Forsetinnn kærður fyrir brot á lögreglusamþykkt

Krían er komin á suðvesturhornið!

Í dag fórum við hjónin út á Álftanes að hljóðrita margæsir. Þær flýðu þegar okkur bar að garði og létu lítt til sín heyra. Skvaldur sjávarins og annað var þó hljóðritað. Birtist afrakstur hljóðritunarinnar á http://hljod.blog.is innan skamms.

Á Álftanesi urðum við vör við allmargar kríur. Einnig urðum við þess vör að fólk sleppti hundum sínum lausum í fjörum en lausaganga hunda er bönnuð þar sem í öðrum kaupstöðum. Brugðust sumir illa við þegar þeim var bent á að skilti sýndu greinilega að svo væri.

Við fréttum reyndar að almennir borgarar væru ekki einir um að brjóta þessa lögreglusamþykkt bæjarfélagsins. Æðsti maður landsins býr þar og eiginkona hans á stóran hund sem hann gengur með sér til skemmtunar. Iðulega hefur hann sleppt hundinum lausum og hefur hann þann ósið að flaðra upp um fólk sem þeir mæta, forsetinn og hann. Ekki hugnaðist öllum Álftnesungum þetta framferði æðsta hunds landsins og kærðu húsbónda hans. Sagt er að hann hafi þurft að sæta áminningu fyrir. Hann hefur þó ekki látið segjast og hefur sést með hundinn gangandi lausan. Einhver spurði víst hvort hann héldu þessum sið áfram og benti þá hæstráðandi til sjós og lands á að hundurinn hlýddi þegar hann kallaði. Hvernig ætli lögum þessa lands sé hlýtt ef samþykkjandi þeirra fer ekki að lögreglusamþykktum þess bæjarfélags sem forseti landsins býr í?

Þetta minnir á söguna um Björn Gunnlaugsen, stjarnfræðing sem kenndi við Bessastaðaskóla. Einhverju sinni átti hann leið framhjá einu kotinu á leið til Bessastaða. Kom þá hundur gjammandi á móti honum. Björn hastaði á hundinn og sagði: „Þegið þér!“ Og bætti svo við: „Ég ætlaði nú eiginlega ekki að þéra yður.“

Seinna um daginn lá leið okkar út á Seltjarnarnes. Þar voru líka kríur og fleiri fuglar. Var yndislegt að heyra í þeim. Á vegi okkar varð ungt fólk sem sleppti hundi sínum lausum við Bakkatjörn. Hljóp hann út í tjörnina og olli þar nokkrum glundroða. Var fólkinu vinsamlegast bent á að bannað væri að vera með lausa hunda allt árið um kring og nú væri varptími fugla. Brugðust þau við vel, urðu heldur leið og hnepptu hundinn í helsi eins og vera ber.

Yfirvöld á Seltjarnarnesi þurfa að auglýsa með fleiri skiltum bann við lausagöngu hunda innan bæjarfélagsins. Fjörur eru þar engin undantekning.

Athugasemdir

[Dingli, 10.5.2010 kl. 06:19]

Ólaf Ragnar mætti að kæra fyrir mörg alvarlegri afbrot en þetta.

Fólk virðist margt ekki átta sig á því, að hjá mörgum fugla tegundum liggur annað foreldrið á meðan hitt sækir æti. Sé það foreldrið sem er á hreiðrinu rekið upp, er vargurinn oft fljótur að hirða egg og unga.

Brandarinn af Birni er virkilega góður.

(Væntanlega voruð þið að hljóðrita mArgæsir)

[Arnþór Helgason, 10.5.2010 kl. 07:21]

Prentvillupúkinn er ágengur. Ég hugsaði margæsir en skrifaði ö í stað a.

Stiganum kennir stirður málari og árinni illur ræðari. Þarna ruglaði talgervillinn mig í ríminu. Það kemur enn og aftur í ljós hve Ragga er afleitlega gerður talgervill. Kærar þakkir fyrir ábendinguna.

[Kjartan Sigurgeirsson, 10.5.2010 kl. 12:06]

Fyrst byrjað er að leiðrétta er rétt að geta þess að Björn var Gunnlaugsson ekki Gunnlaugsen

[Hörður B Hjartarson, 12.5.2010 kl. 16:51]

    En hvernig er það Arnþór !   Veist þú hvort hundurinn hafi fengið orðu frá eigandanum fyrir athæfið , sem og sumir aðrir hundar í hinu íslenska samfélagi  hafa fengið ?