Kóngur vill sigla en byrr hlýtur að ráða

Árni Johnsen varð í öðru sæti í prófjöri Sjálfstæðisflokksins á Suðurlandi, en ung kona, Ragnheiður Elín Árnadóttir, varð í fyrsta sæti. Árni skildi ekki kall tímans. Í stað þess að keppa við konuna hefði hann átt að stefna á annað sæti listans og stuðla þannig að framgangi ungrar og efnilegrar konu sem er yngri en hann og hlýtur að hafa að flestu leyti ferskari viðhorf.

Geir Haarde hefur hamrað linnulaust á því að skoðanafrelsi ríki í Sjálfstæðisflokknum. Þess vegna var ekki óeðlilegt að þeir Árni Sigfússon og Elliði Vignisson nýttu sér frelsið og lýstu stuðningi sínum við þann frambjóðanda sem þeir treystu best í fyrsta sætið. Það eykur styrk þeirra að hvorki kunningja- né ættartengsl skipta þar máli.

Árni Johnsen er ekki fórnarlamb. Hann hefur hlotið meira traust og ríkulegri umbun en flestir þeir sem tóku þátt í prófkjörum helgarinnar. Uni hann nú glaður við sitt og haldi áfram að vinna þjóðinni gagn sem almennur þingmaður eða varaþingmaður.

Unaðsleg hljóðmynd

Í gær flutti Útvarpsleikhúsið fyrsta hluta leikritsins Sómafólks eftir Andrés Indriðason. Nefndist hann "Sól og blíða í Paradís". Fjallaði leikurinn um gullbrúðkaupsafmæli íslenskra hjóna sem fór öðruvísi en ætlað var.

Leikritið gerðist bæði utan- og innan dyra. Helsti galli hljóðritsins var sá að lítill sem enginn munur var á hljómnum og heyrðist örlítið herbergishljóð í utandyraatriðunum. Skrifast það e.t.v. á reynsluleysi tæknimanns eða leikstjórann sem hefur þurft að spara.

Í heildina var verkið prýðilega unnið og leikstjórn Ásdísar Thoroddsen til fyrirmyndar. Helst bar á því að Pétur Einarsson héldi ekki samfelldri raddbeitingu út verkið. Margrét Guðmundsdóttir var allan tímann samkvæm sjálfri sér.

Hljóðmynd leikrita skiptir mjög miklu máli. Með nútímatækni og betri hljóðritum hefur gerð hljóðmynda orðið flóknari en áður. Það var afar sannfærandi þegar jeppi var látinn spóla sig niður í leðju og hjólhýsi slitnaði aftan úr, eins þegar alld "heila klabbið" hlunkaðist niður snarbratta brekku og bíllinn braust yfir torfæran gróður og óslétt land.

Atriðið á sjúkrastofunni var meistaralega vel gert. Ég sat með heyrnartól til þess að geta einbeitt mér að því að hlusta. Stundum tók ég þau af mér til þess að átta mig á hvort einhver væri á ferli á ganginum. Það voru þá bakhljóðin í leikritinu sem voru svona eðlileg.

Það er mikil og góð skemmtan að hlusta á útvarpsleikrit. Þríleikur Andrésar Indriðasonar lofar góðu. Ekki er kafað of djúpt í sálarkima mannsins og lausnir flækjunnar, sem upp kemur í samskiptum þeirra hjóna, eru hreint ekki einfaldar. En höfundurinn heggur á hnútinn með sannfærandi hætti.

Að nokkru er vísað til vandamála nútímans, neysluhyggju almennings og fyrirhyggjuleysis, hégómaskapar, forræðishyggju og alvisku okkar karlmannanna.

Ástæða er til að óska flytjendum og framleiðendum verksins til hamingju.

Hægt er að hlusta á leikritið á vef Ríkisútvarpsins. Þá skal vakin athygli á að Útvarpsleikhúsið er á dagskrá alla sunnudaga kl. 14 og á fimmtudagskvöldum um kl. 22:15.

Prófkjörið um helgina

Ýmislegt í prófkjöri helgina sá hver maður fyrir. Þannig varð ljóst að lítil endurnýjun yrði innan Sjálfstæðisflokksins og Samfylkingarinnar. Þær breytingar sem urðu á uppstillingu Sjálfstæðisflokksins voru að mestu bitamunur en ekki fjár. Hið sama er hægt að segja um Samfylkinguna að öðru leyti en því að í Reykjavík beið Ásta Ragnheiður Jóhannesdóttir ósigur. Það hlýtur að vera eitthvað að þegar einum af ráðherrum flokksins er ekki treyst til að vera þar fremst í flokki.

Innan Vinstri grænna varð svo sem ekki mikil endurnýjun heldur og þykjast þeir góðir af því enda hafi þeir enga ábyrgð borið á bankahruninu. Framsókn stendur upp úr, en þar var heldur betur hreinsað til.

Svo er að heyra að ýmsir óttist að Framsóknarforystan standi vart undir þeim væntingum sem til hennar eru gerðar. Tillögur formannsins um 20% flatan niðurskurð á skuldum heimilanna þykja allt að einfeldningslegar og ýmsir hafa haft efasemdir um framgöngu hans vegna þeirra mála sem lögð hafa verið fyrir Alþingi.

Um Frjálslynda flokkinn og Kristin Gunnarsson er best að segja sem minnst. Flokkurinn virðist nú á leið í frumeindir sínar og Kristinn dæmdi sig sjálfur úr leik með því að ganga úr flokknum, koma við í Samfylkingunni í nokkrar klukkustundir og hverfa þaðan aftur yfir í Framsóknarflokkin þegar séð varð að hann kæmist ekki í prófkjör hjá Samfylkingunni. Heitir það ekki að vera hentistefnumaður í stjórnmálum?

Samviskulausir fjármálaaulabárðar

Eva Joly telur hugsanlegt að ráðamenn íslenskra banka hafi gerst sekir um lögbrot með undanskoti fjár til skattaparadísa og að féð verði vart endurheimt vegna vanhugsaðra fjárfestinga.

Sparisjóðurinn Byr tapaði 29 milljörðum króna á síðasta ári, en þá greiddi sjóðurinn eigendum sínum 13,5 milljarða í arð. Þó hafði stofnféð aukist vegna þess að menn vildu styrkja sparisjóðinn.

Okkur var talin trú um að bönkunum stjórnuðu vel menntaðir og ungir menn. Voru þeir kannski fáfróðir aulabárðar?

Sparisjóðsstjóri Byrs sagði í fréttum Ríkisútvarpsins að í apríl hefðu menn ekki séð hvað væri á næsta leiti. Og nú hugsa menn sér að sækja í ríkissjóð um svokallað eiginfjárstyrk eða hvað það kallast og taldi sparisjóðsstjórinn að um gæti verið að ræða allt að 10 milljörðum króna frá almenningi.

Hvað segir almenningsálitið um það?

Hvað segir almenningsálitið um fjárhagslega heilsu Byrs?

Er þeim sem hafa spillt fjárhagslegri heilsu sinni ætlandi að efla fjárhagsheilsu annarra?

Hvað er fjárhagsleg heilsa?

Varða kannski auglýsingar Byrs um fjárhagsheilsuræktina við lög?

Íslendingar rétta úr kútnum - Steingrími og Gylfa hrósað

Þá kom loksins ein góð frétt í kvöld. Íslendingum gengur vel að rétta úr kútnum, sagði formaður sendinefndar Alþjóða gjaldeyrissjóðsins. Síðan heyrist því hvíslað manna á meðal að gjaldeyrissjóðssérfræðingarnir hafi verið harla ánægðir með Steingrím, fjármálaráherra, og Gylfa, viðskiptaráðherra. Sjálfsagt hafa þeir orðið hissa á því að sá sem Kanar kalla gjarnan kommúnista skuli hafa vit á fjármálum og bæði glaðir og hissa að hitta hagfræðing á stóli viðskiptaráðherra. Eitt er víst. Það virtist létt brúnin á talsmanni sjóðsins í morgun.

Síðan er hin gleðisagan að Jón Gerald ætli að stofna lágvöruverðsverslun og sé þegar kominn nokkur hópur fólks sem hefur hug á að leggja fé í fyrirtækið. Haft er eftir Jóni Gerald að ekki verði stefnt að einhverju stórgróðafyrirtæki. Eitt erum við Jón Gerald sammála um. Íslendingar þurfa að venja sig af því að vera vaxtafíklar. Það gerist einungis með því að lækka stýrivextina um leið og verðbólgan hjaðnar.

Sem sagt gott.

Feigðarflan

Karl náði ekki því sæti sem hann langaði í hjá Samfylkingunni. Þá gengur hann í Frjálslynda flokkinn sem leysist nú óðum upp í frumeindir sínar. Ekki bætir úr skák nýjasta formannsefnið. Hvernig getur jafnágætur maður og séra Karl V. Matthíasson gengið í lið með kynþáttahöturum Frjálslynda flokksins? Þá er betra að sitja heima og huga að því að ganga á Guðs vegum eins og prestar eiga að gera. Hann getur a.m.k. beðið fyrir sjávarútveginum og lagt honum þannig lið. Í Frjálslynda flokknum gerir hann það ekki.

Karl V. til liðs við Frjálslynda

Talandi Apple-tónstokkur

Þá er minnsti tónlistarspilari heims, Apple Shuffle, kominn á markaðinn og kostar 70 Bandaríkjadali í Bandaríkjunum. Spilarinn er með hugbúnaði sem getur sagt mönnum heiti laga, heiti lagalista og hægt er með auðveldum hætti að búa til nýja lagalista.

Spilarinn notar Itunes 8 til þess að hala niður tónlist. Vafalaust er það gert til þess að menn kaupi tónlistina eða séu a.m.k. með lögleg eintök. Þó kann að vera að fólk geti halað niður mp3-skrám af eigin tölvum og þá ætti Apple Shuffle að nýtast m.a. til að hlusta á hljóðbækur.

Síðast þegar ég las úttekt á Itunes vantaði dálítið upp á að það væri aðgengilegt blindu fólki, en það hlýtur að verða lagað. Þá sýnist mér á tæknilegum lýsingum á tækinu að auðvelt verði að þýða hugbúnaðinn á íslensku.

Þetta með tölvuþýðingarnar og íslenskt tölvutal er allalvarlegt mál. Vegna smæðar markaðarins er einatt erfitt að fá framleiðendur sérhæfðs búnaðar til þess að fallast á samvinnu um þýðingu talbúnaðar á íslensku. En markaðurinn hér á landi fyrir Apple Shuffle er nægilega stór til þess að slík þýðing borgaði sig. Mig minnir að fólk þurfi að hala niður talbúnaðinum af þeirri tölvu sem það notar og séu heiti laganna geymd sem Wave-skjöl. Þar með ætti vandinn að vera auðlestur. Sagt er að nú þegar hafi spilarinn á valdi sínu 14 tungumál.

Einu sinni sá ég Faðirvorið í lítilli bók á hótelherbergi. Var það á 25 helstu tungumálum heims. Vitanlega var íslenska þar á meðal.

Ítarlegar lýsingar á Apple Shuffle eru á heimasíðu Apple. Þar er skemmtilegt myndskeið með lýsingum á raddbúnaðinum.

Kosningafrumvarpið kemst ekki í gegn

Haft er eftir heimildarmanni á Alþingi að frumvarpið um breytingar á kosningalögum, þar sem gert er ráð fyrir rýmkun ákvæða um persónukjör, verði ekki afgreitt á yfirstandandi þingi. Mörg atriði frumvarpsins eru talin þurfa nánari skoðunar við. Þá hefur og verið bent á að frumvarpið gangi þvert gegn 29. gr samnings SÞ um málefni fatlaðra.

Samkvæmt áreiðanlegum heimildum svaf Öryrkjabandalag Íslands á verðinum í þessu máli og höfðu menn þar enga hugmynd um þá aðför að mannréttindum sem fólgin er í frumvarpinu.

Vænta má þess að frumvarpið verði tekið til nánari skoðunar og hagsmunaaðilar hafðir með í ráðum.

Lag allra laga, gleðigjafinn mikli - Austrið er rautt

Fyrir nokkru rakst ég á upplýsingarum breskt tónskáld, Cornilíus Cardew að nafni (1936-1981). Hann var einn af fyrirmyndarnemendum Karlheinz Stockhausens og þótti skara svo fram úr að hann var beðinn að taka þátt í alls konar rannsóknum sem Stockhausen stundaði og jafnvel var hann fenginn til að leggja lokahönd á tónverk hans.

Cardew aðhylltist ýmsa strauma og stefnur í nútímatónlist á 7. áratugnum en snerist síðan öndverður gegn Stockhausen og tilraunum hans og nefndi þær tónlistarheimsvaldastefnu. Þannig varð Stockhausen tónlistarheimsvaldasinni.

Cornilíus Cardew aðhylltist kenningar Maos formanns og samdi jafnvel verkið "Lengi lifi Mao formaður". Hann útsetti einnig nokkra lofsöngva um formanninn.

Þessum pistli fylgir hljóðrit af píanóútsetningu Cardews á gömlum, kínverskum ástarsöng, Austrið er rautt, sem varð síðar lofsöngur um Mao formann og ígildi þjóðsöngs um tíma. Bið ég hlustendur að njóta þessarar útsetningar, orkunnar og gleðinnar sem henni fylgir ekki síst í ljósi þess að sólin kemur nú upp fyrir kl. 8 á morgnana og sest rétt fyrir kl. hálf átta á kvöldin.

Skrár tengdar þessari bloggfærslu:

• Austrið er rautt

Jafnvel mannvistarleifar frá Steinöld

Páll Theodórsson er svo sannarlega vel að þessum titli kominn.

Vilhjálmur Eyjólfsson á Hnausum í Meðalllandi hefur greint frá því að við bæinn séu mannvistarleifar sem eru jafnvel frá steinöld. Byggir hann það á nálægum jarðlögum.

Það væri svo sannarlega ómaksins vert að jarðfræðingar og aðrir áhugamenn um sögu landsins skoðuðu þessar minjar. Sagt er að þær hafi látið nokkuð á sjá á undanförnum árum.

Páll Theódórsson Eldhugi Kópavogs 2009