Ísland og Austur-Þýskaland

Það var grimmur tónn í leiðurum dagblaðanna í morgun. Seðlabankinn er nú skammaður fyrir aðgerðaleysi sem komi nú þjóðinni í koll. DV telur að afglöp af Halldóri Ásgrímssyni að hafa skipað Davíð Oddsson seðlabankastjóra. Ég held að það hljóti jafnan að era mistök að fyrrum forsætisráðherra setjist í þetta sæti. Að því hníga óteljandi rök sem ekki verður vikið að hér þessu sinni.

Þótt ýmislegt megi finna formanni bankastjórnar Seðlabankans til foráttu efast ég þó vart um að sú ráðstöfn að þjóðnýta Glitni hafi verið sú besta í stöðunni. Hins vegar má deila um hort ekki hhefði verið hægt að grípa fyrr til vissra ráðstafana sem hefðu betur tryggt hag landsmana.

Lánshæfiseinkunn Íslendinga hefur versnað úr öllu hófi og því væntanlega orðið enn erfiðara að fá hagstætt lán en áður. Bjartsýni ráðamana hefur þannig komið þeim í koll og engin viðbragðsáætlun var tilbúin. Þannig hefur Seðlabankinn í raun sýnt hvað hann er handónýt stofnun.

Það læddust að mér ýmsar hugsanir áður en ég sofnaði í gærkvöld. Það var farið að snjóa. Það þýddi aukinn kostnað sveitarfélaganna og vaxandi olíunotkun. Skyldu Íslendingar geta keypt olíu vegna gjaldeyrisskorts? Það er í raun undarlegt að eiga nóg til hnífs og skeiðar en geta ekki greitt fyrir nauðsynjar vegna skorts á lausafé. Síðan heyri ég haft eftir forstjóra eins olíufélaganna í landinu að komið geti til olíuskorts.

Ég rifjaði upp með sjálfum mér þegar Austur-Þjóðverjar héldu uppi sjálfstæðum gjaldeyri sem enginn tók mark á. Landsmenn voru jafnvel tilbúnir að kaupa vestur-þýsk mörk á 13 földu gengi. Sjálfur hafði ég aldrei brjóst í mér til að stunda slík viðskipti og keypti austur-þýsk mörk á fjórum sinnum minna gengi en skráð var og þótti austur-þýskum kunningjum mínum þetta fásinna.

Á 8. áratugnum var ástandið þannig og reyndar lengur að Íslendingar keyptu gjaldeyri á svörtu til þess að geta fjármagnað ferðir sínar erlendis, nauðsynleg innkaup eða jafnvel til að spara. Þá voru í gildi gjaldeyrishöft. Algengt var að menn greiddu gjaldeyriseigadanum 15-50% álag, allt eftir því hvað þeir þekktu miðlarann vel. Getur verið að við eigum eftir að upplifa þessa stöðu á ný?

Lundinn og Landsbankinn

Blessaður lundinn. Það er hart í ári hjá honum eins og fjárfestum.

Og nú berast þau tíðindi frá Bloomberg að Landsbankinn sé einnig kominn á válista.

Fljótandi gengi og ofurvextir valda miklu um hvernig komið er fyrir Landsbankanum..

Lundinn settur á alþjóðlegan gátlista

Rannsóknir á starfsemi heilans

Nú er að hefjast í BBC þriggja þátta röð um rannsóknir á starfsemi heilans. Viðmælendur virðast sammála um að áratugir líði þar til menn hafi skilið til fulls ýmsa eiginleika sem heilinn, þetta hlaupkennda líffæri, býr yfir.

Í gær var fjallað um ýmsa kvilla sem þjáð geta fólk vegna brenglunar á starfsemi heilans. Stundum er um meðfædda galla að ræða en oftar stafar brenglunin af skaða eða áfalli sem heilinn hefur orðið fyrir.

Sumt af því sem nefnt var, virtist við fyrstu heyrn hlálegt en við nánari hugsun var það grafalvarlegt. Nefnd skulu dæmi:

Maður nokkur fékk heilablóðfall. Hann fylltist eftir það sérstakri ástríðu sem fólst í því að mála ketti. Nú er húsið hans alþakið málverkum í hólf og gólf og hann viðurkennir að um einkennilega sérvisku sé að ræða. Hann hefur heldur ekkert tímaskyn. 10 mínútur og 12 klukkustundir virðast jafnlangur tími.

Kona ein, ung að árum, þekkir ekki andlit fólks. Hún getur lært að kannast við þá sem hún umgengst mest, en vinnufélaga sína og ýmsa ættingja þekkir hún ekki í sjón.

Ein heilabilunin felst í því að menn ráða ekki gerðum annarrar handar sinnar. Jafnvel fremur höndin ýmis óhæfuverk. Þegar eigandi handarinnar áttar sig á því hvað er á seiði grípur hann einatt til örþrifaráða og reynir að hindra höndina í því að fremja óhæfina. Kemur þá iðulega til átaka milli handa mannsins og fylgir því iðulega hávært rifrildi hans við höndina sem svarar auðvitað engu.

Hégómagirndin ríður vart við einteyming

Ég lít stundum á fjölda þeirra sem skoða þessa síðu og verð ævinlega jafnhissa þegar ég sé hversu margir líta inn. Svo virðist sem sumar greinar veki meiri athygli en aðrar og gestir streyma að.

Enn hef ég ekki áttað mig á því hvað veldur þessari miklu aðsókn. Það hefur öðru hverju hvarflað að mér að ef til vill væri þetta blogg eintóm endaleysa. Sé svo verður að hafa það. En svali það fróðleiksást einhvers eða skemmti öðrum er best að halda því áfram.

Heilsurækt - http://heilsuraekt.is

Þegar ég hætti störfum hjá Morgunblaðinu í haust og alvara atvinnuleysisins tók við fór ég að rækta líkamann að nýju hjá Hreyfingu. Það gefur mér tækifæri til að hitta fólk og taka ærlega á. Líður mér ævinlega betur í sálinni eftir vistina í Hreyfingu.

Ég er svo heppinn að hafa afbragðs þjálfara, Jóhann Sveinbjörnsson, íþróttafræðing. Reyndar er það svo að þeir þjálfarar, sem ég hef fengið hjá Hreyfingu, virðast úrvalsfólk.

Jóhann er hugmyndaríkur og hefur nú stofnað heimasíðuna http://heilsuraekt.is. Var síðunni hleypt af stokkunum í gær. Hugsar Jóhann sér m.a. að kynna fyrirtæki vikunnar. Fyrst var riðið á vaðið með ítarlegu myndbandi um Boot Camp.

Myndbandið hófst á fremur ruddalegri graðfolatónlist sem átti vel við vegna þessa kerfis sem byggir á því að ofbjóða líkamanum, ef ég skildi ensku skotna íslensku leiðbeinandans rétt. Í sporum Jóhanns hefði ég sleppt tónlistinni undir viðtalinu sem var að mörgu leyti prýðilega unnið. Hljóðmyndin var skemmtileg og gaf góða mynd af umhverfinu.

Nú veit ég svo lítið um herþjálfun að ég ætla ekki að reyna að leggja til íslenskt heiti á þessa íslensku þjálfunaraðferð, Boot Camp. En miklu væri nú skemmtilegra að finna aðferðinni íslenskt nafn.

Ég fór inn á heimasíðu Boot Camp og þar gaf svo sannarlega á að líta. Svo virðist sem þessi aðferð sé í raun lausnin á þeim vanda nútímamannsins að þurfa að taka ærlega á án þess að nota til þess rándýr tæki. Kynningin mætti þó vera betur samin og ögn snyrtilegar orðuð.

Í pistli mínum í gærmorgun ræddi ég að Íslendingar væru bestir og Boot Camp þjálfunarkerfið er íslenskt eins og kemur fram á heimasíðu fyrirtækisins. Það getur vel verið að Boot Camp sé besta þjálfunaraðferð heims. En kynningin er ekki sú besta.

Ég þykist viss um að kynningarmyndband Jóhanns Sveinbjörnssonar veki talsverða athygli og skili meiri árangri en það sem ritað er á heimasíðu Boot Camp.

Á heilsuraekt.is eru upplýsingar um ýmislegt sem tengist heilsurækt og hollum lifnaðarháttum. Er ástæða til að óska Jóhanni Sveinbjörnssyni til hamingju með heimasíðuna. Hér með er honum óskað góðs gengis.

Flýgur fiskisagan

Áðan hringdi til mín felmtri sleginn fjárfestir sem er á þeim aldri að nota lítt eða ekki tölvu. Var hann á eyju við austanvert Miðjarðarhaf. Þangað höfðu borist þau tíðindi að Glitnir væri farinn á hausinn og sparifé fólks að mestu glatað.

Áðan var svo aftur hringt og rætt um atburðarás síðustu daga. Meðal annars bar á góma sölu Landsbankans á erlendri fjármálastarfsemi sinni. Kvað viðmælandi minn upp úr að enginn virtist segja satt þessa dagana og nú gengi fjöllunum hærra að Kaupþing ylti um í næstu viku.

Hvað gerir Seðlabankinn þá?

Ég greindi fjárfestinum við Miðjarðarhafið frá aturðarrásinni undanfarna daga eins og mér kemur hún fyrir sjónir. Kvaðst hann þá vilja vita hver hefði átt upphafið að ósköpunum í Vallarstræti í Nýju Jórvík. Þá vaknar önnur spurn: Hvert fóru peningarnir?

"Það er svo geggjað að geta hneggjað"

Ég gluggaði áðan í bókina Gamlar syndir eftir Flosa Ólafsson, þann mæta háðfugl og skemmtikraft. Formála bókarinnar reit Kjartan Ólafsson, fyrrum ritstjóri Þjóðviljans, enda er hér um greinasafn Flosa úr Þjóðviljanum að ræða.Í formálanum víkur Kjartan að þeim áhrifum sem Flosi hafi haft á málfar þjóðarinnar með tungutaki sínu og nefnir að lýsingarorðið geggjaður hafi fengið aðra merkingu eftir að Flosi söng hinn skemmtilega texta sinn við eigið lag.

Ef ég man rétt var þetta merka ljóð frumflutt um eða eftir árið 1970. Nokkrm árum áður, eða í maí 1967, átti ég leið upp í Gagnfræðaskóla Vestmannaeyja. Veðrið var yndislegt og við á leið í einhvern aukatíma ef ég man rétt. Kennarinn var ekki kominn og ásamt okkur tvíburunum beið m.a. bekkjarsystir okkar, Gyða Arnmundsdóttir. Henni leist vel á veðrið og sagði: "Mikið ógeðslegega er veðrið geggjað."

Sannar þessi frásögn að lýsingarorðið geggjaður var þá þegar orðið þeirrar merkingar að lýsa yndisleik þess sem fyrir augu og eyru bar.

Að vísu finnst mér veðrið hálfgeggjað um þessar mundir, norðan vindbelgingur og kuldahryssingur.

Íslendingar eru bestir

Það hefur verið heldur óskemmtilegt að fylgjast með umræðunni undanfarna daga. Svo virðist sem mikil umbrot eigi sér nú stað á íslenska fjármálamarkaðinum og hver reyni að bjarga eigin skinni.

Ríkissjónvarpinu tekst afar illa að efna til málefnalegra umræðna um þau mál sem efst eru á baugi hverju sinni. Umræðan endar yfirleitt með eins konar hanaati og menn eru jafnnær eftir atið og áður. Helgi Seljan (man ekki hvers son hann er) hefur einstakt lag á því að grípa fram í fyrir viðmælendum og yfirleitt enda viðtölin hjá honum illa. Þá lýstur stjórnmálamönnum iðulega saman og allt endar með ósköpum.

Stjórnendur Kastljóssins verða að fara að hugsa um hag hlustenda og hætta þessari skrýlsframleiðslu.

Nú kemur það fram að Íslendingar eru hvarvetna bestir. Enn hefur aðeins einn banki lent í fjárþroti og líkur benda til að Landsbankanum hafi tekist að forðast stóráföll að sinni.

Í gær fékk ég enn eina staðfestinguna á því hvað Íslendingar eru frábærir. Ég er í þróunarhópi um hugnúnað fyrir blinda og sjónskerta. Í gær barst tilkynning um að forritið Ragga myndi fylgja næstu útgáfu hugbúnaðarins og er forritið með tilraunaútgáfunni. Engar úrbætur hafa verið gerðar á talgervlinum þrátt fyrir ítrekaðar ábendingar.

Vafalaust eru Íslendingarnir, sem hönnuðu Röggu, ágætlega vel að sér í sínu fagi. En þeir hafa enga reynslu af því að framleiða talgervla. Starfsmenn Dolphin-fyrirtækisins, sem hefur ákveðið að fjárfesta í Röggu, töldu sem eðlilegt var, að talgervillinn hefði verið prófaður með notendum. Nú lítur út fyrir að þeir muni jafnvel hverfa frá því að nota hann.

Það er eins með talgervilinn Röggu og fjármálaveldi Íslendinga. Menn hafa ekki hugsað leikinn til enda og kastað til höndunum við framleiðslu hans.

Hefði talgervillinn verið framleiddur í Kína myndu Kínverjar hafa verið sakaðir um vörusvik. Og nú saka ég Símann um vörusvik. Síðan bætir menntamálaráðherra gráu ofan á svart með því að afhenda þessi ósköp við hátíðlega athöfn.