kolbeins, 6.2.2009 kl. 22:43]

Ég skildi einmitt ekkert í því af hverju þig væri ekki að finna á Facebook. Nú veit ég svarið. Miðað við vinsældir tengslasvæðisins finnst manni ótrúlegt að blindir og sjónskertir skuli vera hunsaðir á þennan hátt.