"Fjöldi lífeyrisþega hefur fækkað"

Í dag hófst frétt í Morgunblaðinu með þessum orðum:

"Fjöldi elli- og örorkulífeyrisþega sem voru skráðir erlendis með lífeyrisréttindi hefur ekki fækkað þrátt fyrir efnahagskreppu. Mun óhagstæðara er í dag að fá lífeyrisbætur sendar frá Íslandi vegna breytinga á gengi krónunnar."

Tvennt er að athuga við þessa frétt. Fjölda fækkar ekki og upphafsorðið hefði átt að vera í þágufalli.

Það verður nú æ algengara að heyra í útvarpi og lesa í Morgunblaðinu setningar eins og þá sem hér var vitnað til. Um daginn hófst frétt á þessum orðum: "Þeir sem vilja styrkja Rauða krossinn skal bent á" o.s.frv.

Nú þegar segja þarf upp fólki á fjölmiðlum ætti að gefast kjörið tækifæri til að ráða fólk með sæmilega málvitund og þekkingu á íslenskri tungu.

Sporlatir lögbrjótar

Fjöldi fólks virðir hvorki stæði fatlaðra né friðhelgi gangstétta. Á eiðistorgi var tveimur bifreiðum lagt upp á gangstétt þegar mig bar þar áðan. Lögreglan hefur þar aðsetur og ég hef aldrei vitað til að stuggað væri við þeim ökumönnum sem þannig haga sér. Eiðistorgið og umhverfi þess verkar reyndar á mig eins og ætlast sé til þess að fólk stundi þar hindrunarhlaup. Hætturnar eru á hverju strái og ekki bæta sporlatir lögbrjótar ástandið. Það var því ánægjulegt að lögreglan skyldi taka til hendinni í Reykjavík í gær. Þessir sporlötu lögbrjótar brjóta ekki eingöngu á rétti fatlaðs fólks heldur einnig á þeim sem nota gangstéttir til gönguferða og aka kerrum og barnavögnum.

Neitaði að segja til nafns

Andstæðingar ESB sameinist!

Það á að hverfa frá umsókn um aðild að ESB hið snarasta. Þjóðin hefur hvorki efni á henni né verður aðildin slíkt hagsældartæki sem margur álítur.

ESB-andstæðingar sem styðja ríkisstjórnina eiga að bindast samtökum og leggja fram frumvarp til laga um afnám heimilda til handa ríkisstjórninni til þess að sækja um aðild að Evrópusambandinu. Í raun er Samfylkingin einangruð í þessu máli. Miðað við þann niðurskurð sem óhjákvæmilegur verður og öryrkjar, aldraðir og barnafjölskyldur axla öðrum fremur, er fásinna að eiða of fjár í þetta ástæðulausa og heimskulega flan sem umsóknin um aðild er.

VG:Sóknaráætlun gegn landsbyggðinni mótmælt

Athyglisvert viðtal við Ögmund Jónasson

Þeim, sem hafa fylgst með atburðum á vettvangi stjórnmála að undanförnu skal bent á viðtal Karls Blöndals í Morgunblaðinu í dag, við Ögmund Jónasson. Þar reifar Ögmundur sjónarmið sín um alþjóða gjaldeyrissjóðinn, óþarflega mikinn gjaldeyrisforða, Icesave o.fl. Hvort sem menn eru sammála Ögmundi um afsögn hans eða telja að hann hefði getað farið aðrar leiðir er viðtalið þannig skrifað að menn ættu að kynna sér það.

Eyjan virðist í sókn

Senn verða 4 ár frá því að ég missti vinnuna og enn er ekkert fast í hendi.

Á Eyjunni er nú auglýst eftir blaðamönnum og sótti ég um. Vafalaust verða margir um hituna enda er nú fjöldi blaðamanna atvinnulaus.

Það er ánægjulegt og jafnframt tímanna tákn að íslenskur netmiðill sé nú í sókn og treysti sér til að ráða blaðamenn til starfa.

Þriggja flokka ríkisstjórn í burðarliðnum

Heimildir úr innsta hring Sjálfstæðisflokksins herma að þreifingar séu hafnar milli sjálfstæðismanna, framsóknarmanna og órolegu deildarinnar hjá Vinstri-grænum um myndun þriggja flokka ríkisstjórnar. Var greint frá því að formanni Vinstri-grænna yrðu settir þeir afarkostir að samstarf við Samfylkinguna væri í raun útilokað.

Ísland brennur

Í þættinum "Vítt og breitt að morgni dags" er fjallað um siðfræði á mánudagsmorgnum. Í morgun ræddi Hanna G. Sigurðardóttir við Guðmund Heiðar Frímannsson, prófessor við Háskólann á Akureyri. Meginniðurstaða hans var sú að Íslendingar bæru ábyrgð á að endurgreiða þá hámarksábyrgð sem tryggingasjóði innistæðueigenda er ætlað samkvæmt lögum og gildir þá einu hvort um er að ræða íslenska eða erlenda viðskiptavini Landsbankans. Benti hann fólki á að setja sig í spor útlendinga í þessu máli. Taldi hann í raun gott að þetta skylli með þessum hætti á Íslendingum. Stjórnvöld hefðu ekki staðið vörð um að bankarnir yxu ekki þjóðarframleiðslunni yfir höfuð. Benti hann m.a. á að Svisslendingar teldu hættu stafa af vexti bankanna þar, en umsvif þeirra nema nú um fimmfaldri þjóðarframleiðslu Svisslendinga.

Í pistlum þessum hefur áður verið lýst vonbrigðum með þá ákvörðun Ögmundar Jónassonar að hlaupast undan merkjum og flýja úr ríkisstjórninni. Fleiri þingmenn Vinstri-grænna virðast undir sömu sök seldir og kemur á óvart að jafngreind og mikilhæf kona og Guðrfríður Lilja Grétarsdóttir geri sig seka um jafnalvarlegan siðferðisbrest og fram kom í máli hennar í silfri Egils í gær.

Á meðan hluti Vinstri-grænna og stjórnarandstaðan halda þessu máli í gíslingu brennur Ísland.

Þorvaldur á hrós skilið

Viðtal Egils og Þorvalds var afbragðs gott. Þorvaldur er einn þeirra sem þorir að horfast í augu við ábyrgðina sem íslensk stjórnvöld hafa bakað Íslendingum í Icesave-málinu.

Vissrar óþolinmæði er farið að gæta í garð þeirra sem rannsaka orsök bankahrunsins og ýmsir spyrja sig hvers vegna ónefndir bankastjórar og formenn bankastjórna hafi ekki verið ákærðir fyrir löngu. Hvers vegna gengur Sigurjón Árnason laus? spurði einn viðmælandi minn í dag. Annar hélt því fram að betligen Íslendinga væru svo áberandi að þeir héldu enn að þeir gætu stigið fram með betliskál í hendi vegna þeirra synda sem þeir hafi drýgt. Tekið skal fram að erfðarannsóknir eru þessum viðmælanda hugleiknar enda eru þeir skyldir, hann og Kári Stefánsson.

Nú þegar ár er liðið frá bankahruninu væri fróðlegt að Egill Helgason ræddi við einhverja þeirra blaðamanna sem fjölluðu um fjármál áður en bankarnir hrundu. Einhverjir hljóta að geta sagt frá því hvernig gekk að afla upplýsinga og að enginn þorði í raun að segja frá því á hverju væri von. Glöggt dæmi um slíkt voru þeir fyrrum seðlabankastjóri og forsætisráðherra sem sögðu báðir ósatt í fréttatíma ríkisútvarpsins 3. okt. 2008 eins og rifjað var upp í gær.

Stórlaxarnir munu ekki allir sleppa

Vefsafnið uppfyllir ekki lágmarkskröfur um aðgengi

Fyrir skömmu opnaði Katrín Jakobsdóttir, menntamálaráðherra, nýjan vef, www.vefsafn.is þar sem hægt er að finna allar vefsíður sem hafa verið skráðar á lén sem endar á .is frá árinu 2004.

Ég hugði mér gott til glóðarinnar og ákvað að forvitnast um vissa hluti. En viti menn. Vefsafnið uppfyllir ekki lágmarkskröfur um aðgengi. Hægt er að leita að vefsíðum. Þegar listi yfir færslurnar birtist kemur í ljós að skjálesarar lesa ekki tenglana í töflunni sem sýnir hinar ýmsu færslur.

Það virðist mikill misbrestur á að gætt sé að aðgengi þegar opinberar síður eru endurnýjaðar. Ég hef því sent ýmsum yfirmönnum Landsbókasafnsins meðfylgjandi bréf:

Ágæti viðtakandi.

Viðleitni Landsbókasafns Háskólabókasafns til að veita almenningi sem mestar og besta upplýsingar er til mikillar fyrirmyndar.

Við hönnun hins nýja vefsafns hefur ekki verið gætt að aðgengi þeirra sem nota skjálesara. Hægt er að fletta upp á vefsíðum. Listinn sem þá birtist er óaðgengilegur. Tenglarnir virka alls ekki og því er þessi þjónusta gagnslaus þeim sem eru blindir eða sjónskertir.

Þetta stríðir gegn upplýsingastefnu stjórnvalda og verður þess því vænst að úr verði bætt hið fyrsta.

Virðingarfyllst,

Arnþór Helgason

Fretir

Að undanförnu hefur sá merki fræðimaður, Jón Björnsson, sálfræðingur, hjólreiðagarpur og fyrrum félagsmálastjóri, flutt stórmerkilega pistla um furður vindanna. Í morgun var seinni pistill hans um freti.

Hljóðlistamaðurinn Michael Oster birtir á heimasíðu sinni ýmislegt um hljóðritun margvíslegra náttúrufyrirbæra. Þar á meðal er fróðleg samantekt um hljóðritun freta. Michael telur afar vandasamt að hljóðrita þá og þurfi til þess langan tíma svo að árangurinn verði viðunandi.

Í framhaldi af pistlum Jóns væri freistandi að taka saman örlitla hljóðmynd um freti. Ekki er ólíklegt að tveggja til þriggja mínútna fret-hljóðmynd krefðist talsverðrar fyrirhafnar. Það er næstum vísindalega sannað að meginfretir eru iðkaðir á morgnana þegar karlmenn fara og athafna sig á salerninu. Þess vegna þyrfti sá, sem tekur að sér þessa hljóðmyndargerð, að fara víða og fá heimild til þess að dvelja næturlangt hjá nokkrum fjölskyldum.

Síðan má velta því fyrir sér hvort það samræmdist velsæmismörkum ríkisútvarpsins að útvarpa slíkri hljóðmynd. En verkefnið er verðugt.